ഈ നിമിഷത്തിലല്ലാതെ മറ്റെവിടെയാണ് നിങ്ങള്‍ക്ക് ജീവിക്കുവാനാകുക? - സദ്ഗുരു

ജീവന്റെ ഒരു അംശം മാത്രമായി ഇവിടെയിരിക്കുവാനായാല്‍, നിങ്ങള്‍ക്ക് മറ്റെല്ലാ ജീവിതങ്ങളുമായും പൂര്‍ണമായ ലയത്തിലായിത്തീരാം. അതാണ് യാഥാര്‍ഥ്യം. ഇതെന്റെ ആശയമോ നിങ്ങളുടെ ആശയമോ അല്ല; വാഴ്‌വിന്റെ മാര്‍ഗമാണ്. പക്ഷേ, നിങ്ങളൊരു വിഭജനമുണ്ടാക്കിയിരിക്കുന്നു. 'ഇവരെന്റെ വഴിയില്‍ ഇടപെടുന്നതിനാല്‍ ഞാനിവരെ വെറുക്കുന്നു. എന്റെ ആശയങ്ങള്‍ മഹത്തരമാണ്, എന്നാല്‍ ഇവര്‍ക്കത്തരം മഹത്തായ ആശയങ്ങളൊന്നുമില്ല. ഇവരെല്ലാം തരംതാഴ്ന്നവരാണ്, അതിനാലവരെ വെറുക്കാം.' ഇങ്ങനെ നിങ്ങളൊരു ആദര്‍ശം കെട്ടിച്ചമയ്ക്കുന്നു. നിങ്ങളൊരു നുണകൊണ്ട് മറ്റൊരു നുണയെ മുടിവെക്കാന്‍ ശ്രമിക്കുന്നു. അതൊരു പരിഹാരമല്ല, കാര്യങ്ങളെ കൂടുതല്‍ സങ്കീര്‍ണമാക്കുക മാത്രമാണതുകൊണ്ട് സംഭവിക്കുന്നത്. 'ഞാനിവരെ വെറുക്കുന്നു' എന്നുപറഞ്ഞ് വെറുപ്പിന്റെ ലോകത്തില്‍ മൂന്നുനാളുകള്‍ കഴിഞ്ഞതിനുശേഷം നോക്കൂ, 'ഞാനെന്താണിങ്ങനെ?' എന്ന് നിങ്ങളമ്പരക്കും. എന്തെന്നാല്‍ അതാണ് നിങ്ങളുടെ മാനവികത. പക്ഷേ, ആ വെറുപ്പിനെ സ്വന്തം ആശയങ്ങള്‍കൊണ്ടും നിയമങ്ങള്‍കൊണ്ടും ഉറപ്പിക്കുകയാണെങ്കില്‍, നിങ്ങള്‍ക്ക് ശിഷ്ടകാലം മുഴുവനും അവരോടുള്ള വെറുപ്പ് തുടരാം.

അത്യാഗ്രഹം വളരെ ആപേക്ഷികമായ ഒരു വാക്കാണ്. ഒരു കൊട്ടാരത്തില്‍ ജീവിക്കുക എന്നത് ഒരാവശ്യമാണെന്ന് ഒരാള്‍ കരുതുന്നു, എന്നാല്‍ അതൊരത്യാഗ്രഹമാണെന്ന് മറ്റൊരാള്‍ ചിന്തിക്കുന്നു. കുറച്ചുമുമ്പു നടന്ന ഒരു സംഭവം പറയാം. ഒരു മരച്ചുവട്ടില്‍ വസിച്ചിരുന്ന ഒരു സ്വാമിയെ ഞാന്‍ കണ്ടുമുട്ടി. ചെറിയ ആശ്രമങ്ങള്‍ കെട്ടി അതില്‍ ജീവിച്ചുവന്ന സന്ന്യാസിമാരെ അപഹസിക്കുക എന്നത് ഈ സ്വാമിയുടെ സ്ഥിരസ്വഭാവമായിരുന്നു. കാലാവസ്ഥയുടെ എല്ലാ രൂക്ഷതകളെയും അവഗണിച്ചുകൊണ്ട് താന്‍ ഒരു മരച്ചുവട്ടിലാണ് വസിക്കുന്നതെന്നതിനാല്‍, മറ്റു സന്ന്യാസിമാര്‍ എത്ര അഴിമതിക്കാരാണെന്നും അവരെങ്ങനെയാണ് സ്വയം സുഖലോലുപത അനുഭവിക്കുന്നതെന്നും പറഞ്ഞുപരത്തുന്നതിനായിത്തന്നെ അദ്ദേഹം ജീവിതം വിനിയോഗിച്ചു. 'ആഡംബരക്കാരാണവര്‍, നോക്കൂ എങ്ങനെയാണവര്‍ കുടിലുകള്‍ അലങ്കരിച്ചിരിക്കുന്നതെന്ന്.' അല്‍പം ഭംഗിവരുത്തുന്നതിനായി ഒരു ചെറിയ പൂന്തോട്ടമുണ്ടാക്കിയതിനോ മുറ്റത്ത് ഒന്നോ രണ്ടോ പൂച്ചട്ടികള്‍ വെച്ചതിനോ ആകും ഇങ്ങനെ അധിക്ഷേപിക്കുന്നത്. മറ്റുള്ളവരെക്കാള്‍ ഉയര്‍ന്നവനാണ് ഞാന്‍ എന്ന് കരുതുന്നതാണ് ഏറ്റവും ആഡംബരവും വിഡ്ഢിത്തവുമെന്ന് എനിക്കയാളെ ഓര്‍മ്മപ്പെടുത്തേണ്ടിവന്നു.

അതിനാല്‍ അത്യാഗ്രഹമെന്നത് വളരെ ആപേക്ഷികമാണ്. നിങ്ങളൊരിക്കലും അത്യാഗ്രഹിയല്ല. പക്ഷേ, നിങ്ങളാഗ്രഹിക്കുന്നത് നേടിയെടുത്ത ഒരാള്‍ നിങ്ങളുടെ കണ്ണില്‍ അത്യാഗ്രഹിയാകുന്നു. കോടിക്കണക്കിന് പണമുണ്ടാക്കുവാന്‍ നിങ്ങളാഗ്രഹിക്കുന്നു. പക്ഷേ നടക്കുന്നില്ല. എന്നാല്‍ അത് സാധിച്ചെടുത്തവന്‍ അത്യാഗ്രഹിയാണ്. നിങ്ങള്‍ ഒരു ലക്ഷം രൂപയുണ്ടാക്കിയാല്‍ അത് അത്യാഗ്രഹമല്ല, പത്തുലക്ഷം അത്യാഗ്രഹമാണ്, കാരണം, മറ്റൊരാള്‍ അതുണ്ടാക്കിയെടുത്തിരിക്കുന്നു. സംഭരിക്കുവാനും സമ്പാദിക്കുവാനും ഉള്ള ആഗ്രഹം വളരെ ശക്തമാണ്. കാരണം, എപ്പോഴും ഒരു പോരായ്മ അനുഭവപ്പെടുന്നുണ്ട്. ഇപ്പോള്‍ നിങ്ങള്‍ ജീവിക്കുന്നത് തൃപ്തമായ ഒരവസ്ഥയിലല്ല. ഇപ്പോള്‍ ആയിരിക്കുന്നതിലും കൂടുതലായ എന്തോ ആകണമെന്ന ആഗ്രഹം. എന്നാല്‍ അവിടെയെത്തിച്ചേര്‍ന്നാലോ അതിലും കൂടുതലായ എന്തെങ്കിലും ആകണമെന്നും നേടണമെന്നുമാകും ആഗ്രഹിക്കുക. അതായത്, ഭൂമിയെന്ന ഈ ഗ്രഹം മുഴുവനായും കൈയില്‍ വെച്ചുതന്നാലും നിങ്ങള്‍ ആകാശത്തെ താരങ്ങളെ നോക്കി അവയെയാഗ്രഹിക്കും. എന്തെന്നാല്‍ നിരന്തരം വികാസം തേടുന്ന ഒന്ന് നിങ്ങളുടെ ഉള്ളിലുണ്ട്. അതിനെത്ര കൊടുത്താലും മതിയാകുകയില്ല. 

പ്രപഞ്ചം മുഴുവനായി കൊടുത്താലും അതിലും കൂടുതല്‍ കൊടുത്താലും അത് മറ്റ് ഗാലക്‌സികള്‍ക്കായി തേടും. അതിരുകളില്ലാത്ത വിശാലത ആവശ്യപ്പെടുന്ന എന്തോ ഒന്ന് നമ്മുടെ ഉള്ളിലുണ്ട്. അതിനാല്‍, നിങ്ങള്‍ക്കറിയാവുന്നതുപോലെ ഇന്നത്തെ ലോകത്തിലുള്ള അത്യാഗ്രഹം, നിങ്ങളുടെ ആന്തരികസ്വത്വം അതിരുകളില്ലാത്ത അപാരത തേടുന്നതുകൊണ്ടുണ്ടാകുന്നതാണ്. പക്ഷേ, നിങ്ങളാ ദാഹത്തെ ഭൗതികമായ വസ്തുക്കള്‍കൊണ്ട് ശമിപ്പിക്കുവാന്‍ ശ്രമിക്കുന്നു. അതാണ് നിങ്ങളുടെ അത്യാഗ്രഹത്തിന്റെ അടിസ്ഥാനം.

നിങ്ങളുടെ അത്യാഗ്രഹത്തില്‍ തെറ്റൊന്നുമില്ല, യഥാര്‍ഥത്തിലതൊരു ആത്മീയപ്രക്രിയയാണ്. ധ്യാനമെന്നാല്‍ ഇത് മാത്രമാണ്, ലക്ഷ്യമില്ലാത്ത, പ്രബലമായ ആഗ്രഹം. പ്രത്യേകിച്ചൊന്നിനും വേണ്ടിയല്ലാത്ത നിങ്ങളുടെ അഭിലാഷവും ഊര്‍ജ്ജവും പൂര്‍ണശക്തി പ്രാപിക്കുമ്പോള്‍ അതു ധ്യാനമാകുന്നു.