എൻജിൻ ഓയിൽ നിങ്ങളുടെ വാഹനത്തിന്റെ ജീവരക്തമാണ്. സുഗമമായി പ്രവർത്തിക്കാനും പ്രധാന ഭാഗങ്ങളെ തേയ്മാനത്തിൽ നിന്ന് സംരക്ഷിക്കാനും ഇത് സഹായിക്കുന്നു.

To advertise here,

കൃത്യസമയത്ത് ഓയിൽ മാറ്റാതിരിക്കുന്നത് വലിയ സാമ്പത്തിക നഷ്ടം വരുന്ന അറ്റകുറ്റപ്പണികൾക്കും ഇന്ധനക്ഷമത കുറയുന്നതിനും എൻജിൻ തകരാറിലാകുന്നതിനും കാരണമാകും. വാഹനത്തിന്റെ ദീർഘായുസ്സിനും മികച്ച പ്രകടനത്തിനും എൻജിൻ ഓയിൽ എപ്പോൾ മാറ്റണമെന്ന് അറിഞ്ഞിരിക്കേണ്ടത് അത്യാവശ്യമാണ്.

എൻജിന്റെ ആരോഗ്യം നിലനിർത്തുന്നതിനും ഇന്ധനക്ഷമത മെച്ചപ്പെടുത്തുന്നതിനും നിങ്ങളുടെ വാഹനത്തിന്റെ ആയുസ്സ് വർധിപ്പിക്കുന്നതിനും കൃത്യമായ ഇടവേളകളിലുള്ള ഓയിൽ മാറ്റം അത്യാവശ്യമാണ്.

മൈലേജ്, ഓയിലിന്റെ നിറം, എൻജിൻ ശബ്ദം, വാണിങ് ലൈറ്റുകൾ, അസാധാരണമായ ഗന്ധങ്ങൾ എന്നിവ ശ്രദ്ധിക്കുന്നതിലൂടെ, നിങ്ങളുടെ വാഹനം വർഷങ്ങളോളം സുഗമമായും വിശ്വസനീയമായും പ്രവർത്തിക്കുന്നുവെന്ന് ഉറപ്പാക്കാൻ കഴിയും. ഓയിൽ മാറ്റാൻ സമയമായി എന്ന് സൂചിപ്പിക്കുന്ന അഞ്ച് പ്രധാന ലക്ഷണങ്ങൾ താഴെ നൽകുന്നു.

കറുത്തതോ അഴുക്കുപിടിച്ചതോ ആയ ഓയിൽ

പുതിയ എൻജിൻ ഓയിലിന് സാധാരണയായി ഒരുതരം മഞ്ഞ നിറവും തെളിമയുമുണ്ടാകും. കാലക്രമേണ, അഴുക്കും പൊടിയും മറ്റ് മാലിന്യങ്ങളും അടിഞ്ഞുകൂടി ഇതിന്റെ നിറം കറുക്കുന്നു. ഡിപ്സ്റ്റിക്ക് പതിവായി പരിശോധിക്കുന്നത് എൻജിന്റെ പ്രകടനത്തെ ബാധിക്കുന്നതിന് മുൻപ് അഴുക്കുപിടിച്ച ഓയിൽ കണ്ടെത്താൻ സഹായിക്കും.

എൻജിൻ ശബ്ദം മാറുന്നു

എൻജിൻ ഭാഗങ്ങൾക്ക് ആവശ്യമായ ലൂബ്രിക്കേഷൻ നൽകുന്നത് ഓയിലാണ്. ഓയിൽ പഴയതാകുമ്പോഴോ ഗുണം നഷ്ടപ്പെടുമ്പോഴോ ലോഹഭാഗങ്ങൾ പരസ്പരം ഉരസാൻ തുടങ്ങുകയും അസാധാരണമായ എൻജിൻ ശബ്ദങ്ങളോ നോക്കിങ്ങോ ഉണ്ടാകുകയും ചെയ്യും. ഓയിൽ മാറ്റാൻ വൈകി എന്നതിൻ്റെ വ്യക്തമായ സൂചനയാണിത്.

എൻജിൻ ലൈറ്റ്

ആധുനിക വാഹനങ്ങളിൽ ഓയിലിന്റെ അളവും ഗുണനിലവാരവും നിരീക്ഷിക്കുന്ന സെൻസറുകൾ ഘടിപ്പിച്ചിട്ടുണ്ട്. ഓയിൽ മാറ്റാനുള്ള ഇൻഡിക്കേറ്ററോ ചെക്ക് എൻജിൻ ലൈറ്റോ തെളിഞ്ഞാൽ അത് അവഗണിക്കരുത്. ഉടനടി ശ്രദ്ധിക്കണം. ഇത് നിങ്ങളുടെ എൻജിൻ സുരക്ഷിതമായി തുടരുന്നുവെന്ന് ഉറപ്പാക്കുന്നു.

പുകക്കുഴലിൽ നിന്നുള്ള പുക അല്ലെങ്കിൽ കരിയുന്ന ഗന്ധം

പുകക്കുഴലിൽനിന്ന് നീലയോ കറുത്തതോ ആയ പുകയോ ഓയിൽ കരിയുന്ന ഗന്ധമോ ശ്രദ്ധയിൽപ്പെട്ടാൽ, അത് ഓയിലിന്റെ ഗുണമേന്മ നഷ്ടപ്പെടുന്നു എന്നതിൻ്റെയോ അല്ലെങ്കിൽ അത് കംബസ്ഷൻ ചേമ്പറിലേക്ക് പടരുന്നു എന്നതിൻ്റെയോ സൂചനയായിരിക്കാം. ഉടനടിയുള്ള പരിശോധനയും ഓയിൽ മാറ്റലും ഗുരുതരമായ എൻജിൻ പ്രശ്നങ്ങൾ തടയാൻ സഹായിക്കും.

സമയപരിധി

വാഹന നിർമാതാക്കളുടെ നിർദേശമനുസരിച്ച്, ഓരോ 10,000 മുതൽ 15,000 കിലോമീറ്റർ വരെയോ അല്ലെങ്കിൽ വർഷത്തിൽ ഒരിക്കലെങ്കിലുമോ നിങ്ങളുടെ വാഹനത്തിന്റെ ഓയിൽ മാറ്റുക എന്നതാണ് ഏറ്റവും സാധാരണമായ മാർഗനിർദേശം.

 വാഹനം ഇത്രയും ദൂരം ഓടിയിട്ടില്ലെങ്കിൽ പോലും കാലക്രമേണ ഓയിലിന്റെ ഗുണമേന്മ കുറയാം. അതിനാൽ കൃത്യസമയത്ത് അത് മാറ്റേണ്ടത് പ്രധാനമാണ്.