റഷ്യൻ പ്രസിഡന്റ് വ്ലാദിമിർ പുതിന്റെ രണ്ടുദിവസത്തെ ഇന്ത്യൻ സന്ദർശനം ഡിസംബർ നാലുമുതൽ ആരംഭിക്കുകയാണ്. പ്രധാനമന്ത്രി നരേന്ദ്ര മോദിയെ കാണുകയും വെള്ളിയാഴ്ച ഹൈദരാബാദ് ഹൗസിൽ നടക്കുന്ന 23-ാം ഇന്ത്യ-റഷ്യ ഉച്ചകോടിയിൽ അദ്ദേഹം പങ്കെടുക്കുകയും ചെയ്യും. ഈ സന്ദർശന വേളയിൽ, ഇരു രാജ്യങ്ങളും തമ്മിൽ നിരവധി കരാറുകളിൽ ഒപ്പിടുമെന്ന് പ്രതീക്ഷിക്കുന്നു. അമേരിക്ക റഷ്യൻ എണ്ണയുടെ ഇറക്കുമതി കുറയ്ക്കാൻ ഇന്ത്യയോട് ആവശ്യപ്പെട്ട സമയത്താണ് പുതിന്റെ സന്ദർശനമെന്നതും ശ്രദ്ധേയമാണ്.

To advertise here,

അതിനിടെ, പ്രസിഡന്റ് വ്ലാദിമിർ പുതിന്റെ ഇന്ത്യാ സന്ദർശനം ഓട്ടോമൊബൈൽ പ്രേമികളുടെയും ശ്രദ്ധ പിടിച്ചുപറ്റിയിട്ടുണ്ട്. അദ്ദേഹത്തിന്റെ സുരക്ഷാ വാഹനവ്യൂഹത്തിലെ ഔറസ് സെനാറ്റ് ആണ് അതിന് കാരണം. വാഹനം ഇന്ത്യയിലെത്തിക്കഴിഞ്ഞു. ഈ അതിസുരക്ഷ വാഹനത്തിലാകും പുതിന്റെ സഞ്ചാരം. റഷ്യയുടെ ലക്ഷ്വറി ലിമോസിൻ എന്നും "റഷ്യൻ റോൾസ്-റോയ്‌സ്" എന്നും അറിയപ്പെടുന്ന സെനാറ്റ്, സായുധ സംരക്ഷണവും നൂതന സാങ്കേതികവിദ്യയും പ്രീമിയം കംഫർട്ടും സംയോജിപ്പിക്കുന്നു.

പൂർണമായി സായുധവും റഷ്യയിൽ നിർമിച്ചതുമായ ഔദ്യോഗിക വാഹനങ്ങൾ നിർമിക്കുന്നതിനായി മോസ്കോയുടെ കോർട്ടെഷ് പ്രോജക്റ്റിന് കീഴിൽ വികസിപ്പിച്ചെടുത്ത വാഹനമാണിത്. പുടിന്റെ മുൻ മെഴ്‌സിഡീസ്-ബെൻസ് എസ് 600 ഗാർഡ് പുൾമാന്റെ പിൻഗാമിയായാണ് സെനാറ്റ് എത്തിയത്.

പുതിന്റെ ഔറസ് സെനാറ്റിനെക്കുറിച്ച് കൂടുതൽ അറിയാം

2018-ലെ പുടിന്റെ സത്യപ്രതിജ്ഞാ ചടങ്ങിലാണ് ഔറസ് സെനാറ്റ് പുറത്തിറക്കിയത്. റഷ്യയുടെ നാമി ഇൻസ്റ്റിറ്റ്യൂട്ട്, സോളേഴ്സ് ജെഎസ്‌സി, യുഎഇയുടെ തവാസുൻ ഹോൾഡിങ് എന്നിവരുമായി സഹകരിച്ച് ഔറസ് മോട്ടോഴ്സാണ് ഇത് നിർമിക്കുന്നത്. 2021-ൽ യെലാബുഗയിൽ ഇത് വ്യാപകമായി ഉത്പാദിപ്പിച്ചു തുടങ്ങി. അന്നു മുതൽ ഈ ലിമോസിൻ പ്രധാന നയതന്ത്രപരമായ പരിപാടികളിൽ പ്രത്യക്ഷപ്പെട്ടിട്ടു തുടങ്ങി. 2024-ൽ ഉത്തരകൊറിയൻ നേതാവ് കിം ജോങ് ഉന്നിന് ഈ വാഹനം സമ്മാനമായി നൽകുകയും ചെയ്തിരുന്നു.

എൻജിനും പവർട്രെയിനും

ഔറസ് സെനാറ്റിന് 4.4 ലിറ്റർ, ട്വിൻ-ടർബോ വി8 ഹൈബ്രിഡ് എൻജിനാണ് കരുത്തേകുന്നത്. ഇത് 598 എച്ച്പി പരമാവധി ശക്തിയും 880 എൻഎം ടോർക്കും നൽകുന്നു. 9-സ്പീഡ് ഗിയർബോക്സുമായി സംയോജിപ്പിച്ചിരിക്കുന്ന ഔറസ് സെനാറ്റിന് വെറും ഒൻപത് സെക്കൻഡിൽ 0-100 കി.മീ വേഗത കൈവരിക്കാൻ കഴിയും. കൂടാതെ മണിക്കൂറിൽ 160 കി.മീ വേഗതയും ഉണ്ട്.

വലിപ്പം

5630 മി.മീ നീളവും 2,000 മി.മീ വീതിയും 1,700 മി.മീ ഉയരവുമുണ്ട്. 3,300 മി.മീ ആണ് വീൽബേസ്.

സുരക്ഷ 

വൻ സുരക്ഷാ ഭീഷണികൾ നേരിടാൻ രൂപകൽപന ചെയ്തത വാഹനമാണിത്. ഉയർന്ന സുരക്ഷാ സവിശേഷതകൾ ഇത് വാഗ്ദാനം ചെയ്യുന്നു. പൂർണമായും ബുള്ളറ്റ് പ്രൂഫായിട്ടാണ് നിർമ്മാണം. മിസൈൽ, ഡ്രോൺ ആക്രമണങ്ങളെ പ്രതിരോധിക്കുന്ന രീതിയിലാണ് വാഹനത്തിന്റെ സംരക്ഷണ ഷെൽ രൂപകൽപന ചെയ്തിട്ടുള്ളത്.

ഇത് സ്ഫോടനങ്ങളുടെ ആഘാതം ലഘൂകരിക്കാൻ സഹായിക്കും. വെള്ളത്തിൽ മുങ്ങിയാൽ, സെനാറ്റിന് ഒരു അന്തർവാഹിനിയെപ്പോലെ പ്രവർത്തിക്കാൻ കഴിയും. ഇത് സുരക്ഷിത സ്ഥാനത്ത് എത്തുന്നത് വരെ വെള്ളത്തിൽ പൊങ്ങിക്കിടക്കാനും പ്രവർത്തനക്ഷമമായിരിക്കാനും അനുവദിക്കുന്നു.

ടയറുകൾ തകരാറിലായാൽപോലും, ഇതിന്റെ റൺ-ഫ്ലാറ്റ് സംവിധാനം ഉയർന്ന വേഗതയിൽ തുടർച്ചയായി യാത്ര ചെയ്യാൻ സഹായിക്കുന്നു. കൂടാതെ, കാബിനിൽ രാസായുധ ആക്രമണ പ്രതിരോധ സംവിധാനവും ഉണ്ട്. വിഷവാതകങ്ങളെ തടയാൻ സ്വതന്ത്ര എയർ ഫിൽട്ടറേഷൻ സജ്ജീകരിച്ചിരിച്ചിട്ടുണ്ട്.

ഇന്റീരിയർ

അത്യാഢംബരം നിറഞ്ഞതാണ് ഔറസ് സെനാറ്റിന്റെ ഉൾവശം. റോളിങ് എക്സിക്യൂട്ടീവ് സ്യൂട്ട് ആയാണ് രൂപകൽപ. ലെതർ അപ്ഹോൾസ്റ്ററി, കൈകൊണ്ട് നിർമിച്ച തടി പാനലുകൾ, ക്ലൈമറ്റ് കൺട്രോൾ, സുരക്ഷിതമായ ആശയവിനിമയ സംവിധാനങ്ങൾ എന്നിവ ഉൾപ്പെടുന്നു. യാത്രയിൽ സുഖം ഉറപ്പാക്കുന്ന മസാജ് ഫങ്ഷനുകളുള്ള പവർ-അഡ്ജസ്റ്റ് ചെയ്യാവുന്ന വെന്റിലേറ്റഡ് പിൻ സീറ്റുകൾ പോലുള്ള സവിശേഷതകളും ഇതിൽ ഉൾപ്പെടുന്നു.

അധിക സൗകര്യത്തിനായി ഒരു റഫ്രിജറേറ്റഡ് കമ്പാർട്ട്‌മെന്റും ഉണ്ട്. 32 ഇഞ്ച് ഡിസ്‌പ്ലേ, ഒരു പ്രീമിയം സൗണ്ട് സിസ്റ്റം, വയർലെസ് ചാർജിങ് പാഡുകൾ എന്നിവയും ഉണ്ട്. ഒരു മൊബൈൽ ഓഫീസായി ഫലപ്രദമായി വാഹനം മാറുന്നു എന്ന് ചുരുക്കം.

വില

ഔറസ് സെനാറ്റിന്റെ സാധാരണ ഉത്പാദനം 2021-ൽ യെലാബുഗ പ്ലാന്റിലാണ് ആരംഭിച്ചത്. പ്രതിവർഷം ഏകദേശം 120 യൂണിറ്റുകൾ മാത്രമാണ് നിർമിക്കുന്നത്. വില ഏകദേശം 18-20 ദശലക്ഷം റൂബിളാണ്. ഇത് ഏകദേശം 2.1-2.5 കോടി രൂപയാണ്. സെഡാൻ, സായുധ ലിമോസിൻ, കൺവേർട്ടിബിൾ പതിപ്പുകൾ എന്നിവ വാങ്ങുന്നവർക്ക് തിരഞ്ഞെടുക്കാം.