ആലപ്പുഴ: ആലപ്പുഴയിൽനിന്ന് ബെംഗളൂരുവിലേക്ക് കെ.എസ്.ആർ.ടി.സി.യുടെ ആഡംബര 'എക്‌സിക്യുട്ടീവ് ക്ലാസ്' ബസ് സർവീസ് കെ.സി. വേണുഗോപാൽ എം.പി. ഫ്‌ലാഗ് ഓഫ് ചെയ്തു. മുൻപ് ഇതേ റൂട്ടിൽ സർവീസ് നടത്തിയിരുന്ന ബസ് പുനരാരംഭിക്കണമെന്ന് കെ.സി. വേണുഗോപാൽ എം.പി. ഗതാഗതമന്ത്രിയോട് ആവശ്യപ്പെട്ടതിലാണ് എക്‌സിക്യൂട്ടീവ് ക്ലാസ് ബസിന് അനുമതി ലഭിച്ചത്.

To advertise here,

മുൻപുണ്ടായിരുന്ന ആലപ്പുഴ-തേനി, ആലപ്പുഴ -സുൽത്താൻബത്തേരി സർവീസുകൾകൂടി പുനരാരംഭിക്കുമെന്ന് കെ.സി. വേണുഗോപാൽ എം.പി. പറഞ്ഞു. കെ.എസ്.ആർ.ടി.സി. എം.ഡി.യുമായി ഇക്കാര്യം സംസാരിച്ചെന്നും അദ്ദേഹം ഈ വിഷയത്തിൽ അനുകൂല നിലപാട് സ്വീകരിച്ചിട്ടുണ്ടെന്നും എം.പി. വ്യക്തമാക്കി.

കെ.എസ്.ആർ.ടി.സി. സ്റ്റാൻഡിലെ അന്വേഷണ കൗണ്ടർ നെഹ്‌റുട്രോഫി വള്ളംകളിയുടെ മുന്നോടിയായി തുറന്നുപ്രവർത്തിക്കാൻ എം.പി. നിർദേശം നൽകി. എം.പി.ഫണ്ടിനു പുറമേ രാജ്യസഭാ എം.പി.മാരുടെ ഫണ്ടും ജി. സുധാകരൻ, എ.ഡി. തോമസ് എം.എൽ.എ.മാരുടെ ഫണ്ട് വിനിയോഗിച്ച് കെ.എസ്.ആർ.ടി.സി. കെട്ടിടവും പുതുക്കിപ്പണിയാൻ നടപടി സ്വീകരിക്കുമെന്നും കെ.സി. വേണുഗോപാൽ വ്യക്തമാക്കി.

അതിനാവശ്യമായ എസ്റ്റിമേറ്റ് തയ്യാറാക്കാൻ ഉദ്യോഗസ്ഥർക്കു നിർദേശം നൽകി. ശൗചാലയം, ഭക്ഷണം, കഫ്റ്റീരിയ, പാൻട്രി തുടങ്ങിയ അത്യാധുനിക സൗകര്യങ്ങളാണ് ആലപ്പുഴ- ബെംഗളൂരു സർവീസിലുള്ളത്.

മണ്ണുത്തി ബൈപ്പാസ്, പാലക്കാട് ചന്ദ്രനഗർ, എൽ ആൻഡ് ടി ബൈപ്പാസ് (കോയമ്പത്തൂർ), സേലം വഴിയാണ് സർവീസ്. വൈകുന്നേരം ആറിനു ആലപ്പുഴയിൽനിന്നു പുറപ്പെടുന്ന ബസ് രാത്രി 7.25-ന് വൈറ്റിലയിലും പുലർച്ചെ 6.25-ന് ബെംഗളൂരുവിലും എത്തും. തിരികെ സർവീസ് രാത്രി എട്ടിന് ബെംഗളൂരുവിൽനിന്നു പുറപ്പെട്ട് രാവിലെ എട്ടിന് ആലപ്പുഴയിൽ എത്തിച്ചേരും. ആദ്യഘട്ടത്തിൽ ഒരു ദിവസം ഇടവിട്ടായിരിക്കും സർവീസ്.