കൊച്ചി: നിയമലംഘനം പതിവാക്കിയ 'സജിമോൻ' ബസിന്റെ പെർമിറ്റ് റദ്ദാക്കണമെന്ന ആവശ്യവുമായി സിറ്റി പോലീസ്. ഇത് സംബന്ധിച്ച് മോട്ടോർ വാഹനവകുപ്പിന് പോലീസ് അപേക്ഷ നൽകി. ബസിന്റെ ആർ.സി. ബുക്ക് അടക്കമുള്ള രേഖകൾ പൊലീസ് തിങ്കളാഴ്ച കോടതിയിൽ ഹാജരാക്കി.

To advertise here,

ബസ് പിഴയടയ്ക്കാനുള്ളത് 200 ചെലാനുകളാണെന്ന വിവരവും സെൻട്രൽ പോലീസ് കോടതിയെ അറിയിച്ചു. ഇരുനൂറോളം ഗതാഗത നിയമലംഘനങ്ങൾക്ക് പിഴയടയ്ക്കാനുണ്ടെന്ന് കണ്ടെത്തിയതിനെ തുടർന്നാണ് ബസ് രേഖകൾ പോലീസ് ജില്ലാ കോടതിയിൽ ഹാജരാക്കിയത്.

ഓട്ടോറിക്ഷക്കാരനെ മർദിച്ചതിന് 'സജിമോൻ' ബസിലെ ജീവനക്കാരായ പള്ളുരുത്തി സ്വദേശി ഇസഡ്. നഹാസ് (28), സഹോദരൻ നസറുദ്ദീൻ (38), കുന്പളങ്ങി സ്വദേശി ബ്രിസ്റ്റോ മാത്യൂസ് (30) എന്നിവരെ ശനിയാഴ്ച അറസ്റ്റ് ചെയ്തിരുന്നു.

വെള്ളിയാഴ്ച രാത്രി 7.45-ന് എറണാകുളം നോർത്ത് ടൗൺഹാളിനുമുന്നിലെ പന്പിനുസമീപമായിരുന്നു സംഭവം. കോന്തുരുത്തി സ്വദേശി ഹാഷിം (54) ഓടിച്ച ഓട്ടോറിക്ഷയെ 'സജിമോൻ' ബസ് ഇടിക്കാൻവന്നത് ചോദ്യംചെയ്തതിനെ തുടർന്നാണ് തർക്കമുണ്ടായത്. ഇതിനുപിന്നാലെ ബസ് ജീവനക്കാർ ഹാഷിമിനെ മർദിക്കുകയായിരുന്നു.