ടാറ്റ മോട്ടോഴ്‌സിന്റെ വാഹന നിരയിലെ ഏറ്റവും ഒടുവിലെ സൂപ്പർ ഹിറ്റ് മോഡലാണ് സിയേറ. പെട്രോൾ-ഡീസൽ എൻജിനിലെത്തിയ ഈ മിഡ്‌സൈസ് എസ്‌യുവിയുടെ ഇന്ത്യയിലെ വാഹന വിപണി ഇരുകൈയും നീട്ടിയാണ് സ്വീകരിച്ചിരിക്കുന്നത്. ICE മോഡലുകൾക്ക് ലഭിച്ച സ്വീകാര്യതയുടെ ആത്മവിശ്വാസത്തിൽ ഇലക്ട്രിക് മോഡലും നിരത്തുകളിൽ എത്തിക്കാനൊരുങ്ങുകയാണ് നിർമാതാക്കൾ. അണിയറിയിൽ ഒരുങ്ങുന്ന സിയേറ ഇവി ഈ വർഷം രണ്ടാം പാദത്തിൽ എത്തുമെന്നാണ് ഓട്ടോകാർ ഇന്ത്യ റിപ്പോർട്ട് ചെയ്യുന്നത്.

To advertise here,

ടാറ്റയുടെ ഇലക്ട്രിക് വാഹനങ്ങളിലെ ഫ്‌ളാഗ്ഷിപ്പ് മോഡലായ ഹാരിയർ ഇവിക്ക് താഴെയായിരിക്കും സിയേറ ഇലക്ട്രിക്കിന്റെ സ്ഥാനം. ഹ്യുണ്ടായിയുടെ ക്രെറ്റ ഇലക്ട്രിക്, മാരുതി സുസുക്കി ഇ-വിത്താര, മഹീന്ദ്ര ബിഇ6 തുടങ്ങിയ വാഹനങ്ങളുമായായിരിക്കും സിയേറ ഇവി വിപണിയിൽ ഏറ്റുമുട്ടുക. ടാറ്റയുടെ സാനന്ദിലെ പ്ലാന്റിൽ റെഗുലർ സിയേറ വാഹനങ്ങൾക്കൊപ്പമായിരിക്കും ഇലക്ട്രിക് പതിപ്പുകളും നിർമിക്കുകയെന്നാണ് റിപ്പോർട്ട്. സിയേറയുടെ അവതരണത്തിന് മുമ്പുതന്നെ ഇലക്ട്രിക് പതിപ്പും എത്തുമെന്ന് അറിയിച്ചിരുന്നു.

ഇലക്ട്രിക് വാഹനങ്ങൾക്ക് ആവശ്യമായ മാറ്റങ്ങൾ വരുത്തുന്നുണ്ടെന്നത് ഒഴിച്ച് നിർത്തിയാൽ റെഗുലർ സിയേറയ്ക്ക് സമാനമായ ഡിസൈനിൽ തന്നെയായിരിക്കും ഇലക്ട്രിക് പതിപ്പും ഒരുങ്ങുക. ക്ലോസ്ഡ് ഗ്രില്ല്, സ്പ്ലിറ്റ് ഹെഡ്‌ലാമ്പ്, വീതിയേറിയ എൽഇഡി ഡിആർഎൽ, എന്നിവ ഇലക്ട്രിക്കിലും നൽകും. ICE പതിപ്പുമായി ഇന്റീരിയർ ഫീച്ചറുകൾ പങ്കിട്ടായിരിക്കും സിയേറ ഇവിയും എത്തുക. ഉയർന്ന വേരിയന്റുകളിൽ മൂന്ന് സ്‌ക്രീനുകളും താഴ്ന്ന വേരിയന്റിൽ രണ്ട് സ്‌ക്രീനും ഉൾപ്പെടെയുള്ള ഫീച്ചറുകളും ഇലക്ട്രിക് പതിപ്പിൽ നൽകും.

ഫീച്ചറുകളും ഡിസൈനും സംബന്ധിച്ച സൂചനകളും അഭ്യൂഹങ്ങളും ഉയരുമ്പോഴും മെക്കാനിക്കൽ ഫീച്ചറുകളിൽ സസ്‌പെൻസ് നിലനിർത്താൻ നിർമാതാക്കൾ ശ്രമിക്കുന്നുണ്ട്. സിംഗിൾ മോട്ടോർ റിയർ വീൽ ഡ്രൈവ്, ഡ്യുവൽ മോട്ടോർ ഓൾ വീൽ ഡ്രൈവ് പതിപ്പുകളിൽ സിയേറ ഇവി ലഭ്യമാകും. ഒന്നിലധികം ബാറ്ററി പാക്ക് ഓപ്ഷനുകളിലും സിയേറയുടെ ഇലക്ട്രിക് പതിപ്പ് എത്തും. വില കുറയ്ക്കുന്നതിനായി അടുത്തിടെ പഞ്ചിൽ നൽകിയ ബാറ്ററി ആസ് എ സർവീസ് (ബാസ്) സ്‌കീമും സിയേറയ്ക്ക് നൽകും.

നിലവിൽ ICE പതിപ്പായാണ് സിയേറ എത്തുന്നത്. സ്മാർട്ട് പ്ലസ്, പ്യുവർ, പ്യുവർ പ്ലസ്, അഡ്വഞ്ചർ, അഡ്വഞ്ചർ പ്ലസ്, അക്കംപ്ലീഷ്ഡ്, അക്കംപ്ലീഷ്ഡ് പ്ലസ് എന്നിങ്ങനെ ഏഴ് വേരിയന്റുകളിൽ എത്തുന്ന സിയേറയ്ക്ക് 11.49 ലക്ഷം രൂപയിലാണ് എക്‌സ്‌ഷോറൂം വില ആരംഭിക്കുന്നത്. 1.5 ലിറ്റർ ക്രെയോജെറ്റ് ഡീസൽ എൻജിനിലും 1.5 ലിറ്റർ ഹൈപ്പീരിയോൺ പെട്രോൾ എൻജിനിലുമാണ് ഈ മോഡൽ എത്തുന്നത്. ആറ് സ്പീഡ് ടോർക്ക് കൺവേർട്ടർ ഓട്ടോമാറ്റിക്, ആറ് സ്പീഡ് മാനുവൽ എന്നിവയാണ് ഈ എൻജിനുകൾക്കൊപ്പം നൽകിയിട്ടുള്ള ട്രാൻസ്മിഷൻ.

 

Source