ടാറ്റ മോട്ടോഴ്സിന്റെ ഇലക്ട്രിക് വാഹന നിരയിലെ ഫ്ളാഗ്ഷിപ്പ് മോഡലായ ഹാരിയര് ഇവിക്ക് ഏറ്റവും മികച്ച തുടക്കം സമ്മാനിച്ചിരിക്കുകയാണ് ഇന്ത്യയിലെ ഉപയോക്താക്കള്. ബുക്കിങ്ങ് ആരംഭിച്ച് ആദ്യ 24 മണിക്കൂറിനുള്ളില് 10,000 ആളുകളാണ് ഈ വാഹനം സ്വന്തമാക്കാന് സന്നദ്ധത അറിയിച്ചിരിക്കുന്നത്. ഇതിനോടകം തന്നെ നിര്മാണം ആരംഭിച്ച ഹാരിയര് ഇവി ഈ മാസം തന്നെ ഉപയോക്താക്കള്ക്ക് കൈമാറാനാകുമെന്നാണ് നിര്മാതാക്കളായ ടാറ്റ മോട്ടോഴ്സ് അറിയിച്ചിരിക്കുന്നത്.
രണ്ട് ബാറ്ററി പാക്ക് ഓപ്ഷനുകളില് ഓള് വീല് ഡ്രൈവ്, ടൂ വീല് ഡ്രൈവ് സംവിധാനങ്ങളിലായി ആറ് വേരിയന്റുകളിലാണ് ഹാരിയര് ഇവി വിപണിയില് എത്തുന്നത്. 21.49 ലക്ഷം രൂപ മുതല് 30.23 ലക്ഷം രൂപ വരെയാണ് ഈ വാഹനത്തിന്റെ ഇന്ത്യയിലെ എക്സ്ഷോറൂം വില. ടാറ്റ മോട്ടോഴ്സിന്റെ പൂനെയിലെ പ്ലാന്റിലാണ് ഹാരിയര് ഇവി നിര്മിക്കുന്നത്. പ്രൊഡക്ഷന് ആരംഭിച്ചതിന് പിന്നാലെ കഴിഞ്ഞ ദിവസമാണ് നിര്മാണം പൂര്ത്തിയാക്കി പുറത്തിറങ്ങിയ ആദ്യ വാഹനത്തിന്റെ ചിത്രം നിര്മാതാക്കള് പങ്കുവെച്ചത്.
65 കിലോവാട്ട് ബാറ്ററി പാക്കില് മൂന്ന് വേരിയന്റുകളാണുള്ളത്. അഡ്വഞ്ചര് 65, അഡ്വഞ്ചര് എസ് 65, ഫിയര്ലെസ് പ്ലസ് 65 എന്നിങ്ങനെ പേര് നല്കിയിരിക്കുന്ന ഇവയ്ക്ക് യഥാക്രമം 21.49 ലക്ഷം, 21.99 ലക്ഷം, 23.99 ലക്ഷം എന്നിങ്ങനെയാണ് എക്സ്ഷോറൂം വില. 75 കിലോവാട്ട് പതിപ്പിലും മൂന്ന് വേരിയന്റുകളാണുള്ളത്. ഫിയര്ലെസ് പ്ലസ് 75, എംപവേര്ഡ് 75, എംപവേര്ഡ് 75 QWD എന്നിങ്ങനെ പേര് നല്കിയിരിക്കുന്ന മോഡലുകള്ക്ക് 24.99 ലക്ഷം, 27.49 ലക്ഷം, 28.99 ലക്ഷം എന്നിങ്ങനെയാണ് എക്സ്ഷോറൂം വില.
65 കിലോവാട്ട് ശേഷിയുള്ള ബാറ്ററി നല്കിയിട്ടുള്ള ഹാരിയര് ഇവിക്ക് എആര്എഐ സാക്ഷ്യപ്പെടുത്തുന്ന റേഞ്ച് 538 കിലോമീറ്ററാണ്. എന്നാല്, ടാറ്റയുടെ ആഭ്യന്തര പരീക്ഷണത്തില് 445 കിലോമീറ്റര് റേഞ്ചാണ് ഉറപ്പുനല്കുന്നത്. അതേസമയം, 75 കിലോവാട്ട് ബാറ്ററി പാക്ക് നല്കിയിട്ടുള്ള പതിപ്പിന് 622 കിലോമീറ്റര് റേഞ്ചും എആര്എഐ സാക്ഷ്യപ്പെടുത്തിയിട്ടുണ്ട്.
റിയര് വീല് ഡ്രൈവ് മോഡലായി എത്തുന്ന ഹാരിയര് ഇവി 65-ലെ ഇലക്ട്രിക് മോട്ടോര് 175 എച്ച്പി പവറും 315 എന്എം ടോര്ക്കുമാണ് നല്കുന്നത്. ഹാരിയര് ഇവി 75-ലേയും റിയര് വീല് ഡ്രൈവ് പതിപ്പിലും ഈ മോട്ടോര് തന്നെയാണ് പ്രവര്ത്തിക്കുന്നത്. എന്നാല്, ഈ വാഹനത്തിന് 627 കിലോമീറ്റര് റേഞ്ച് ഉറപ്പാക്കുന്നുണ്ട്. ഹാരിയര് ഇവി ഓള് വീല് ഡ്രൈവ് പതിപ്പില് ഇരട്ട മോട്ടോറാണ് നല്കിയിരിക്കുന്നത്. മുന്നിലെ ആക്സില് നല്കിയിട്ടുള്ള മോട്ടോര് 158 എച്ച്പിയും പിന്നിലേത് 238 എച്ച്പിയും പവര് ഉത്പാദിപ്പിക്കും. 504 എന്എം ആണ് ഇതിന്റെ ടോര്ക്ക്.
ബാറ്ററി ചാര്ജ് ചെയ്യാനെടുക്കുന്ന സമയമാണ് ഹാരിയര് ഇവിയുടെ മറ്റൊരു ആകര്ഷണം. 100 കിലോവാട്ട് ഡിസി ഫാസ്റ്റ് ചാര്ജര് ഉപയോഗിച്ച് കേവലം 25 മിനിറ്റില് 10 ശതമാനത്തില് നിന്ന് 80 ശതമാനം വരെ ചാര്ജിങ് സാധ്യമാകും. ഹാരിയര് ഇവി 65, 75 എന്നീ രണ്ട് പതിപ്പുകള്ക്കും ഒരേ സമയമാണ് ഫാസ്റ്റ് ചാര്ജിങ്ങിന് വേണ്ടത്. എന്നാല്, 7.2 കിലോവാട്ട് എസി ചാര്ജര് ഉപയോഗിച്ചാല് ഹാരിയര് ഇവി 65-ന് 9.3 മണിക്കൂറും 75-ന് 10.7 മണിക്കൂറുമാണ് ബാറ്ററി നിറയാന് എടുക്കുന്ന സമയം.
Content Highlights: Tata Harrier EV launched with 6 variants, 500+ km range, and 25-minute fast charging
Published: 06 Jul 2025, 06:51 pm IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented