തുടക്കക്കാർക്കായുള്ള അഡ്വഞ്ചർ ടൂറർ ബൈക്കുകൾ തേടുന്ന ഉപഭോക്താക്കൾക്കായി വേർസിസ്-എക്സ് 300നെ ഇന്ത്യയിലെത്തിച്ച് ജാപ്പനീസ് ഐക്കോണിക്ക് ഇരുചക്ര വാഹന ബ്രാൻഡായ കവാസാക്കി. പൂർണമായി വിദേശത്ത് നിർമിച്ച് ഇന്ത്യയിലേക്ക് ഇറക്കുമതി ചെയ്താണ് വാഹനം വിൽക്കുക. റോയൽ എൻഫീൽഡ് ഹിമാലയൻ 450, കെടിഎം 390 അഡ്വഞ്ചർ എന്നീ മോഡലുകളാണ് വേർസിസ്-എക്സ് 300 2025 പതിപ്പിന്റെ പ്രധാന എതിരാളികൾ. 3.80 ലക്ഷം രൂപയാണ് വില (എക്സ്-ഷോറൂം). 

To advertise here,

കവാസാക്കി വേർസിസ്-എക്സ് 300 അതിന്റെ കരുത്ത് കൂടിയ വലിയ മോഡലുകളുടെ അതേ വ്യക്തിത്വം നിലനിർത്തുന്നുണ്ട്. വലിയ വിൻഡ്‌സ്‌ക്രീനിനൊപ്പം സവിശേഷമായ ഹെഡ്‌ലാമ്പ് ഡിസൈനും ലഭിക്കുന്നു. വശങ്ങളിലുള്ള ഫെയറിങ്ങ് ഈ ശ്രേണിയിലെ വലിയ ബൈക്കുകൾക്ക് സമാനമായ രൂപഭംഗി നൽകുന്നുണ്ട്. സിംഗിൾ പീസ് സീറ്റാണുള്ളത്. കാൻഡി ലൈം ഗ്രീൻ ടൈപ്പ് 3 വിത്ത് മെറ്റാലിക് ഫ്ലാറ്റ് സ്പാർക്കിൾ ബ്ലാക്ക്, മെറ്റാലിക് ഓഷ്യൻ ബ്ലൂ വിത്ത് പേൾ റോബോട്ടിക് വൈറ്റ് എന്നിങ്ങനെ രണ്ട് കളർ ഓപ്ഷനുകളിൽ വേർസിസ്-എക്സ് 300 സ്വന്തമാക്കാം.   

130 എംഎം ട്രാവൽ നൽകുന്ന ടെലിസ്കോപ്പിക് ഫോർക്ക് മുന്നിലും 148 എംഎം ട്രാവൽ നൽകുന്ന മോണോഷോക്ക് പിന്നിലും സസ്പെൻഷൻ കൈകാര്യം ചെയ്യുന്നു. മുന്നിൽ 290 എംഎം സിംഗിൾ-ഡിസ്‌ക് ബ്രേക്കിൽ ഡ്യുവൽ-പിസ്റ്റൺ കാലിപ്പറുകളും പിന്നിൽ 220 എംഎം സിംഗിൾ-ഡിസ്‌ക് വിത്ത് ഡ്യുവൽ-പിസ്റ്റൺ കാലിപ്പറുമാണ് ബ്രേക്കിങ്ങ് ചുമതലകൾ നിർവ്വഹിക്കുന്നത്. ഡ്യുവൽ ചാനൽ എബിഎസും ഉണ്ട്. മുൻവശത്ത് 19 ഇഞ്ചും പിൻവശത്ത് 17 ഇഞ്ചും സ്പോക്ക് വീലുകളാണുള്ളത്.

OBD-2B മാനദണ്ഡങ്ങൾ പാലിക്കുന്ന 296 സിസി പാരലൽ-ട്വിൻ ലിക്വിഡ്-കൂൾഡ് എൻജിനാണ് വാഹനത്തിന്റെ ഹൃദയം. നിഞ്ച 300-ന് വേണ്ടി ബ്രാൻഡ് ഉപയോഗിക്കുന്ന അതേ എൻജിനാണിത്. 40 എച്ച്പി പവറും 25.7 എൻഎം പീക്ക് ടോർക്കും ഈ എൻജിൻ ഉത്പാദിപ്പിക്കും. സ്ലിപ്പ് ആൻഡ് അസിസ്റ്റ് ക്ലച്ചോടുകൂടിയ 6-സ്പീഡ് ഗിയർബോക്സും ഉണ്ട്. ഡിജി-അനലോഗ് ഇൻസ്ട്രുമെന്റ് ക്ലസ്റ്ററാണ് ബൈക്കിലുള്ളത്.