തരിശുഭൂമിയും ഹരിതവനമാകും, നിർമ്മിച്ചത് നൂറുകണക്കിന് ഫുഡ് ഫോറസ്റ്റുകൾ; ഇത് ഷിഹാബിന്റെ അഗ്രോ ഇക്കോളജി

പ്രധാനമായും ഏഴു ലെയറുകളാണ് ഒരു ഫുഡ് ഫോറസ്റ്റിനുള്ളത്. ഉയർന്ന വിതാനമുള്ള മാവ്, പ്ലാവ് മുതലായവയാണ് ആദ്യ ലെയറിൽ ഉൾപ്പെടുന്നത്. ചെറിയ വിതാനമുള്ള നാരകം, സ്റ്റാർ ഫ്രൂട്ട്സ് എന്നിവയാണ് അടുത്ത ലെയറിൽ. മൂന്നാമത്തെ ലെയർ എന്നു പറയുന്നത് പെട്ടെന്ന് കായ്ക്കുന്ന പപ്പായ, വാഴ മുതലായവയുടേതാണ്. മധുര കിഴങ്ങ്, കാച്ചിൽ, ചേമ്പ് മുതലായ കിഴങ്ങുവർ​ഗങ്ങളുടേതാണ് അടുത്ത ലെയർ. പയർ മുതലായവ കവർ ക്രോപ്പുകളായി നടുന്നു. നൈട്രജൻ ഫിക്സിങ് ആയിട്ടുള്ള ചെടികളാണ് അടുത്ത ലെയറിൽ ഉൾപ്പെടുന്നത്. കൃഷിയെയും പരിസ്ഥിതിയെയും സമീകരിച്ചുള്ള അ​ഗ്രോ ഇക്കോളജി എന്ന സങ്കല്പമാണ് പിന്തുടരുന്നത്.  ഇന്ത്യയിൽ വിവിധ സംസ്ഥാനങ്ങളിലേക്ക് ഫുഡ് ഫോറസ്റ്റ് ഒരുക്കൽ വിപുലപ്പെടുത്തി ഇപ്പോൾ ഷിഹാബ് മറ്റു രാജ്യങ്ങളിലുൾപ്പെടെ ഭക്ഷ്യവനങ്ങളൊരുക്കി നൽകുന്നുണ്ട്.

കമ്യൂണിറ്റി രൂപവത്കരണം

ഓരോ വ്യക്തിയും അവരവരുടെ ഭക്ഷ്യവനങ്ങളൊരുക്കേണ്ടതിനെ കുറിച്ച് അവബോധം നൽകുക എന്ന ഉദ്ദേശ്യത്തോടെയാണ് ഒരു കമ്യൂണിറ്റി രൂപവത്കരിച്ചത്. ഭക്ഷ്യവനം നിർമ്മിക്കുന്നതിനെക്കുറിച്ച് അവബോധം നൽകുകയും അവർക്ക് ഭക്ഷ്യവനം നിർമ്മിക്കാൻ പിന്തുണ നൽകുകയും ചെയ്യുക എന്നതാണ് ലക്ഷ്യം. മണ്ണ്, അതിന്റെ ഘടന മനസിലാക്കി കാലാവസ്ഥയ്ക്ക് അനുയോജ്യമായ വിളകൾ എങ്ങനെ തിരഞ്ഞെടുക്കാനും ആ പ്രദേശത്ത് വളരെ തദ്ദേശീയമായ വിളകളിൽ ശ്രദ്ധ കേന്ദ്രീകരിക്കുന്നതിനും വിളവെടുക്കുന്നതിനെ കുറിച്ചൊക്കയും ഒരു ബോധ്യം നൽകുക, പിന്തുണ നൽകുകയെന്നതാണ് ചെയ്തുവരുന്നത്.  

ഒരു സുപ്രഭാത്തിൽ ഒന്നും ചിന്തിക്കാതെ ജോലി ഉപേക്ഷിക്കരുതെന്ന് ഷിഹാബ് പറയുന്നു. സമയമെടുത്ത് കൃത്യമായ പഠനത്തിലൂടെ വ്യക്തമായ ആശയം ഉരുത്തിരിഞ്ഞതിന് ശേഷം മാത്രമേ പൂർണ്ണമായും ഇതിലേക്ക് ഇറങ്ങി തിരിക്കാൻ പാടുള്ളൂ. വാരാന്ത്യ സമയം അല്ലെങ്കിൽ ഒഴിവു സമയം സമാന്തരമായി കൃഷിക്കായി ഉപയോഗിച്ച് തുടക്കമിടുന്നതാവും ഉചിതം. സ്വയം നിലനിൽക്കാൻ കഴിയുന്ന ഒരു സംവിധാനം ഉണ്ടാക്കിയെടുത്തതിന് ശേഷം മാത്രം ഇതിലേക്ക് തിരിയുന്നതിലൂടെ പെട്ടെന്നുള്ള മാറ്റത്തെതുടർന്ന് ഉണ്ടാവാൻ സാധ്യതയുള്ള മടുപ്പും നിരാശയും നഷ്ടവും ഒഴിവാക്കാൻ സാധിക്കും. അഞ്ചു വർഷത്തോളം ജോലി ചെയ്തതിന് ശേഷം കോവിഡിന് ശേഷം മാത്രമാണ് പൂർണ്ണമായും കൃഷിയിലേക്കും ഫുഡ് ഫോറസ്റ്റ് നിർമ്മാണത്തിലേക്കും നീങ്ങുന്നതിനുള്ള തീരുമാനത്തിലേക്കെത്തുന്നത്.

മൂന്നു വർഷങ്ങൾക്കുള്ളിൽ ഫുഡ് ഫോറസ്റ്റ് സ്വയം പര്യാപ്തതയിലെത്തി തുടങ്ങും. പിന്നീട് വളരെ കുറച്ച് ശ്രദ്ധ മാത്രമേ ആവശ്യമായി വരുന്നുള്ളൂ. നിരവധി പ്രോജക്ടുകൾ ഏറ്റെടുത്ത് ഫുഡ് ഫോറസ്റ്റുകൾ നിർമ്മിച്ചു നൽകുന്നുണ്ട്. വളരെ ശാസ്ത്രീയമാണ് ഓരോ ഫുഡ് ഫോറസ്റ്റും നിർമ്മിച്ചുനൽകുന്നത്. ജൈവ വളങ്ങളും കീടനാശിനികളുമാണ് ഉപയോ​ഗിക്കുന്നത്. സ്വന്തമായി നിർമ്മിച്ചെടുക്കുന്ന കമ്പോസ്റ്റും കൃഷിയിടത്തിൽ ഉപയോ​ഗിക്കുന്നു. എന്നാൽ ഇതെല്ലാം ആവശ്യാനുസരണം മാത്രമാണ് പ്രയോ​ഗിക്കുന്നത്. 

മാറുന്ന കാലത്ത് കാർബൺ സീക്വസ്‌ട്രേഷൻ വളരെയധികം പ്രാധാന്യമർഹിക്കുന്നു (ഹരിതഗൃഹ വാതകങ്ങളുടെ അളവ് കുറയ്ക്കുന്നതിനും കാലാവസ്ഥാ വ്യതിയാനത്തെ ചെറുക്കുന്നതിനും വേണ്ടി അന്തരീക്ഷത്തിലെ കാർബൺ ഡൈ ഓക്സൈഡ്  പിടിച്ചെടുത്ത് സംഭരിക്കുന്ന പ്രക്രിയ). അഗ്രോഫോറസ്ട്രി, കവർ ക്രോപ്പിങ്, പോലുള്ള കൃഷിരീതികൾ മണ്ണിന്റെ കാർബൺ സംഭരണവും (സോയിൽ കാർബൺ സീക്വസ്‌ട്രേഷൻ) മണ്ണിന്റെ ആരോഗ്യം മെച്ചപ്പെടുത്തുന്നതിനും സഹായിക്കുന്നു

കാർഷിക ടൂറിസം

കാർഷിക ടൂറിസത്തിന് അനന്ത സാധ്യതകളാണുള്ളത്. അത് പ്രയോജനപ്പെടുത്തുന്നതിലൂടെ വലിയൊരു സമൂഹത്തെ കൃഷിയിലേക്കും ആകർഷിക്കാൻ കഴിയും മാത്രമല്ല കാർഷികവൃത്തിക്കപ്പുറം ഇതൊരു വരുമാനമാർ​ഗമാകുകയും ചെയ്യും. ആളുകൾക്ക് ഒഴിവുസമയം ഇത്തരം ഹരിതവനങ്ങളിൽ ചിലവഴിക്കാൻ വലിയ താത്പര്യമുണ്ട്. മാമ്പഴ ഫെസ്റ്റുകൾക്കൊക്കെ വലിയ പിന്തുണയാണ് ലഭിക്കാറുള്ളത്. കൂടുതൽ വൈവിധ്യങ്ങൾ നിറയ്ക്കുന്നതിലൂടെ കൂടുതൽ ആളുകളെ ആകർഷിക്കാനും സാധിക്കുന്നു. 

വെറുതെ ഫെസ്റ്റുകൾ സംഘടിപ്പിക്കുകയല്ല ചെയ്യുന്നത്, ചെടി നടുന്നതിനെ കുറിച്ചും പരിപാലിക്കുന്നതിനെ കുറിച്ചൊക്കെയും അവബോധം നൽകാറുമുണ്ട്. ഒരിക്കൽ ഒരു ചെറിയകുട്ടി ഫെസ്റ്റ് കഴിയാറായപ്പോൾ കരയുകയായിരുന്നു. കുട്ടിയുടെ അമ്മ വന്ന് അവനൊരു ചെടി കൊടുക്കാമോയെന്നാണ് ചോദിച്ചത്. ഒരു മാവിൻ തൈ നൽകിയപ്പോൾ കുട്ടിയുടെ സന്തോഷം പറഞ്ഞറിയിക്കാൻ സാധിക്കാത്തതായിരുന്നു.

പക്ഷികളെ മരങ്ങളെ കുട്ടികൾ തിരിച്ചറിയുന്നത് വലിയ സന്തോഷമുള്ള കാര്യമാണ്. കുട്ടികൾക്ക് പ്രകൃതിയെ അറിഞ്ഞു വളരുന്നതിനൊരു സാഹചര്യമൊരുക്കുകയെന്നത് വലിയ ഉത്തരവാദിത്വമാണ്. കുട്ടികൾക്ക് ക്യാമ്പ് നടത്തുന്നതും വളരെ രസകരമാണ്. അവർ ഒരുപാട് സംശയങ്ങൾ ചോദിക്കും. പ്രകൃതിയിലെ ഓരോ ചലനവും അവർ അത്ഭുതത്തോടെ യാണ് വീക്ഷിക്കുന്നത്. വരും തലമുറകളിലേക്കും മണ്ണിനെയും പ്രകൃതിയെ അറിയുന്നതിനും സംരക്ഷിക്കുന്നതിനും വലിയ മാറ്റങ്ങളുടെ പാത കൂടി തുറക്കുകയാണ് ചെയ്യുന്നത്. ഇത് വലിയൊരു ഉദ്യമമാണ്. കുട്ടികൾ പ്രകൃതിയെ തൊട്ടറിഞ്ഞ് വളരണം. ഓരോ വൃക്ഷത്തിന്റെയും ഫലത്തിന്റെയും ചെടികളുടെയും കിളികളുടെയും മൃ​ഗങ്ങളുടെയും എല്ലാം പേരും സവിശേഷതകളും മനസിലാക്കി വളരണം. എങ്കിൽ മാത്രമേ അവർക്ക് നല്ലൊരു ബാല്യം ഉണ്ടാകുകയുള്ളൂ.

ഇന്ത്യയിലെ കൃഷി രീതിയിൽ 90 ശതമാനവും പരാജയമാണെന്നതാണ് യാഥാർത്ഥ്യം. കർഷകർ പ്രയാസപ്പെടുകയാണ്. ഒരൊറ്റവിള മാത്രം കൃഷി ചെയ്യുന്നതാണ് ഇതിന് പിന്നിൽ. വൈവിധ്യവത്കരണമാണ് ഉചിതമായ പരിഹാരം. ഒരു ഫുഡ് ഫോറസ്റ്റിൽ എപ്പോഴും എന്തെങ്കിലുമൊക്കെ കഴിക്കാനുണ്ടാകും. സ്വയം പര്യാപ്തരാകുകയെന്നതാണ് ഫുഡ് ഫോറസ്റ്റിന്റെ ആധാരം. ഇതുകൊണ്ട് കൃഷിയുടെ മുഖം മൊത്തത്തിൽ മാറുമെന്നല്ല. ഉത്പന്നങ്ങളുടെ ബാഹുല്യം ഉണ്ടായാൽ വില കുറയും. അല്ലെങ്കിൽ കയറ്റുമതി പോലുള്ള മാർ​ഗങ്ങളിലേക്ക് കടക്കണം. വിപണിക്കനുസൃതമായി ചിന്തിക്കാൻ സാധിക്കുന്നിടത്താണ് വിജയം.

അൻപതിനായിരത്തിലധികം മരങ്ങൾ നട്ടിട്ടുണ്ട്. അഞൂറിലധികം ചെറുതും വലുതുമായ ഫുഡ് ഫോറസ്റ്റുകൾ രാജ്യത്തിനകത്തും പുറത്തുമായി സജ്ജമാക്കിയിട്ടുണ്ട്. ലോകം മുഴുവൻ ചുറ്റി നടന്ന് മരങ്ങൾ നടണമെന്നാണ് ആ​ഗ്രഹം. തരിശുഭൂമികൾ ഹരിതവനമാക്കണം. കൃഷി വെല്ലുവിളി നിറഞ്ഞ മേഖലയാണ്. സംയോജിത രീതിയാണ് ഇവിടെ സ്വീകരിക്കേണ്ടത്. ഇവിടെ വർക് ഷോപ്പുകൾ നടത്താറുണ്ട്, ഫുഡ് ഫോറസ്റ്റിലെ ഉത്പന്നങ്ങൾ വിൽക്കാറുണ്ട്, ഫുഡ് ഫോറസ്റ്റുകൾ ആളുകൾക്ക് നിർമ്മിച്ചു നൽകാറുണ്ട്. ഇത്തരത്തിൽ സംയോജിത രീതി പിന്തുടർന്നാൽ മാത്രമേ വിജയകരമായി കൃഷി മുന്നോട്ടുകൊണ്ടുപോകാൻ സാധിക്കുകയുള്ളൂ.