പുല്പള്ളി : ഒരു നാടിന്റെ നന്മയുടെപ്രകാശമാണ് അമ്മിണിയമ്മയുടെ വീട്ടിൽ തെളിഞ്ഞുകാണുന്നത്. വൈദ്യുതീകരിക്കാത്ത വീട്ടിൽ ഒറ്റയ്ക്ക് താമസിക്കുന്ന പ്രായമായ അമ്മിണിയമ്മയുടെ വീട് വൈദ്യുതീകരിച്ച് നൽകിയിരിക്കുകയാണ് പെരിക്കല്ലൂർ പൗരസമിതി. മരക്കടവ് പഞ്ഞിമുക്കിലെ ഇടക്കാട്ടുപറമ്പിൽ അമ്മിണിയമ്മ വെളിച്ചമെത്താത്ത വീട്ടിൽ വർഷങ്ങളായി തനിച്ചാണ് താമസം. പഴയ വീട്ടിൽ വയറിങ് നടത്തി വൈദ്യുതി കണക്‌ഷൻ എടുക്കാൻ അമ്മിണിയമ്മയെ സാമ്പത്തിക സ്ഥിതി അനുവദിച്ചില്ല. മണ്ണെണ്ണ വിളക്കിന്റെ വെളിച്ചത്തിൽ കഴിയുന്ന അമ്മിണിയമ്മയുടെ ദുരവസ്ഥയെക്കുറിച്ച് ഗ്രാമപ്പഞ്ചായത്തംഗം ജിഷാ സെബാസ്റ്റ്യനിൽനിന്ന്‌ പറഞ്ഞറിഞ്ഞാണ് പെരിക്കല്ലൂർ പൗരസമിതിയുടെ പ്രവർത്തകർ ഇവരുടെ വീട്ടിലെത്തുന്നത്.

To advertise here,

 

അമ്മിണിയമ്മയുടെ അവസ്ഥ നേരിട്ടുകണ്ട് ബോധ്യമായ പൗരസമിതി പ്രവർത്തകർ ഇവരുടെ വീട്ടിൽ വയറിങ് നടത്തി, വൈദ്യുതി കണക്‌ഷൻ എടുക്കുകൊടുക്കാൻ മുന്നിട്ടിറങ്ങുകയായിരുന്നു. ഇതിനാവശ്യമായ പണം പൗരസമിതിയുടെ പ്രവർത്തകർ ചേർന്നുകണ്ടെത്തി. പൗരസമിതിയുടെ പ്രവർത്തകരായ ഡെനീഷ് ലൂക്കോസും കിഷോർ ലൂയിസും സൗജന്യമായി വയറിങ് ജോലികൾ ചെയ്തുനൽകി. കെ.എസ്.ഇ.ബി. പാടിച്ചിറ സെക്‌ഷൻ ഓഫീസിലെ സബ് എൻജിനിയർ കെ.ജി. വേണുവും ഓവർസീയർ പി.ടി. സാബുവും ഇടപെട്ട് നടപടിക്രമങ്ങൾ വേഗത്തിലാക്കിയതോടെ, അമ്മിണിയമ്മയുടെ വീട്ടിലേക്ക് വൈദ്യുതി കണക്‌ഷനെത്തി. പൗരസമിതി പ്രസിഡന്റ് ജി.ജി. ഗിരീഷ്‌കുമാർ, ട്രഷറർ ഡാമിൻ ജോസഫ്, ഗ്രാമപ്പഞ്ചായത്തംഗം ജിഷാ സെബാസ്റ്റ്യൻ, കെ.എസ്.ഇ.ബി. ജീവനക്കാരായ എം.ജി. ജനീവ്, കെ.എസ്. സന്തോഷ്, സജി ബേബി തുടങ്ങിയവർ നേതൃത്വം നൽകി.