വടകര സബ് ട്രഷറി ഓഫീസിലെ നൂറ്റാണ്ട് പഴക്കമുള്ള നിലവറ തുറന്നു. ഏകദേശം ഒരു മീറ്റര്‍ നീളവും മുക്കാല്‍ മീറ്ററോളം വീതിയുമുള്ള ഇരുമ്പ് അറയാണ് തുറന്നത്. അമൂല്യ വസ്തുക്കള്‍ ഉള്‍പ്പെടെ നിലവറക്കുള്ളില്‍ ഉണ്ടായിരിക്കുമെന്ന് ഏവരും പ്രതീക്ഷിച്ചെങ്കിലും ഒന്നും ഉണ്ടായിരുന്നില്ല. വെള്ളിയാഴ്ച രാവിലെയാണ് ഉദ്യോഗസ്ഥരുള്‍പ്പെടെയുള്ള സംഘം നിലവറ പൊളിച്ച് പരിശോധന നടത്തിയത്.

To advertise here,

ബ്രിട്ടീഷ് ഭരണകാലത്ത് താലൂക്കിന്റ ആസ്ഥാന കേന്ദ്രമായിരുന്നു സബ് ട്രഷറി പ്രവര്‍ത്തിച്ചിരുന്ന കെട്ടിടം. കറന്‍സികളും മറ്റ് വിലപിടിപ്പുള്ള വസ്തുക്കളും സൂക്ഷിക്കുന്നതിനായാണ് ഇത്തരം ഇരുമ്പറകള്‍ നിര്‍മിച്ചിരുന്നത്. പതിറ്റാണ്ടുകള്‍ പഴക്കമുള്ള ഈ നിലവറ ആരും തുറന്നിരുന്നില്ല. താലൂക്ക് ഓഫീസ് ഉള്‍പ്പെടെ പ്രവര്‍ത്തിച്ചിരുന്ന ഈ കെട്ടിടം തീപ്പിടിച്ച് നശിച്ചിരുന്നു. പുതിയ റവന്യു നിര്‍മിക്കുന്നതിന്റ ഭാഗമായി പഴയ കെട്ടിടം പൊളിച്ചു മാറ്റുന്ന പ്രവൃത്തി നടക്കുകയാണ്.

പണ്ട് കാലത്ത് കള്ളന്‍മാരില്‍ നിന്നും രക്ഷനേടാനായി ഇത്തരം ഇരുമ്പറകള്‍ നിര്‍മ്മിച്ച് ഉപയോഗിച്ചിരുന്നതായി അസി. ജില്ലാ ട്രഷറി ഓഫീസര്‍ ടി അബ്ദുള്‍ റഷീദ് പറഞ്ഞു. കോഴിക്കോട് പുതിയറ, വയനാട് വൈത്തിരി, ഇടുക്കി ദേവികുളം ട്രഷറി ഓഫീസുകളില്‍ ഇത്തരം ഭൂഗര്‍ഭ നിലവറ ഉണ്ടായിരുന്നു. തിരുവനന്തപുരത്ത് ട്രഷറി ഡിപ്പാര്‍ട്ട്‌മെന്റിന്റെ പുരാവസ്തു ശേഖരത്തിലേക്ക് ഇത് മാറ്റുമെന്നും അദ്ദേഹം പറഞ്ഞു. വടകര ആര്‍ ഡി ഒ അന്‍വര്‍ സാദത്ത്, പുരാവസ്തു ആര്‍ക്കിയോളജിസ്റ്റ് ജീവ മോള്‍, വടകര സബ് ട്രഷറി ഓഫീസര്‍ അജിത്ത് കുമാര്‍, തഹസില്‍ദാര്‍ ഡി രഞ്ജിത്ത്, വടകര എസ് ഐ വിനീത് കുമാര്‍ തുടങ്ങിയവരുടെ നേതൃത്വത്തിലാണ് നിലവറ തുറന്നത്.