അമ്പലവയൽ : അതിർത്തികടന്നെത്തുന്ന സഞ്ചാരികളെ വരവേൽക്കാൻ കർണാടകത്തിലെ അതിർത്തിഗ്രാമങ്ങൾ ഇക്കുറി നേരത്തേയൊരുങ്ങി. ദേശീയപാതയോരങ്ങളിലും ഉൾനാടൻ ഗ്രാമപ്രദേശങ്ങളിലും പ്രകൃതി ഒരുക്കിയ വർണവിസ്മയം കൺകുളിർക്കെ കാണാം. പൂമ്പാറ്റകൾ പാറിപ്പറക്കുന്ന സൂര്യകാന്തിപ്പാടങ്ങളും കടുംമഞ്ഞയും ഓറഞ്ചും അണിഞ്ഞുനിൽക്കുന്ന ചെണ്ടുമല്ലിത്തോട്ടങ്ങളും കൃഷിയിടങ്ങളിൽ വർണപ്രഭ വിതറുന്നു. പ്രതികൂലകാലാവസ്ഥയും മഴയുടെ കുറവും വഴിമുടക്കിയിട്ടും മണ്ണിൽ പൊന്നുവിളയിക്കുന്ന കർഷകർ പൂക്കൃഷി കൈവിടാൻ തയ്യാറായില്ല.

To advertise here,

വേനൽമഴയുടെ കുറവ് ഉത്പാദനത്തെ ബാധിച്ചു

ഇത്തവണ വേനൽമഴയുടെ കുറവ് പൂക്കളുടെ വലുപ്പത്തെയും വളർച്ചയെയും നേരിയതോതിൽ ബാധിച്ചിട്ടുണ്ട്. പൂക്കൾക്ക് വിചാരിച്ചത്ര വലുപ്പമില്ലെന്ന സങ്കടം കർഷകർ പങ്കുവെക്കുന്നു. എന്നാൽ, ഒരു ചെണ്ടുമല്ലിച്ചെടിയിൽനിന്ന് ശരാശരി മൂന്നുകിലോവരെ പൂക്കൾ ലഭിക്കുമെന്ന പ്രതീക്ഷയിലാണ്. വരുംദിവസങ്ങളിൽ മഴ ലഭിച്ചാൽ വിളവെടുപ്പ് കൂടുതൽ മെച്ചപ്പെടുമെന്നാണ് കർഷകരുടെ കണക്കുകൂട്ടൽ. ചിങ്ങപ്പുലരിയിൽ മലയാളിമനസ്സുകളിൽ ഓണത്തുടിപ്പുകളുണരുമ്പോൾ, അത്തപ്പൂക്കളങ്ങൾക്ക് ചന്തംചാർത്താനുള്ള വലിയൊരുപങ്ക് പൂക്കളും കർണാടകത്തിലെ ഈ സുന്ദരഗ്രാമങ്ങളിൽനിന്നാവും കേരളത്തിലെത്തുക. പച്ചപ്പുതച്ച മലനിരകൾക്കിടയിലെ ഈ വർണപ്പൂക്കളുടെ ദൃശ്യവിരുന്ന് ഇതിനകംതന്നെ യാത്രാപ്രേമികളുടെയും വഴിയാത്രക്കാരുടെയും മനം കവർന്നുകഴിഞ്ഞു.

കണ്ണഞ്ചിപ്പിക്കും സൂര്യകാന്തിപ്പാടങ്ങൾ

പൂക്കളുടെ വിപണിയിൽ സൂര്യകാന്തിക്കുതന്നെയാണ് ഇക്കുറിയും പ്രിയം കൂടുതൽ. എന്നാൽ, ഈ മഞ്ഞവസന്തത്തിന്റെ വിളവെടുപ്പിനായി ഇനിയും ഒരു മാസത്തോളം കാത്തിരിക്കേണ്ടതുണ്ട്. നിലവിൽ ഒരു സൂര്യകാന്തിപ്പൂവിന് 40 മുതൽ 50 രൂപ വരെയാണ് കർഷകർക്ക് ലഭിക്കുന്ന വിപണിവില. ഇവയിൽ ഭൂരിഭാഗവും സൂര്യകാന്തി എണ്ണയുടെ ഉത്പാദനത്തിനായാണ് ഉപയോഗിക്കുന്നത്. കിലോമീറ്ററുകളോളം പരന്നുകിടക്കുന്ന സൂര്യകാന്തിപ്പാടങ്ങൾ കാണാൻ പ്രകൃതിസ്നേഹികളുടെ വലിയതിരക്കാണിവിടെ. സഹകരണസംഘങ്ങളുടെ മേൽനോട്ടത്തിലാണ് ചെണ്ടുമല്ലിക്കൃഷി പുരോഗമിക്കുന്നത്. കർഷകർക്കാവശ്യമായ വിത്തും വളവുമെല്ലാം സംഘങ്ങൾതന്നെയാണ് സൗജന്യമായി നൽകുന്നത്. ചെണ്ടുമല്ലി പൂക്കൾ വിളവെടുക്കുന്ന വേളയിൽ കിലോയ്ക്ക് 10 മുതൽ 11 രൂപ വരെകിട്ടും. തോട്ടങ്ങളിൽനിന്ന് നേരിട്ടുശേഖരിക്കുന്ന പൂക്കൾ പ്രമുഖ പെയിന്റ് കമ്പനികൾക്കാണ് കൈമാറുന്നത്.