കാനഡയിലെ ഒന്റാറിയോയിൽ, പച്ചപ്പു നിറഞ്ഞ വഴികളിലൂടെ ഡ്രൈവ് ചെയ്തു പോകുമ്പോഴാണ് കണ്ണുകൾ ആ കാഴ്ചയിൽ ഉടക്കിയത്! മരങ്ങൾക്കിടയിൽ തികച്ചും അപ്രതീക്ഷിതമായി ചുവന്ന മരുഭൂമി. കേലിഡോണിലെ പ്രശസ്തമായ ഷെൽറ്റ്‌നം ബാഡ്ലാൻഡ്‌സ് (Caledon Cheltenham Badlands) ആയിരുന്നു അത്. മേപ്പിൾ മരങ്ങൾ വർണ്ണ വസന്തം തീർക്കുന്ന കേലിഡോണിലെ പാതയോരത്ത്, ഒരുകാലത്ത് അലയടിച്ച കടലിന്റെ ബാക്കിപത്രമായി നിൽക്കുന്ന ബാഡ്‌ലാൻഡ്‌സ് !

To advertise here,

മനുഷ്യൻ കാൽ കുത്തുന്നതിനും എത്രയോ യുഗങ്ങൾക്കു മുൻപ്, ഈ പ്രദേശം ആഴം കുറഞ്ഞ കടലായിരുന്നുവെന്ന് വിശ്വസിക്കാൻ പ്രയാസം തോന്നി. ഇന്നത്തെ വടക്കേ അമേരിക്ക രൂപപ്പെടുന്നതിനും മുൻപുള്ള 'ഓർഡോവിഷ്യൻ' കാലഘട്ടം! ചുറ്റുമുള്ള മലനിരകളിൽനിന്ന് ഇരുമ്പിന്റെ അംശം കലർന്ന മണ്ണ് പുഴകൾ വഴി ഈ കടലിലേക്ക് ഒലിച്ചിറങ്ങുകയും കാലങ്ങൾകൊണ്ട് കടൽ വറ്റിയപ്പോൾ ഈ ചുവന്ന കളിമൺ പാറക്കെട്ടുകൾ രൂപപ്പെടുകയുമായിരുന്നു.

ആ ചുവന്ന മൺകൂനകളിൽ അവിടെവിടെയായി പച്ചയും ചാരവും കലർന്ന വരകൾ. കടൽ പിൻവാങ്ങിയെങ്കിലും, അടിത്തട്ടിൽ കുടുങ്ങിയ വെള്ളം സുഷിരങ്ങളിലൂടെ പുറത്തേക്ക് ഒഴുകാൻ ശ്രമിച്ചപ്പോൾ മണ്ണിലെ ഇരുമ്പുമായി രാസപ്രവർത്തനത്തിൽ ഏർപ്പെട്ട് ഉണ്ടായ നിറങ്ങളാണ് അത്!

ആ പാറക്കെട്ടുകളിലേക്ക് നോക്കിനിൽക്കുമ്പോൾ, തദ്ദേശീയരായ ഗോത്രവർഗ്ഗക്കാർ പറയുന്ന കഥയാണ് ഓർത്തത്. പണ്ട് തർക്കങ്ങളെല്ലാം മറന്ന് ഗോത്രങ്ങൾ ഒത്തുചേർന്നിരുന്ന ഫലഭൂയിഷ്ഠമായ താഴ്‌വാരമായിരുന്നു ഇത്. എന്നാൽ, ദൈവത്തിന്റെ മുന്നറിയിപ്പുകൾ അവഗണിച്ച് അവർ അവിടെ സ്ഥിരതാമസമാക്കി. വഴക്കുകൾ തുടർന്നപ്പോൾ മനുഷ്യരെ ശിക്ഷിക്കാൻ, ദൈവം ആ ഭൂമിയെ ഒന്നാകെ ഇളക്കിമറിച്ച് വെള്ളവും മരങ്ങളുമില്ലാത്ത വരണ്ട പാറക്കെട്ടുകളാക്കി മാറ്റി എന്നാണ് കഥ.

ഈ അപൂർവ്വ ഭൂവിഭാഗത്തിന് മുകളിലൂടെ നടക്കുമ്പോൾ മനുഷ്യന്റെ ഓരോ കാൽവെപ്പും ഇതിനെ എത്രത്തോളം മുറിവേൽപ്പിക്കുന്നുണ്ടെന്ന് എനിക്ക് മനസ്സിലായി. സന്ദർശകരുടെ തിരക്ക് കാരണം മണ്ണൊലിപ്പ് രൂക്ഷമായതോടെ വർഷങ്ങളോളം ഇവിടം അടച്ചിട്ടിരിക്കുകയായിരുന്നു.