കൊടുങ്ങല്ലൂർ : ഇത് ഒരു നാടിന്റെ മുഴുവൻ ആഗ്രഹവും സ്വപ്നവുമായിരുന്നു…, മാത്രമല്ല 928 ദിവസത്തോളം നീണ്ടുനിന്ന പോരാട്ടവീര്യത്തിന്റെ പൂർത്തീകരണവും.

To advertise here,

ചന്തപ്പുര-കോട്ടപ്പുറം ബൈപാസിലെ സി.ഐ. ജങ്ഷനിൽ അതിവേഗത്തിൽ നിർമാണം ആരംഭിച്ച അടിപ്പാതയുടെ ഒരുഘട്ടം പൂർത്തിയായി. അടിപ്പാതയിലൂടെ വാഹനങ്ങൾക്കും കാൽനടയാത്രികർക്കും റോഡ് മുറിച്ച് കടക്കാനാകുന്ന റോഡിന്റെ മെറ്റലിങ് ശനിയാഴ്ചയോടെ പൂർത്തിയായി.

 

ജില്ലയിലെ ആറുവരിപ്പാത നിർമാണം 92 ശതമാനവും പൂർത്തിയായ ഘട്ടത്തിലാണ് അടിപ്പാത അനുവദിച്ചതും അതിവേഗത്തിൽ നിർമാണം ആരംഭിച്ച് രണ്ടരമാസം കൊണ്ട് പൂർത്തിയാക്കിയതും.

ആറുവരിപ്പാത നിർമാണം ആരംഭിച്ചതോടെയാണ് നിലവിലുണ്ടായിരുന്ന സിഗ്നൽ ജങ്ഷൻ അടച്ചുകെട്ടാൻ നീക്കം തുടങ്ങിയത്. ജങ്ഷനു വടക്ക് ചന്തപ്പുരയിൽ മേൽപ്പാലവും തെക്ക് അടിപ്പാതയും നിർമാണം പൂർത്തിയായതോടെ സി.ഐ. ജങ്ഷൻ പൂർണമായും അടച്ച് റോഡ് നിർമാണം പൂർത്തിയാക്കാനായിരുന്നു നീക്കം. എലിവേറ്റഡ് ഹൈവേ കർമസമിതി 928 ദിവസമാണ് ദേശീയപാതയോരത്ത് പന്തൽകെട്ടി സായാഹ്നധർണയും മറ്റ് സമരങ്ങളും നടത്തിയത്. ഇതിനിടയിൽ ജങ്ഷൻ ഒഴിച്ചിട്ട് മറ്റ് ഭാഗങ്ങളിൽ നിർമാണം പൂർത്തിയാക്കി റോഡ് ഗതാഗതത്തിന് തുറന്നുകൊടുത്തിരുന്നു.

കഴിഞ്ഞ ജൂണിൽ അടിപ്പാത അനുവദിച്ചുവെങ്കിലും ഒാഗസ്റ്റ് ആറിനാണ് നിർമാണം ആരംഭിച്ചത്. അടിപ്പാതയിലൂടെ വാഹനങ്ങൾ കടന്നുപോയിത്തുടങ്ങിയെങ്കിലും മുകൾഭാഗം നിർമാണം പൂർത്തിയായിട്ടില്ല. 7.5 മീറ്റർ വീതിയിലും നാലു മീറ്റർ ഉയരത്തിലുമാണ് അടിപ്പാത പൂർത്തിയായത്.