ക്ഷിണ കൊറിയയുടെ ADD വികസിപ്പിച്ചെടുത്ത അഞ്ചാമത്തെ കൊറിയ സാറ്റലൈറ്റ് 425 എന്ന പേലോഡ് റോക്കറ്റ് വിജയകരമായി വിന്യസിച്ചു. ഈ ഉപഗ്രഹം സൈനിക നിരീക്ഷണത്തിനായി രൂപകല്പ്പന ചെയ്തതാണ്.
ബാന്ഡ്വാഗണ്-4 വിക്ഷേപണം | Photo - SpaceX
ചരിത്രത്തിലെ ആദ്യ സ്വകാര്യ ബഹിരാകാശ നിലയം യാഥാര്ഥ്യമാക്കുന്നതില് ഒരുപടികൂടി മുന്നോട്ടുവെച്ച് ഇലോണ് മസ്കിന്റെ എയ്റോസ്പേസ് കമ്പനി സ്പേസ് എക്സ്. 18 ഉപഗ്രഹങ്ങളെ ഭ്രമണപഥത്തില് എത്തിച്ചുകൊണ്ട് സ്പേസ്എക്സിന്റെ ഫാല്ക്കണ് 9 റോക്കറ്റ് ഞായറാഴ്ച പുലര്ച്ചെ (പ്രാദേശിക സമയം) വിജയകരമായി വിക്ഷേപിച്ചു. സ്വകാര്യ ബഹിരാകാശ നിലയം സ്ഥാപിക്കുന്നതിലെ ഒരു സുപ്രധാന ചുവടുവെപ്പായിരുന്നു ഈ വിക്ഷേപണം.
ബാന്ഡ്വാഗണ്-4 എന്ന് പേരിട്ടിരിക്കുന്ന ഈ ദൗത്യം ഫ്ളോറിഡയിലെ കേപ് കനാവറല് സ്പേസ് ഫോഴ്സ് സ്റ്റേഷനില് നിന്നാണ് കുതിച്ചുയര്ന്നത്. അമേരിക്കന് ബഹിരാകാശ കമ്പനിയായ വാസ്റ്റ് സ്പേസ് വികസിപ്പിച്ച ഹേവന് ഡെമോ ആയിരുന്നു ഭ്രമണപഥത്തില് എത്തിച്ചവയില് ഒന്ന്. ബഹിരാകാശത്ത് ഫ്ളൈറ്റ് കമ്പ്യൂട്ടര്, നാവിഗേഷന് തുടങ്ങിയ പ്രധാന സംവിധാനങ്ങളുടെ പ്രകടനം പരീക്ഷിക്കുക എന്നതാണ് ഇതിലൂടെ ലക്ഷ്യമിടുന്നത്. 2026-ന്റെ മധ്യത്തില് വാസ്റ്റ് സ്പേസിന്റെ 'ഹേവന്-1' എന്ന സ്വകാര്യ ബഹിരാകാശ നിലയം വിക്ഷേപിക്കാനുള്ള കമ്പനിയുടെ പ്രധാന പദ്ധതിയിലേക്കുള്ള ഒരു സുപ്രധാന ചുവടുവെപ്പാണ് ഈ പരീക്ഷണം.
ദൗത്യം ലക്ഷ്യംകാണുകയാണെങ്കില് ഒരേ സമയം നാല് ബഹിരാകാശയാത്രികരെ ഉള്ക്കൊള്ളാന് ശേഷിയുള്ള ലോകത്തിലെ ആദ്യത്തെ വാണിജ്യ ബഹിരാകാശ നിലയമായിരിക്കും ഹേവന്-1. ബഹിരാകാശ വാണിജ്യവത്കരണ രംഗത്ത് അമേരിക്കയ്ക്ക് ഇതൊരു ചരിത്രപരമായ നാഴികക്കല്ലായി മാറും. റിസോര്ട്ടിലേതിന് സമാനമായ ഉള്വശമായിരിക്കും ഹേവന്-1 ല് ഉണ്ടായിരിക്കുക എന്നതരത്തിലുള്ള വാര്ത്തകള് പുറത്തുവന്നിട്ടുണ്ട്. വിശ്രമമുറികള്, ഓണ്ബോര്ഡ് വൈഫൈ എന്നിവ എപ്പോഴും ലഭ്യമാകും. സഞ്ചാരികള്ക്ക് ഭൂമിയുടെ ചിത്രം പകര്ത്താനുള്ള പ്രത്യേക സൗകര്യങ്ങള് ഉണ്ടാകുമെന്നും റിപ്പോര്ട്ടുകള് പുറത്തുവന്നിരുന്നു.
ഹേവന് ഡെമോയ്ക്കൊപ്പം ഫാല്ക്കണ് 9 റോക്കറ്റില് മറ്റ് രാജ്യങ്ങളുടെയും കമ്പനികളുടെയും നിരവധി ഉപഗ്രഹങ്ങളും ഉള്പ്പെട്ടിരുന്നു. ദക്ഷിണ കൊറിയയുടെ ഏജന്സി ഫോര് ഡിഫന്സ് ഡെവലപ്മെന്റ് (ADD), ബെര്ലിനിലെ എക്സോലോഞ്ച്, തുര്ക്കിയുടെ ഫെര്ഗാനി സ്പേസ്, അമേരിക്കന് കാലാവസ്ഥാ പ്രവചന കമ്പനിയായ ടുമാറോ കമ്പനീസ്, സ്റ്റാര്ക്ലൗഡ് എന്നിവ ഇതില് ഉള്പ്പെടുന്നു.
എന്വിഡിയ H100 എഐ ചിപ്പ് ഘടിപ്പിച്ചതാണ് സ്റ്റാര്ക്ലൗഡിന്റെ ഉപഗ്രഹം. ബഹിരാകാശത്ത് ഒരു ആര്ട്ടിഫിഷ്യല് ഇന്റലിജന്സ് (AI) അധിഷ്ഠിത ഡാറ്റാ സെന്റര് സ്ഥാപിക്കാന് സാധിക്കുമോ എന്ന് പരീക്ഷിക്കുകയാണ് ഇതിന്റെ ലക്ഷ്യം. അതിനിടെ, വിക്ഷേപിച്ച് ഏകദേശം 12 മിനിറ്റിനുശേഷം ദക്ഷിണ കൊറിയയുടെ ADD വികസിപ്പിച്ചെടുത്ത അഞ്ചാമത്തെ കൊറിയ സാറ്റലൈറ്റ് 425 എന്ന പേലോഡ് റോക്കറ്റ് വിജയകരമായി വിന്യസിച്ചു. ഈ ഉപഗ്രഹം സൈനിക നിരീക്ഷണത്തിനായി രൂപകല്പ്പന ചെയ്തതാണ്. അതിന്റെ രഹസ്യ സ്വഭാവം കണക്കിലെടുത്ത്, സ്പേസ്എക്സ് തത്സമയ സംപ്രേഷണം പിന്നീട് നിര്ത്തിവച്ചു.
ഹേവന് ഡെമോ ഉപഗ്രഹം വിജയകരമായി ഭ്രമണപഥത്തില് സ്ഥാപിച്ചതിനാല് ദൗത്യത്തിന്റെ അടുത്ത ഘട്ടം സാങ്കേതിക പരിശോധനകളില് ശ്രദ്ധ കേന്ദ്രീകരിക്കുമെന്നാണ് പുറത്തുവരുന്ന വിവരം. ഹേവന് ഡെമോ ബഹിരാകാശത്ത് എങ്ങനെ സഞ്ചരിക്കുന്നു, അതിലെ കമ്പ്യൂട്ടറുകള് എത്രത്തോളം കാര്യക്ഷമമായി പ്രവര്ത്തിക്കുന്നു, നാവിഗേഷന് സംവിധാനം എത്രത്തോളം കൃത്യത പാലിക്കുന്നു എന്നിവ എഞ്ചിനീയര്മാര് പരിശോധിക്കും. വരാനിരിക്കുന്ന ഹേവന് 1 ബഹിരാകാശ നിലയത്തിന്റെ വിക്ഷേപണത്തിന് മുമ്പായി എല്ലാ സംവിധാനങ്ങളും പൂര്ണ്ണമായും തയ്യാറാണെന്ന് ഈ പരിശോധനകളുടെ ഫലങ്ങള് ഉറപ്പുവരുത്തും.
Content Highlights: SpaceX`s Falcon 9 successfully launched 18 satellites, including Vast Space`s Haven Demo for private space station tests and an AI data center experiment. Explore the future of commercial space.
Published: 04 Nov 2025, 06:19 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented