‍ആപ്പിളിന്റെ ഏറ്റവും പുതിയ സ്മാർട്ട്ഫോണുകളായ ഐഫോൺ 18 പ്രോ (iPhone 18 Pro), ഐഫോൺ 18 പ്രോ മാക്സ് (iPhone 18 Pro Max) എന്നിവയുടെ വിൽപന ആരംഭിച്ചതോടെ രാജ്യത്തെ ആപ്പിൾ സ്റ്റോറുകൾക്ക് മുന്നിൽ വൻ ജനത്തിരക്ക്. സെപ്റ്റംബർ 18-ന് രാവിലെ എട്ടു മണിയോടെയാണ് റീട്ടെയിൽ വിൽപന ആരംഭിച്ചത്. ന്യൂഡൽഹിയിലെ സാകേത്, നോയിഡ, മുംബൈയിലെ ബികെസി, ബോറിവലി, പുണെയിലെ കോറെഗാവ് പാർക്ക്, ബെംഗളൂരുവിലെ ഹെബ്ബാൾ എന്നിവിടങ്ങളിലെ ആപ്പിൾ സ്റ്റോറുകൾക്ക് മുന്നിൽ പുലർച്ചെ മുതൽ തന്നെ ആളുകളുടെ നീണ്ട ക്യൂ പ്രത്യക്ഷപ്പെട്ടു.

To advertise here,

രാത്രിമുഴുവൻ സ്റ്റോറുകൾക്ക് മുന്നിൽ ഉറക്കമൊഴിച്ച് കാത്തിരുന്നവരും ഇക്കൂട്ടത്തിലുണ്ട്. ബെംഗളൂരുവിലെ സ്റ്റോറിന് മുന്നിൽ പുലർച്ചെ അഞ്ചു മണിക്ക് തന്നെ ഉപഭോക്താക്കൾ എത്തിത്തുടങ്ങിയിരുന്നു. ഫോൺ വാങ്ങാനായി ഹരിയാണ, ഡൽഹി, മുംബൈ, പഞ്ചാബ് തുടങ്ങിയ സ്ഥലങ്ങളിൽനിന്നുപോലും ആളുകൾ യാത്ര ചെയ്ത് എത്തിയതായി റിപ്പോർട്ടുകളുണ്ട്.

ഒന്നര ലക്ഷത്തിലേറെ വിലയുള്ളതാണ് ഐഫോൺ 18 പ്രോ മോഡലുകൾ. ഇന്ത്യയിൽ ഐഫോൺ 18 പ്രോയുടെ 256 ജിബി മോഡലിന് 1,64,900 രൂപ മുതലാണ് വില ആരംഭിക്കുന്നത്. ഇതിന്റെ 512 ജിബി വേരിയന്റിന് 1,89,900 രൂപയും, ഒരു ടിബി വേരിയന്റിന് 2,39,900 രൂപയും, ഉയർന്ന രണ്ടു ടിബി വേരിയന്റിന് 3,14,900 രൂപയുമാണ് വില. ഐഫോൺ 18 പ്രോ മാക്സിന്റെ 256 ജിബി മോഡലിന് 1,79,900 രൂപ മുതലാണ് വില തുടങ്ങുന്നത്. ബർഗണ്ടി റെഡ്, ഗ്ലേഷ്യർ, സിൽവർ, ബ്ലാക്ക് എന്നീ നാല് ആകർഷകമായ നിറങ്ങളിൽ ഈ മോഡലുകൾ ലഭ്യമാണ്.

കഴിഞ്ഞ വർഷത്തേക്കാൾ കൂടിയ വിലയിലാണ് ഇത്തവണ ആപ്പിൾ ഐഫോൺ 18 പ്രോ എത്തിയിരിക്കുന്നത്. 2025-ൽ പുറത്തിറങ്ങിയ ഐഫോൺ 17 പ്രോയുടെ വില 256 ജിബി മോഡലിന് 1,34,900 രൂപ ആയിരുന്നുവെങ്കിൽ, 18 പ്രോയിൽ 1,64,900 രൂപയിലെത്തി. കഴിഞ്ഞ വർഷം 17 പ്രോ മാക്സ് വിറ്റതിനേക്കാൾ കൂടിയ വിലയ്ക്കാണ് ഇത്തവണ 18 പ്രോ വിൽക്കുന്നത് എന്നത് ശ്രദ്ധേയമാണ്. ഐഫോണുകൾക്ക് പൊതുവിലുണ്ടായ ഈ വിലവർധന ആരാധകരെ ഒട്ടും ബാധിച്ചിട്ടില്ല എന്ന് വ്യക്തമാക്കുന്നതാണ് ആപ്പിൾ സ്റ്റോറുകൾക്ക് മുന്നിലെ ഈ ജനത്തിരക്ക്.