ന്യൂയോർക്ക്: യുഎസ് ഓപ്പണിൽ ആദ്യ റൗണ്ടിൽ അട്ടിമറി ഭീഷണി മറികടന്ന് ജർമനിയുടെ ഒന്നാം സീഡ് അലക്‌സാണ്ടർ സ്വെരെവ്. ആർതർ ആഷെ സ്റ്റേഡിയത്തിൽ നടന്ന മത്സരത്തിൽ ഇറ്റലിയുടെ ലോറെൻസോ സോനെഗോയെ അഞ്ച് സെറ്റ് നീണ്ട കടുത്ത പോരാട്ടത്തിലാണ് ജർമൻ താരം പരാജയപ്പെടുത്തിയത്. ഒന്നിനെതിരെ രണ്ട് സെറ്റുകൾക്ക് പിന്നിലായ ശേഷമാണ് സ്വെരെവ് ഉജ്ജ്വലമായി മത്സരത്തിലേക്ക് തിരിച്ചെത്തിയത്. നാല് മണിക്കൂറിലേറെ നീണ്ടുനിന്ന മാരത്തൺ മത്സരത്തിൽ 6-4, 3-6, 6-7 (7), 6-4, 6-3 സ്‌കോറിനായിരുന്നു താരത്തിന്റെ ജയം.

To advertise here,

സോനെഗോയ്‌ക്കെതിരെ ഇതിനുമുമ്പ് കളിച്ച ആറ് മത്സരങ്ങളിലും വിജയിച്ച മികച്ച റെക്കോഡുമായാണ് സ്വെരെവ് കോർട്ടിലിറങ്ങിയത്. എന്നാൽ, കളി ആരംഭിച്ച് ഇറ്റാലിയൻ താരം താളം കണ്ടെത്തിയതോടെ സ്വെരെവ് പ്രതിരോധത്തിലായി. അറ്റാക്കിങ് ബേസ്ലൈൻ കളിയും ശക്തമായ സെർവുകളും കൊണ്ട് സോനെഗോ, ജർമൻ താരത്തെ പരീക്ഷിച്ചു. ആദ്യ സെറ്റ് 6-4 ന് സ്വെരെവ് നേടിയെങ്കിലും, രണ്ടാം സെറ്റ് 6-3 ന് സ്വന്തമാക്കി സോനെഗോ തിരിച്ചടിച്ചു. ആവേശം നിറഞ്ഞ മൂന്നാം സെറ്റിലെ കടുത്ത ടൈബ്രേക്കർ പോരാട്ടത്തിനൊടുവിൽ വിജയം കണ്ടതോടെ സോനെഗോ മത്സരത്തിൽ ഒന്നിനെതിരെ രണ്ട് സെറ്റുകൾക്ക് മുന്നിലെത്തുകയും അട്ടിമറിയുടെ വക്കിലെത്തുകയും ചെയ്തു.

എന്നാൽ നാലാം സെറ്റിൽ ശക്തമായ ആക്രമണം പുറത്തെടുത്ത സ്വെരെവ് മികച്ച ഗ്രൗണ്ട്‌സ്‌ട്രോക്കുകളിലൂടെ സെറ്റ് സ്വന്തമാക്കി. ഒടുവിൽ അഞ്ചാം സെറ്റ് 6-3 ന് സ്വന്തമാക്കി സ്വെരെവ് രണ്ടാം റൗണ്ടിൽ കടക്കുകയായിരുന്നു. ഇതോടെ 2002-ന് ശേഷം യുഎസ് ഓപ്പണിന്റെ ആദ്യ റൗണ്ടിൽ പുറത്താകുന്ന ആദ്യ പുരുഷ ഒന്നാം സീഡ് താരം എന്ന നാണക്കേടിൽ നിന്ന് രക്ഷപ്പെടാൻ സ്വെരെവിനായി.

ഈ വർഷം ഫ്രഞ്ച് ഓപ്പണിൽ തന്റെ ആദ്യ ഗ്രാൻഡ്സ്ലാം കിരീടം നേടിയ 29-കാരനായ സ്വെരെവ്, വിംബിൾഡൺ ഫൈനലിലും എത്തിയിരുന്നു. കരിയറിലെ രണ്ടാമത്തെ ഗ്രാൻഡ്സ്ലാം കിരീടവും ആദ്യ യുഎസ് ഓപ്പൺ കിരീടവുമാണ് താരം ഇപ്പോൾ ലക്ഷ്യമിടുന്നത്.