ന്യൂഡൽഹി: ലോക ബാഡ്മിന്റൺ ചാമ്പ്യൻഷിപ്പിന്റെ ആദ്യ റൗണ്ട് അനായാസം കടന്ന് ഇന്ത്യയുടെ പി.വി സിന്ധു. വനിതാ സിംഗിൾസിൽ അയർലൻഡിന്റെ സോഫിയ നോബ്‌ളിനെ നേരിട്ടുള്ള ഗെയിമുകൾക്ക് ഇന്ത്യൻ താരം കീഴടക്കി. ലോകറാങ്കിങ്ങിൽ 141-ാം സ്ഥാനക്കാരിയായ സോഫിയയ്ക്ക് ഒരു ഘട്ടത്തിൽപോലും 11-ാം റാങ്കുകാരിയായ സിന്ധുവിന് വെല്ലുവിളിയുയർത്താനായില്ല. സ്‌കോർ: 21-7, 21-11.

To advertise here,

നേരത്തെ പുരുഷ, വനിതാ ഡബിൾസിൽ ഇന്ത്യൻ താരങ്ങൾ ആദ്യ റൗണ്ടിൽ വിജയിച്ചിരുന്നു. വനിതാ ഡബിൾസിൽ ഗായത്രി ഗോപീചന്ദ്-ട്രീസാ ജോളി സഖ്യം സ്പാനിഷ് ജോഡിയായ പൗലാ ലോപസ്-ലൂസിയ റോഡ്രഗസ് സഖ്യത്തെ നേരിട്ടുള്ള ഗെയിമുകൾക്ക് തറപറ്റിച്ചു. സ്‌കോർ: 21-9, 21-13.

പുരുഷ ഡബിൾസിൽ ഹരിഹരൻ-എം.ആർ അർജുൻ സഖ്യം ഐറിഷ് ജോഡിയെ മറികടന്നാണ് രണ്ടാം റൗണ്ടിലെത്തിയത്. ആദ്യ ഗെയിം ഇന്ത്യൻ സഖ്യം 21-16-ന് നേടിയിരുന്നു. രണ്ടാം ഗെയിമിൽ ഇന്ത്യ 6-4ന് മുന്നിട്ടുനിൽക്കെ ഐറിഷ് ജോഡി പിന്മാറുകയായിരുന്നു.