ഗ്ലാസ്‌ഗോ: കോമൺവെൽത്ത് ഗെയിംസ് ജാവലിൻ ത്രോയിൽ വെള്ളി മെഡൽ നേട്ടത്തിന് പിന്നാലെ പ്രതികരിച്ച് ഇന്ത്യൻ താരം നീരജ് ചോപ്ര. പരിക്കിനെ കുറിച്ചുള്ള ആശങ്കകളുണ്ടായിരുന്നുവെന്നും മനസിൽ ഭയമുണ്ടായിരുന്നെന്നും നീരജ് ചോപ്ര വ്യക്തമാക്കി. പരിക്കുകൾ കാരണം ഒരു വർഷത്തോളം നീണ്ട ഇടവേളയ്ക്ക് ശേഷം നീരജിന്റെ കരിയറിലെ ആദ്യ മെഡലാണിത്. സീസണിലെ ഏറ്റവും മികച്ച പ്രകടനവുമായാണ് (85.83 മീറ്റർ) നീരജ് വെള്ളി നേടിയത്.

To advertise here,

'തിരിച്ചുവരവ് മികച്ചതാക്കാൻ കഴിഞ്ഞു. തണുപ്പുള്ള കാലാവസ്ഥ പ്രതികൂലമാകുമെന്ന് കരുതിയിരുന്നു. പോഡിയത്തിൽ തിരിച്ചെത്തിയതിൽ ഒരുപാട് സന്തോഷം തോന്നുന്നു. എന്റെ കഠിനാധ്വാനത്തിന് ഫലം ലഭിച്ചു തുടങ്ങിയിരിക്കുന്നു. ഇനിയും ഒരുപാട് മെച്ചപ്പെടാനുണ്ട്. അടുത്ത മത്സരങ്ങളിൽ മികച്ച പ്രകടനം നടത്താൻ ശ്രമിക്കും. നൂറ് ശതമാനം ഫിറ്റാണെങ്കിൽ ഏത് പ്രതിസന്ധിയേയും അതിജീവിക്കാനുള്ള പോരാട്ടവീര്യം നിങ്ങളിലുണ്ടാകും. എന്നാൽ പരിക്കിന്റെ പിടിയിലാണെങ്കിൽ നിങ്ങൾ ഒരുപാട് ആശങ്കകളിലൂടെ കടന്നുപോകും. നിങ്ങളുടെ മനസിൽ ഭയം തോന്നും. ഇന്നും ഞാൻ ഭയന്നിരുന്നു. ഞാൻ വളരെ വേഗത്തിൽ ഓടാൻ ശ്രമിച്ചില്ല. എന്റെ ശരീരം നിയന്ത്രണത്തിലാകാൻ ഞാൻ ആഗ്രഹിച്ചു.'-നീരജ് വ്യക്തമാക്കി.

ഗ്ലാസ്‌ഗോയിലെ തണുത്ത കാലാവസ്ഥയെ കുറിച്ചും നീരജ് ചൂണ്ടിക്കാട്ടി. അത് മത്സരത്തിൽ പങ്കെടുത്ത എല്ലാവർക്കും ബുദ്ധിമുട്ടുണ്ടാക്കിയെന്നും അദ്ദേഹം കൂട്ടിച്ചേർത്തു. പോഡിയത്തിൽ തിരിച്ചെത്തിയതിൽ സന്തോഷമുണ്ടെങ്കിലും സീസണിലെ മറ്റ് മത്സരങ്ങളിലേക്ക് മുന്നേറുമ്പോൾ കൂടുതൽ മെച്ചപ്പെടുക എന്നതാണ് തന്റെ പ്രധാന ലക്ഷ്യം എന്ന് നീരജ് പറഞ്ഞു.