ആലപ്പുഴ: ആലപ്പുഴ വൈഎംസിഎ ഫ്ലഡ്‌ലിറ്റ് കോർട്ടിൽ നടക്കുന്ന മൂന്നാമത് ജോൺസ് അംബ്രല്ല കാരിക്കാമ്പള്ളിൽ അഡ്വ. കെ.ടി. മത്തായി മെമ്മോറിയൽ ഓൾ കേരള ഇൻവിറ്റേഷൻ ഇന്റർ സ്കൂൾ ബാസ്കറ്റ്ബോൾ ടൂർണമെന്റിന്റെ സെമി ഫൈനൽ പോരാട്ടങ്ങളിൽ തകർപ്പൻ ജയം സ്വന്തമാക്കി കോഴിക്കോട് പ്രൊവിഡൻസ് എച്ച്എസ്എസ്, കോട്ടയം മൗണ്ട് കാർമൽ എച്ച്എസ്എസ്, കോട്ടയം ഗിരിദീപം ബെഥനി എച്ച്എസ്എസ്, കുന്നംകുളം ഗവ. വൊക്കേഷണൽ എച്ച്എസ്എസ് എന്നിവർ ഫൈനലിൽ പ്രവേശിച്ചു. കേരള ബാസ്കറ്റ്ബോൾ അസോസിയേഷന്റെ (KBA) അംഗീകാരത്തോടെ നടക്കുന്ന ടൂർണമെന്റിന്റെ കലാശപ്പോരാട്ടങ്ങൾ നാളെ നടക്കും.

To advertise here,

വനിതാ വിഭാഗം: പ്രൊവിഡൻസിന് തകർപ്പൻ ജയം; മൗണ്ട് കാർമലിന് അവിശ്വസനീയ തിരിച്ചുവരവ്

ആദ്യ വനിതാ സെമിയിൽ നിലവിലെ ചാമ്പ്യന്മാരായ കോഴിക്കോട് പ്രൊവിഡൻസ് എച്ച്എസ്എസ് ഒന്നിനെതിരെ 36 പോയിന്റുകൾക്ക് എറണാകുളം സെന്റ് തെരേസാസിനെ തകർത്തുവിട്ടു (61-36). ആദ്യ ക്വാർട്ടറിൽ സെന്റ് തെരേസാസ് 12-10 ന് നേരിയ ലീഡ് നേടി ഹാഫ് ടൈം വരെ കടുത്ത പോരാട്ടം കാഴ്ചവെച്ചെങ്കിലും രണ്ടാം പകുതിയിൽ പ്രൊവിഡൻസ് കളം പിടിച്ചു. മൂന്നാം ക്വാർട്ടറിലെ 22-10 ന്റെ തകർപ്പൻ മുന്നേറ്റവും, അവസാന ക്വാർട്ടറിൽ എറണാകുളത്തെ വെറും 5 പോയിന്റിൽ ഒതുക്കിയ പ്രതിരോധവുമാണ് പ്രൊവിഡൻസിന് കൂറ്റൻ ജയം സമ്മാനിച്ചത്. 15-ൽ 10 ഷോട്ടുകളും ലക്ഷ്യത്തിലെത്തിച്ച് 21 പോയിന്റും 9 റീബൗണ്ടുകളും നേടിയ അക്ഷരയാണ് പ്രൊവിഡൻസിന്റെ ജയം എളുപ്പമാക്കിയത്.

രണ്ടാം സെമിയിൽ ആവേശം അവസാന നിമിഷം വരെ നീണ്ടുനിന്നു. ഒരു ഘട്ടത്തിൽ 10 പോയിന്റുകൾക്ക് പിന്നിലായിരുന്ന കോട്ടയം മൗണ്ട് കാർമൽ, ശക്തമായ തിരിച്ചുവരവിലൂടെ ലിറ്റിൽ ഫ്ലവർ കോൺവെന്റ് എച്ച്എസ്എസ് കൊരട്ടിയെ 73–64 ന് അട്ടിമറിച്ചു. ആദ്യ ക്വാർട്ടറിൽ 20–16 ന് മുന്നിലെത്തിയ കൊരട്ടി, ആൻ നേടിയ 17 പോയിന്റുകളുടെ കരുത്തിൽ 33–23 എന്ന മികച്ച ലീഡ് സ്വന്തമാക്കിയിരുന്നു.

ഹാഫ് ടൈമിൽ 37–33 ന് പിന്നിലായിരുന്ന മൗണ്ട് കാർമൽ, മൂന്നാം ക്വാർട്ടറിൽ കൊരട്ടിയെ 23–12 ന് പിടിച്ചുകെട്ടി കളി തിരിച്ചുപിടിച്ചു. 28 പോയിന്റും 13 റീബൗണ്ടുകളും 10 സ്റ്റീലുകളും നേടി കോർട്ടിൽ നിറഞ്ഞുകളിച്ച ആമി ജോൺസണാണ് മൗണ്ട് കാർമലിന്റെ വിജയശില്പി. ആകെ 67 റീബൗണ്ടുകൾ സ്വന്തമാക്കിയ മൗണ്ട് കാർമൽ, കൊരട്ടിയുടെ പ്രതിരോധം തകർത്തു. കൊരട്ടി ക്യാപ്റ്റൻ സൂര്യ ഗായത്രി (16 പോയിന്റ്) അവസാന നിമിഷം വരെ പൊരുതിയെങ്കിലും ഡെന്നിയ ഡിമലും ക്യാപ്റ്റൻ അന്നയും ഫ്രീ ത്രോകൾ കൃത്യമായി ലക്ഷ്യത്തിലെത്തിച്ച് മൗണ്ട് കാർമലിന്റെ വിജയം ഉറപ്പിച്ചു.

പുരുഷ വിഭാഗം: സെന്റ് എഫ്രേംസിനെ വീഴ്ത്തി ഗിരിദീപം; സിൽവർ ഹിൽസിനെ തകർത്ത് കുന്നംകുളം

ടൂർണമെന്റിലെ ഏറ്റവും വലിയ അട്ടിമറിക്കാണ് പുരുഷന്മാരുടെ സെമി ഫൈനൽ സാക്ഷ്യം വഹിച്ചത്. കഴിഞ്ഞ വർഷത്തെ ചാമ്പ്യന്മാരും ലോർഡിയം ട്രോഫി ജേതാക്കളുമായ മാന്നാനം സെന്റ് എഫ്രേംസ് എച്ച്എസ്എസിനെ ആവേശപ്പോരാട്ടത്തിൽ 73-68 ന് കീഴ്പ്പെടുത്തി കോട്ടയം ഗിരിദീപം ബെഥനി ഫൈനലിലേക്ക് മാർച്ച് ചെയ്തു. മത്സരത്തിന്റെ ആദ്യ മിനിറ്റുകളിൽ തന്നെ 17-9 ന്റെ ലീഡ് എടുത്ത ഗിരിദീപം, ആകെ 39 മിനിറ്റും 57 സെക്കൻഡും മത്സരത്തിൽ മേധാവിത്വം നിലനിർത്തി.

സെന്റ് എഫ്രേംസ് പെയിന്റിൽ 44 പോയിന്റുകൾ നേടുകയും അവസാന ക്വാർട്ടറിൽ 22 പോയിന്റുകളുടെ അതിശക്തമായ മുന്നേറ്റം നടത്തുകയും ചെയ്തെങ്കിലും, ഗിരിദീപം നേടിയ 9 ത്രീ-പോയിന്റുകളും ഫ്രീ ത്രോകളിലെ കൃത്യതയും അവർക്ക് തുണയായി. ഗിരിദീപത്തിനായി രോഹൻ (26 പോയിന്റ്), അൽബിൻ (20 പോയിന്റ്), അഭിനവ് (14 പോയിന്റ്) എന്നിവർ മികച്ച സ്കോറിങ് നടത്തിയപ്പോൾ, സെന്റ് എഫ്രേംസ് ക്യാപ്റ്റൻ മഷൂദിന്റെ (22 പോയിന്റ്) പോരാട്ടം പാഴായി.

ഫൈനലിൽ ഗിരിദീപം കുന്നംകുളം ഗവ. വൊക്കേഷണൽ എച്ച്എസ്എസിനെ നേരിടും. സെമിയിൽ കോഴിക്കോട് സിൽവർ ഹിൽസ് എച്ച്എസ്എസിനെ 63–44 ന് തകർത്താണ് കുന്നംകുളം ഫൈനലിൽ എത്തിയത്. കളി തുടങ്ങി നിമിഷങ്ങൾക്കകം 13–0 ന്റെ സ്കോറിങ് റൺ നടത്തിയ കുന്നംകുളം ആദ്യ ക്വാർട്ടറിൽ തന്നെ 21–8 ന്റെ വ്യക്തമായ ലീഡ് നേടി.

സിൽവർ ഹിൽസിന്റെ പിഴവുകളിൽ നിന്ന് മാത്രം കുന്നംകുളം 39 പോയിന്റുകൾ വാരിക്കൂട്ടി. രണ്ടാം ക്വാർട്ടറിൽ മുഹമ്മദ് സിനാന്റെ (14 റീബൗണ്ടുകൾ) കരുത്തിൽ സിൽവർ ഹിൽസ് തിരിച്ചുവരവിന് ശ്രമിച്ചെങ്കിലും, കുന്നംകുളം ക്യാപ്റ്റൻ മുഹമ്മദ് ഹാറൂൺ 22 പോയിന്റും 15 റീബൗണ്ടുകളുമായി കളി നിയന്ത്രിച്ചു. അവസാന ക്വാർട്ടറിൽ 19 പോയിന്റും 7 സ്റ്റീലുകളുമായി തകർത്തടിച്ച ആദിൻ കുന്നംകുളത്തിന്റെ 19 പോയിന്റ് മാർജിനിലുള്ള വമ്പൻ ജയം പൂർത്തിയാക്കി.