തിരക്കേറിയ അന്താരാഷ്ട്ര മത്സരക്രമത്തിൽ ഫിഫയ്‌ക്കെതിരേ യൂറോപ്യൻ ഫുട്‌ബോൾ ഫെഡറേഷനുകളും ക്ലബ്ബുകളും കടുത്ത പ്രതിഷേധവുമായി രംഗത്ത്. 16 ദിവസത്തിനിടെ നാല് അന്താരാഷ്ട്ര മത്സരങ്ങൾ കളിക്കേണ്ടി വരുന്ന പുതിയ രീതി കളിക്കാരുടെ ശാരീരികക്ഷമതയെയും ക്ലബ്ബുകളുടെ തുടർച്ചയായ പ്രകടനത്തെയും ഗുരുതരമായി ബാധിക്കുന്നു എന്നാണ് പ്രധാന പരാതി.

To advertise here,

ഈ അന്താരാഷ്ട്ര ഇടവേളയ്ക്കിടെ ഫ്രഞ്ച് സൂപ്പർ താരം കിലിയൻ എംബാപ്പെയ്ക്ക് പരിക്കേറ്റത് റയൽ മാഡ്രിഡ് ക്ലബ്ബിനും ദേശീയ ടീമിനും തിരിച്ചടിയായി. നോർവേയുടെ നാലാം മത്സരത്തിൽ കടുത്ത ക്ഷീണം കാരണം തുടർന്ന് കളിക്കാൻ സാധിക്കാതെ എർലിങ് ഹാളണ്ട് സ്വയം പിന്മാറാൻ ആവശ്യപ്പെടുകയായിരുന്നു. ബെർലിനിൽ നടന്ന യുവേഫ യോഗത്തിൽ പങ്കെടുത്ത ഫെഡറേഷൻ അധികൃതരിൽ പലരും ഈ പുതിയ മത്സരക്രമത്തെ 'ദുരന്തം' എന്നാണ് വിശേഷിപ്പിച്ചത്.

മുമ്പ് സെപ്റ്റംബർ, ഒക്ടോബർ മാസങ്ങളിലായി നടന്നിരുന്ന രണ്ട് വ്യത്യസ്ത ഇടവേളകൾക്ക് പകരം 16 ദിവസത്തെ ഒറ്റ തുടർച്ചയായ ഇടവേളയായാണ് ഫിഫ ഇത് പുനഃക്രമീകരിച്ചത്. 2030 വരെയുള്ള ഫിഫ അന്താരാഷ്ട്ര കലണ്ടറിൽ ഈ രീതി ഉറപ്പിച്ചു കഴിഞ്ഞു. യുവേഫയിലെ 55 അംഗ ഫെഡറേഷനുകളിൽ അസർബൈജാൻ മാത്രമാണ് ഫിഫയുടെ ഈ നടപടിയെ യോഗത്തിൽ പിന്തുണച്ചത്. എന്നാൽ, സൗദി അറേബ്യയിൽ നടന്ന അറേബ്യൻ ഗൾഫ് കപ്പ് പോലുള്ള പ്രാദേശിക ടൂർണമെന്റുകൾക്ക് ഈ നീണ്ട ഇടവേള സഹായകരമാണെന്നാണ് ഫിഫയുടെ നിരീക്ഷണം.

ബൊറൂസിയ ഡോർട്മുണ്ട് പരിശീലകൻ നിക്കോ കോവാച്ച് ഈ നീക്കത്തെ രൂക്ഷമായി വിമർശിച്ചു. കളിക്കാർക്ക് പരിക്കേൽക്കുന്നത് കൂടാതെ, രണ്ടു മുതൽ രണ്ടര ആഴ്ചയോളം ക്ലബ് മത്സരങ്ങളിലെ താളം നഷ്ടപ്പെടുന്നത് ടീമുകളെ വീണ്ടും തുടക്കത്തിൽ നിന്ന് ആരംഭിക്കേണ്ട അവസ്ഥയിലെത്തിക്കുന്നു എന്ന് അദ്ദേഹം വ്യക്തമാക്കി. ചാമ്പ്യൻസ് ലീഗ് കളിക്കുന്ന താരങ്ങൾക്ക് ആവശ്യത്തിന് വിശ്രമം ലഭിക്കാത്തത് 'ക്രൂരമാണ്' എന്ന് നോർവേ പരിശീലകൻ സ്റ്റാലെ സോൾബാക്കൻ ചൂണ്ടിക്കാട്ടി.

ഇന്റർനാഷണൽ ബ്രേക്കിന് ശേഷം മാഞ്ചെസ്റ്റർ സിറ്റിക്കായി പ്രീമിയർ ലീഗിൽ ലിവർപൂളിനെതിരെയും, തൊട്ടുപിന്നാലെ ചാമ്പ്യൻസ് ലീഗിൽ പിഎസ്ജിക്കെതിരെയും ഹാളണ്ടിന് കടുത്ത മത്സരങ്ങൾ നേരിടേണ്ടതുണ്ട്. അടുത്ത അന്താരാഷ്ട്ര മത്സരങ്ങൾ നവംബർ ഒമ്പതു മുതൽ നേഷൻസ് ലീഗ് ഗ്രൂപ്പ് ഘട്ടം പൂർത്തിയാക്കാനായി ആരംഭിക്കും.