മദീര: യുവേഫ നേഷൻസ് ലീഗ് മത്സരത്തിന് മുന്നോടിയായി പോർച്ചൂഗീസ് സൂപ്പർ താരം ക്രിസ്റ്റ്യാനോ റൊണാൾഡോ ദേശീയ ടീമിന്റെ ക്യാമ്പ് വിട്ടത് ഞെട്ടലോടെയാണ് ആരാധകർ കേട്ടത്. പോർച്ചുഗൽ കോച്ച് ജോർജ് ജീസസുമായുണ്ടായ കടുത്ത ഭിന്നതയാണ് അസാധാരണ നീക്കത്തിലേക്ക് റൊണാൾഡോയെ നയിച്ചത്. ജീസസിന്റെ വാർത്താസമ്മേളനത്തിന് പിന്നാലെ താരം പ്രൈവറ്റ് ജെറ്റിൽ പോർച്ചുഗൽ ക്യാമ്പ് വിടുകയായിരുന്നു. അടുത്തുതന്നെ പ്രതികരണം നടത്തുമെന്ന് റോണോ പോസ്റ്റ് ചെയ്തിട്ടുമുണ്ട്. ഇപ്പോഴിതാ സംഭവവുമായി ബന്ധപ്പെട്ട കൂടുതൽ വിവരങ്ങൾ പുറത്തുവരികയാണ്. ജീസസ് വാക്ക് പാലിച്ചില്ലെന്നും അതിന് പിന്നാലെ റൊണാൾഡോയ്ക്ക് ചതിക്കപ്പെട്ടതായി തോന്നിയെന്നും സ്പാനിഷ് മാധ്യമപ്രവർത്തകനും റൊണാൾഡോയുടെ അടുത്ത സുഹൃത്തുമായ എഡു അഗ്വിറെ പറഞ്ഞു.

To advertise here,

ക്രിസ്റ്റ്യാനോ റൊണാൾഡോയെ ജീസസ് വഞ്ചിച്ചതായാണ് എഡു അഗ്വിറെ പറയുന്നത്. നോർവെയ്ക്കെതിരെ 30 മിനിറ്റ് വാം-അപ്പ് ചെയ്യിപ്പിച്ചെങ്കിലും മത്സരത്തിൽ കളിപ്പിച്ചില്ല. പിന്നാലെ ജീസസ് മാപ്പ് പറഞ്ഞിരുന്നുവെന്നും ഡെൻമാർക്കുമായുള്ള മത്സരത്തിന് മുമ്പ് ബുധനാഴ്ച നടക്കുന്ന പത്രസമ്മേളനത്തിലും മാപ്പ് പറയാമെന്ന് വാഗ്ദാനം ചെയ്തിരുന്നുവെന്നും അഗ്വിറെ വിശദീകരിക്കുന്നു. എന്നാൽ പകരം അദ്ദേഹം തന്റെ അധികാരം കാട്ടാനാണ് ശ്രമിച്ചത്, നൽകിയ വാക്ക് പാലിക്കുകയും ചെയ്തില്ലെന്നും അദ്ദേഹം പറഞ്ഞു.

"ചൊവ്വാഴ്ച രാത്രി ഫെഡറേഷൻ പ്രസിഡന്റും പരിശീലകനും ക്രിസ്റ്റ്യാനോയും തമ്മിൽ ഒരു യോഗം നടന്നു. നോർവെയ്ക്കെതിരായ മത്സരത്തിൽ കളിപ്പിക്കാതെ 30 മിനിറ്റ് വാം-അപ്പ് ചെയ്യിപ്പിച്ച് അവഗണിച്ചതിന് ജീസസ് ക്രിസ്റ്റ്യാനോയോട് മാപ്പ് പറഞ്ഞു. അദ്ദേഹം സ്വകാര്യമായി മാപ്പ് പറയുക മാത്രമല്ല ചെയ്തത്, പരസ്യമായി മാപ്പ് പറയാമെന്നും എല്ലാവരുടെയും മുന്നിൽ തന്റെ തെറ്റ് സമ്മതിക്കാമെന്നും വാഗ്ദാനം ചെയ്തിരുന്നു."

"അതായിരുന്നു ജീസസ് ക്രിസ്റ്റ്യാനോയ്ക്ക് നൽകിയ വാക്ക്. എന്നാൽ അദ്ദേഹം പത്രസമ്മേളനത്തിൽ പങ്കെടുക്കുകയും ആരും വിശ്വസിക്കാത്ത ഒരുപാട് നുണകൾ പറയുകയും ചെയ്തു. അതുകൊണ്ടാണ് ക്രിസ്റ്റ്യാനോയ്ക്ക് കടുത്ത ദേഷ്യം വന്നത്, കാരണം താൻ വഞ്ചിക്കപ്പെട്ടതായി അദ്ദേഹത്തിന് തോന്നി. ഇതിന് മറ്റ് കാരണങ്ങളൊന്നുമില്ല." - അഗ്വിറെ വ്യക്തമാക്കി.

"കാര്യങ്ങൾ വളരെ ലളിതമാണ്. നിങ്ങളുടെ പരിശീലകൻ സ്വകാര്യമായി നിങ്ങളുടെ അടുത്ത് വന്ന് പറയുന്നു: 'നോക്കൂ, കാര്യങ്ങൾ ഇങ്ങനെയാണ്, നിങ്ങൾക്കെന്നെ മനസ്സിലാവുമല്ലോ, ശരിയാണ്, ഞാൻ ആ സാഹചര്യം നന്നായി കൈകാര്യം ചെയ്തില്ല, നമ്മൾ ഒരുമിച്ചാണ്, എന്നോട് ക്ഷമിക്കൂ. പത്രസമ്മേളനത്തിൽ ഞാൻ എല്ലാം വ്യക്തമാക്കാം, ഞാൻ മാപ്പ് പറയാം, വിഷമിക്കേണ്ട, എല്ലാം പരിഹരിക്കപ്പെടും.' എന്നിട്ട് നിങ്ങൾ 12 മണിക്കൂറിന് ശേഷം പത്രസമ്മേളനത്തിന് പോയി ‌ക്രിസ്റ്റ്യാനോയെ വെട്ടിലാക്കുന്നു. അതിലും മോശമായി, കാര്യങ്ങൾ നിയന്ത്രിക്കുന്നത് താനാണെന്നും ക്രിസ്റ്റ്യാനോ വെറുമൊരു കളിക്കാരൻ മാത്രമാണെന്നും പറയുകയും ചെയ്യുന്നു. അതുകൊണ്ടാണ് ഞാൻ പറയുന്നത്, അതൊരു വഞ്ചനയാണ്." - അദ്ദേഹം വ്യക്തമാക്കി.

വാർത്താസമ്മേളനത്തിൽ ജീസസ് നടത്തിയ പരാമർശങ്ങളാണ് കാര്യങ്ങൾ കൂടുതൽ വഷളാക്കിയത്. റൊണാൾഡോയുമായി വലിയ പ്രശ്‌നങ്ങളൊന്നുമില്ലെന്നും ഡെൻമാർക്കിനെതിരായ മത്സരത്തിൽ അദ്ദേഹം ആദ്യ ഇലവനിൽ ഉണ്ടാകില്ലെന്നും പകരക്കാരുടെ ബെഞ്ചിലായിരിക്കുമെന്നും ബുധനാഴ്ചത്തെ വാർത്താസമ്മേളനത്തിൽ ജോർജ്ജ് ജീസസ് വ്യക്തമാക്കി. ഗോൺസാലോ റാമോസിനാണ് മുന്നേറ്റത്തിൽ മുൻഗണന നൽകുന്നതെന്നും ആവശ്യമുണ്ടെങ്കിൽ മാത്രമേ റൊണാൾഡോയെ ഇറക്കൂവെന്നും ജീസസ് കൂട്ടിച്ചേർത്തു.

കളിക്കാരെ തിരഞ്ഞെടുക്കുന്നത് പരിശീലകനാണെന്നും ഒരു കളിക്കാരനും തന്റെ തീരുമാനം മാറ്റാൻ നിർബന്ധിക്കാനാകില്ലെന്നും ജീസസ് വ്യക്തമാക്കി. തീരുമാനങ്ങൾ എടുക്കുന്നത് പരിശീലകനാണെന്നും ടീമിലെ നിയമങ്ങൾ എല്ലാവർക്കും ഒരുപോലെയാണെന്നും അദ്ദേഹം കൂട്ടിച്ചേർത്തു. മുൻപ് റൊണാൾഡോയ്ക്കൊപ്പം സൗദി അറേബ്യയിൽ പ്രവർത്തിച്ചിട്ടുള്ള ജീസസ്, തങ്ങൾക്കിടയിൽ വ്യക്തിപരമായ പ്രശ്നങ്ങളൊന്നുമില്ലെന്നും പറഞ്ഞിരുന്നു. ഈ വാർത്താസമ്മേളനത്തിന് തൊട്ടുപിന്നാലെയാണ് റൊണാൾഡോ ക്യാമ്പ് വിട്ടത്.