കൊളംബൊ: ശ്രീലങ്കയ്‌ക്കെതിരായ ടെസ്റ്റ് പരമ്പരയിൽ വിക്കറ്റ് കീപ്പർ ബാറ്റ്‌സ്മാൻ ഋഷഭ് പന്തിന്റെ പരിക്ക് ഇന്ത്യയെ അലട്ടുന്നു. ചുമലിന് പരിക്കേറ്റ പന്ത് രണ്ടാം ടെസ്റ്റിൽ ലങ്കൻ ബാറ്റിങ്ങിനിടെ ഗ്രൗണ്ടിലിറങ്ങിയതേ ഇല്ല. പകരം ധ്രുവ് ജുറെലാണ് കീപ്പറുടെ ജോലി നിർവഹിച്ചത്. പരിക്ക് പൂർണമായി ഭേദമായില്ലെങ്കിൽ തുടർന്നുള്ള രണ്ട് ദിവസങ്ങളിലും പന്തിന് കീപ്പറാവാൻ കഴിയുമോ എന്ന ആശങ്കയിലാണ് ടീം. ബാറ്റിങ്ങിൽ അത്ര പ്രശ്‌നമില്ലെങ്കിലും ഈ പരിക്കും വെച്ച് പന്തിന് വിക്കറ്റ്കീപ്പറാവാൻ കഴിയുമോ എന്ന കാര്യത്തിൽ ടീമിന് ആശങ്കയുണ്ട്.

To advertise here,

പന്തിന്റെ ആരോഗ്യസ്ഥിതി നിരീക്ഷിച്ചുകൊണ്ടിരിക്കുകയാണെന്നാണ് ബൗളിങ് കോച്ച് മോർണി മോർക്കൽ പറഞ്ഞത്. ചൊവ്വാഴ്ച വാംഅപ്പിന് വന്നപ്പോഴും പന്ത് ബുദ്ധിമുട്ട് അനുഭവിച്ചതായും മോർക്കൽ വെളിപ്പെടുത്തി. എന്തായാലും പന്തിനെ പൂർണമായും ടീമിൽ നിന്ന് ഒഴിവാക്കിയേക്കില്ല എന്ന സൂചനയാണ് മോർക്കൽ നൽകിയത്. എന്നാൽ, തുടർന്നും ധ്രുവ് ജുറെൽ തന്നെ വിക്കറ്റ് കീപ്പറുടെ ഉത്തരവാദിത്തം നിർവഹിക്കേണ്ടിവരും എന്നൊരു സൂചനയും ടീമിൽ നിന്ന് ലഭിക്കുന്നുണ്ട്.

രണ്ടാം ടെസ്റ്റിന്റെ ഒന്നാമിന്നങ്‌സിലാണ് പന്തിന് ബാറ്റിങ്ങിനിടെ പരിക്കേറ്റത്. വേദന അധികരിച്ചതിനെ തുടർന്ന് റിട്ടയർ ചെയ്ത പന്ത് പിന്നീട് തിരിച്ചെത്തി 63 റൺസ് നേടുകയും ചെയ്തിരുന്നു. എന്നാൽ, വിക്കറ്റുകൾക്ക് പിറകിൽ എത്തിയില്ല. ധ്രുവ് ജുറെലിനെ പകരക്കാരനായി വിക്കറ്റുകൾ പിറകിൽ ഉപയോഗിക്കുകയാണുണ്ടായത്. ഒന്നാമിന്നിങ്‌സിൽ ഒന്നാന്തരമൊരു സെഞ്ചുറി നേടിയ ജുറെൽ ലങ്കൻ ഇന്നിങ്‌സിൽ ഒരു ക്യാച്ചെടുക്കകയും ചെയ്തിരുന്നു.