വെല്ലിങ്ടൺ: ന്യൂസീലൻഡിനെതിരായ ആദ്യ ക്രിക്കറ്റ് ടെസ്റ്റിൽ അവിശ്വസനീയമായ ക്യാച്ചുമായി തിളങ്ങി ധ്രുവ് ജുറെൽ. കിവീസിന്റെ രണ്ടാമിന്നിങ്‌സിലാണ് ജുറെലിന്റെ ക്യാച്ച് പിറന്നത്. ആദ്യ ഇന്നിങ്‌സിൽ 175 റൺസുമായി തിളങ്ങിയ ഹെൻ​റി  നിക്കോൾസിനെ രണ്ടാമിന്നിങ്‌സിൽ വെറും 31 റൺസിന് മടക്കി. ജുറെലിന്റെ ക്യാച്ച് കണ്ട് മൈതാനത്തുള്ളവരടക്കം അമ്പരന്നു.

To advertise here,

പ്രസിദ്ധ കൃഷ്ണയെറിഞ്ഞ 22-ാം ഓവറിലാണ് സംഭവം. ഓവറിലെ ആദ്യ പന്തിൽ തന്നെ നിക്കോൾസ് പുറത്തായി. പ്രസിദ്ധിന്റെ പന്ത് ലെഗ് സൈഡിലേക്ക് ഷോട്ടടിക്കാനാണ് നിക്കോൾസ് ശ്രമിച്ചത്. എന്നാൽ നിക്കോൾസിന്റെ ശ്രമം വിജയിച്ചില്ല. ബാറ്റിൽ തട്ടിയ പന്ത് മൈതാനത്തുവീഴും മുൻപേ തൊട്ടടുത്ത് ഷോർട്ട് ലെഗിൽ നിലയുറപ്പിച്ച ജുറെൽ കൈപ്പിടിയിലാക്കി. പറന്ന് ഒറ്റക്കൈയ്യിലാണ് ജുറെൽ ക്യാച്ചെടുക്കുന്നത്.

പിന്നാലെ ഇന്ത്യൻ താരങ്ങളെല്ലാം ജുറെലിനെ പൊതിഞ്ഞു. നിക്കോൾസാകട്ടെ അവിശ്വസനീയതയോടെ കളംവിട്ടു. കിവീസിന്റെ രണ്ടാം വിക്കറ്റായിരുന്നു അത്. 59 പന്തിൽ 31 റൺസാണ് നിക്കോൾസെടുത്തത്.

നാലാം ദിനം കളിയവസാനിക്കുമ്പോൾ രണ്ട് വിക്കറ്റ് നഷ്ടത്തിൽ 119 റൺസെന്ന നിലയിലാണ് ന്യൂസീലൻഡ്. രചിൻ രവീന്ദ്രയും (27) അർധസെഞ്ചുറിയുമായി ഡെവോൺ കോൺവേയും (59) ക്രീസിലുണ്ട്. കിവീസ് 245 റൺസ് പിന്നിലാണ്. ഒൻപത് വിക്കറ്റ് നഷ്ടത്തിൽ 720 റൺസെന്ന നിലയിൽ ഇന്ത്യ ആദ്യ ഇന്നിങ്‌സ് ഡിക്ലയർ ചെയ്തിരുന്നു. 352 റൺസിന്റെ ഒന്നാമിന്നിങ്സ് ലീഡാണ് ഇന്ത്യയ്ക്കുള്ളത്.