മഞ്ചേരി: സൂപ്പര്‍ കപ്പ് ഗ്രൂപ്പ് ഡിയിലെ തങ്ങളുടെ ആദ്യ മത്സരത്തില്‍ ചെന്നൈയില്‍ എഫ്‌സിക്ക് ജയം. നോര്‍ത്ത്ഈസ്റ്റ് യുണൈറ്റഡിനെ രണ്ടിനെതിരേ നാല് ഗോളുകള്‍ക്കാണ് ചെന്നൈയിന്‍ തകര്‍ത്തുവിട്ടത്.
റഹീം അലി ഇരട്ട ഗോളുകളുമായി തിളങ്ങിയ മത്സരത്തില്‍ ജൂലിയസ് വിന്‍സന്റ് ഡക്കറും എഡ്വിന്‍ വാന്‍സ്‌പോളും ചെന്നൈയിനായി സ്‌കോര്‍ ചെയ്തു. റോച്ചര്‍സെല, ലാല്‍ഡന്‍മാവിയ റാല്‍തെ എന്നിവരാണ് നോര്‍ത്ത്ഈസ്റ്റിന്റെ സ്‌കോറര്‍മാര്‍.
കളിതുടങ്ങി 17-ാം മിനിറ്റില്‍ തന്നെ റഹീം അലിയിലൂടെ ചെന്നൈയിന്‍ മുന്നിലെത്തി. വഫ ഹക്കാമനേഷി വലത് വിങ്ങില്‍ നിന്ന് നീട്ടിനല്‍കിയ ക്രോസ് ഒന്നാന്തരമൊരു ഹെഡറിലൂടെ അലി വലയിലെത്തിക്കുകയായിരുന്നു.
33-ാം മിനിറ്റില്‍ എഡ്വിന്‍ വാന്‍സ്‌പോളിലൂടെ ചെന്നൈയിന്‍ ലീഡുയര്‍ത്തി. ആകാശ് സാങ്‌വാന്‍ ഹെഡ് ചെയ്ത് നല്‍കിയ പന്ത് എഡ്വിന്‍ ഒരു ഇടംകാലന്‍ വോളിയിലൂടെ വലയിലെത്തിക്കുകയായിരുന്നു.
42-ാം മിനിറ്റില്‍ നോര്‍ത്ത്ഈസ്റ്റിന്റെ മറുപടി ഗോളെത്തി. നോര്‍ത്ത്ഈസ്റ്റ് ക്യാപ്റ്റന്‍ വില്‍മര്‍ ജോര്‍ദാന്‍ പോസ്റ്റിലേക്കടിച്ച പന്ത് ചെന്നൈയില്‍ ഗോള്‍കീപ്പര്‍ സാമിക് മിത്ര തടുത്തിട്ടു, പക്ഷേ റീബൗണ്ട് വന്ന പന്ത് റോച്ചര്‍സെല കൃത്യമായി വലയിലെത്തിക്കുകയായിരുന്നു.
പിന്നാലെ 51-ാം മിനിറ്റില്‍ ജൂലിയസ് വിന്‍സന്റ് ഡക്കറിലൂടെ ചെന്നൈയിന്‍ മൂന്നാം ഗോള്‍ നേടി. ആകാശ് സാങ്‌വാന്‍ എടുത്ത കോര്‍ണറില്‍ നിന്നായിരുന്നു ഡക്കറിന്റെ ഗോള്‍.
നോര്‍ത്ത്ഈസ്റ്റ് മടങ്ങിവരവിന് ശ്രമിക്കവെ 82-ാം മിനിറ്റില്‍ രണ്ടാമതൊരു ഹെഡറിലൂടെ റഹീം അലി ചെന്നൈയിന്റെ ഗോള്‍പട്ടിക തികച്ചു. പിന്നാലെ ഇന്‍ജുറി ടൈമില്‍ മലയാളി താരം എമില്‍ ബെന്നിയുടെ ക്രോസില്‍ നിന്ന് ലാല്‍ഡന്‍മാവിയ റാല്‍തെ നോര്‍ത്ത്ഈസ്റ്റിന്റെ രണ്ടാം ഗോള്‍ നേടി.
Content Highlights: Super Cup 2023 Chennaiyin FC beat NorthEast United FC
Published: 11 Apr 2023, 11:22 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented