ന്യൂജഴ്സി: കോപ്പ അമേരിക്ക ആദ്യ സെമി ഫൈനലില് കാനഡയെ തകര്ത്ത് അര്ജന്റീന ഫൈനലില്. നായകന് ലയണല് മെസ്സി ടൂര്ണമെന്റില് ആദ്യമായി ഗോളടിച്ച മത്സരത്തില് എതിരില്ലാത്ത രണ്ട് ഗോളുകള്ക്കാണ് ലോകചാമ്പ്യന്മാരുടെ ജയം. ആദ്യ പകുതിയില് ജൂലിയന് അല്വാരസും രണ്ടാം പകുതിയില് മെസ്സിയും ഗോള് നേടി. വ്യാഴാഴ്ച പുലര്ച്ചെ നടക്കുന്ന കൊളംബിയ-യുറഗ്വായ് രണ്ടാം സെമി ഫൈനല് വിജയികളെയാണ് ഫൈനലില് നേരിടുക.
22-ാം മിനിറ്റില് മുന്നേറ്റതാരം ജൂലിയന് അല്വാരസാണ് ലോകചാമ്പ്യന്മാരെ മുന്നിലെത്തിച്ചത്. 51-ാം മിനിറ്റില് മെസ്സിയും ഗോള് നേടി. കാനഡയുടെ പ്രതിരോധത്തിലെ പാളിച്ച മുതലെടുത്താണ് രണ്ട് ഗോളുകളും നേടിയത്. കാനഡയ്ക്ക് നിരവധി അവസരങ്ങള് ലഭിച്ചിരുന്നെങ്കിലും ഗോളി എമിലിയാനോ മാര്ട്ടിനസ് രക്ഷകനായി. അര്ജന്റീന പ്രതിരോധവും മികച്ച പ്രകടനം നടത്തി. 4-4-2 ആയിരുന്നു അര്ജന്റീനയുടെ ലൈനപ്പ്. കാനഡയുടേത് 4-2-3-1. ഗ്രൂപ്പ് ഘട്ടത്തില് ഇരുരാജ്യങ്ങളും ഒരുമിച്ച് വന്നപ്പോഴും അര്ജന്റീന എതിരില്ലാത്ത രണ്ട് ഗോളിന് ജയിച്ചിരുന്നു.
22-ാം മിനിറ്റിലാണ് ലോകചാമ്പ്യന്മാരുടെ ആദ്യ ഗോളെത്തിയത്. മൈതാനമധ്യത്തില് മാര്ക്ക് ചെയ്യപ്പെടാതെ നില്ക്കുകയായിരുന്ന റോഡ്രിഗോ ഡി പോള്, മുന്നേറ്റ താരം ജൂലിയന് അല്വാരസിലേക്ക് ഫോര്വേഡ് പാസ് നല്കി. കാനഡ പ്രതിരോധത്തെ പിളര്ത്തിക്കൊണ്ട് മുന്നോട്ടാഞ്ഞ അല്വാരസ് പന്ത് അനായാസം വലയിലെത്തിച്ചു (1-0). ബോക്സിനകത്ത് കനേഡിയന് താരം ബോംബിറ്റോ ഗോള് പ്രതിരോധിക്കാനുള്ള ശ്രമം നടത്തിയെങ്കിലും പരാജയപ്പെട്ടു.
രണ്ടാംപകുതിയിലായിരുന്നു മെസ്സിയുടെ ഗോള്. ബോക്സിന്റെ എഡ്ജില്വെച്ച് മധ്യനിര താരം എന്സോ ഫെര്ണാണ്ടസ് പിറകിലേക്ക് നല്കിയ പാസ് കനേഡിയന് താരത്തിന്റെ കാലിലെത്തി. ബോക്സിന് പുറത്തുകടത്താന് ശ്രമിച്ച് അടിച്ച പന്ത് പക്ഷേ, അര്ജന്റീനാ താരത്തിന്റെ കാലിലെത്തി. വല ലക്ഷ്യമാക്കി പായിച്ച പന്ത്, മെസ്സിയുടെ കാലില് നേരിയ തോതില് തട്ടി വലയിലേക്ക്. മെസ്സി ഓഫ്സൈഡാണെന്ന് വാദിച്ച് കനേഡിയന് താരങ്ങള് പ്രതിഷേധമുയര്ത്തിയതോടെ വാര് ചെക്കിങ് നടത്തി. പരിശോധനയ്ക്കൊടുവില് ഗോള് സാധുവായി. കോപ്പയിലെ മെസ്സിയുടെ ആദ്യ ഗോള് (2-0).
മത്സരത്തിലുടനീളം മെസ്സിയുടെ മികച്ച മുന്നേറ്റങ്ങള് കാണാനായി. 12-ാം മിനിറ്റില് എയ്ഞ്ചല് ഡി മരിയ നല്കിയ പാസ് മെസ്സി ഗോള്വല ലക്ഷ്യമാക്കി പായിച്ചെങ്കിലും പുറത്തേക്ക് പോയി. 44-ാം മിനിറ്റില് കനേഡിയന് പ്രതിരോധത്തെ കബളിപ്പിച്ച് മെസ്സി വീണ്ടും മുന്നേറ്റം നടത്തി. പക്ഷേ, ലക്ഷ്യസ്ഥാനത്തെത്തിക്കുന്നതില് അപ്പോഴും പരാജയപ്പെട്ടു. അതിനിടെ ആദ്യ ഗോള് വരുന്നതിന് അഞ്ച് മിനിറ്റ് മുന്പ് അല്വാരസ് സ്വന്തം പകുതിയില്നിന്ന് കനേഡിയന് വല തുളയ്ക്കാനുള്ള ശ്രമം നടത്തി. കനേഡിയന് ഗോള്ക്കീപ്പര് ക്രെപിയോയെ മറികടക്കാന് ലക്ഷ്യമിട്ട് അടിച്ച ലോങ് ബോള് പുറത്തേക്ക് പോയി.
കൗണ്ടര് അറ്റാക്കുകളിലൂടെ കാനഡ ചില മുന്നേറ്റങ്ങള് നടത്തിയിരുന്നു. 15, 16 മിനിറ്റുകളില് അര്ജന്റീനയുടെ ഗോള്മുഖം വിറപ്പിക്കാനായി അവര്ക്ക്. ബോക്സിനകത്തെ പിഴവുകളും പാസുകള് ശരിയാംവിധം നല്കുന്നതില് പരാജയപ്പെട്ടതുമാണ് കാനഡയെ ഗോളില്നിന്ന് അകറ്റിയത്. കാനഡയുടെ മികച്ച ഒരു നീക്കം അര്ജന്റൈന് ഗോള്ക്കീപ്പര് എമിലിയാനോ മാര്ട്ടിനസ് തടഞ്ഞിട്ടതും രക്ഷയായി.
ന്യൂജഴ്സിയിലെ മെറ്റ്ലൈഫ് സ്റ്റേഡിയത്തിലെ മണലും ഈര്പ്പവും കാരണം വേഗം കുറഞ്ഞ പിച്ചിലായിരുന്നു മത്സരം. കാനഡ ബാക്ക്ലൈന് തുളച്ചുകയറാനുള്ള അര്ജന്റീനയുടെ ശ്രമം മോശം പിച്ച് കാരണം പലപ്പോഴും പരാജയപ്പെട്ടു. അര്ജന്റീനയുടെ തുടര്ച്ചയായ രണ്ടാം കോപ്പ അമേരിക്ക ഫൈനലാണിത്. 2021 കോപ്പ അമേരിക്ക കിരീടം, 2022 ലോകകപ്പ് കിരീടം എന്നിവ കഴിഞ്ഞ് മൂന്ന് വര്ഷത്തിനിടെ മൂന്നാമത്തെ പ്രധാന അന്താരാഷ്ട്ര ചാമ്പ്യന്ഷിപ്പ് നേടുന്നതിലാണ് അര്ജന്റീനയുടെ കണ്ണ്. ഫൈനലില് വിജയിച്ചാല് കോപ്പ അമേരിക്കയിലെ തുടര്ച്ചയായ രണ്ടാം ജയമായിരിക്കും.
Content Highlights: copa america 2024 argentina vs canada
Published: 10 Jul 2024, 07:25 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented