റിയാദ്: സൗദി അറേബ്യയിലെ കര, കടൽ, വ്യോമ കസ്റ്റംസ് കേന്ദ്രങ്ങളിൽ ഒരാഴ്ചയ്ക്കിടെ 1,205 കള്ളക്കടത്ത് കേസുകൾ കണ്ടെത്തി. വിവിധ ഇനങ്ങളിലുള്ള നിരോധിത വസ്തുക്കളാണ് അധികൃതർ പിടിച്ചെടുത്തത്.

To advertise here,

ഹാഷിഷ്, കൊക്കെയ്ൻ, ഹെറോയിൻ, ക്രിസ്റ്റൽ മെത്ത്, ക്യാപ്റ്റഗൺ ഗുളികകൾ എന്നിവയുൾപ്പെടെ 36 ഇനം മയക്കുമരുന്നുകൾ പിടിച്ചെടുത്തവയിൽ ഉൾപ്പെടുന്നു. കൂടാതെ 303 ഇനം മറ്റ് നിരോധിത വസ്തുക്കളും 879 പുകയില ഉൽപന്നങ്ങളും അനധികൃതമായി കടത്താൻ ശ്രമിച്ച 31 കറൻസി ശേഖരങ്ങളും കണ്ടെത്തി.

സമൂഹത്തിന്റെ സുരക്ഷ ഉറപ്പാക്കുന്നതിനും നിരോധിത വസ്തുക്കളുടെ കടത്ത് തടയുന്നതിനുമായി സകാത്ത്, ടാക്സ് ആൻഡ് കസ്റ്റംസ് അതോറിറ്റി (സാറ്റ്ക) നടത്തുന്ന തുടർച്ചയായ പരിശോധനകളുടെ ഭാഗമായാണ് ഈ നടപടികൾ.

രാജ്യത്തേക്കുള്ള ഇറക്കുമതിയും കയറ്റുമതിയും കർശനമായ കസ്റ്റംസ് പരിശോധനയ്ക്ക് വിധേയമാക്കുന്നത് തുടരുമെന്ന് അതോറിറ്റി വ്യക്തമാക്കി. ഇതിന്റെ ഭാഗമായി ബന്ധപ്പെട്ട മറ്റ് സുരക്ഷാ ഏജൻസികളുമായി ചേർന്നുള്ള പ്രവർത്തനങ്ങളും ശക്തമാക്കിയിട്ടുണ്ട്.

കള്ളക്കടത്തും കസ്റ്റംസ് നിയമലംഘനങ്ങളും തടയുന്നതിനായി പൊതുജനങ്ങളുടെ സഹകരണം അതോറിറ്റി അഭ്യർഥിച്ചു. സംശയാസ്പദമായ നീക്കങ്ങളെക്കുറിച്ചുള്ള വിവരങ്ങൾ 1910 എന്ന സുരക്ഷാ ഹോട്ട്ലൈൻ നമ്പറിലോ 1910@zatca.gov.sa എന്ന ഇ-മെയിൽ വിലാസത്തിലോ +9661910 എന്ന അന്താരാഷ്ട്ര നമ്പറിലോ അറിയിക്കാം.

വിവരങ്ങൾ നൽകുന്നവരുടെ വ്യക്തിവിവരങ്ങൾ പൂർണമായും രഹസ്യമായി സൂക്ഷിക്കുമെന്നും ലഭിക്കുന്ന വിവരങ്ങൾ ശരിയാണെന്ന് സ്ഥിരീകരിച്ചാൽ സാമ്പത്തിക പാരിതോഷികം നൽകുമെന്നും അതോറിറ്റി അറിയിച്ചു. ഏകീകൃത കസ്റ്റംസ് നിയമപ്രകാരമുള്ള നിയമലംഘനങ്ങളും ഇത്തരത്തിൽ റിപ്പോർട്ട് ചെയ്യാം.