മസ്‌കറ്റ്: ഒമാൻ ദേശീയ ദിനാഘോഷങ്ങളോടനുബന്ധിച്ച് 160 കോടി ഒമാനി റിയാലിലധികം നിക്ഷേപമുള്ള ഏഴ് പ്രധാന ദേശീയ പദ്ധതികൾ പൂർത്തിയായതായി ഒമാൻ ഇൻവെസ്റ്റ്മെന്റ് അതോറിറ്റി പ്രഖ്യാപിച്ചു. ഊർജം, നിർമ്മാണം, പൊതുസേവനം എന്നീ മേഖലകളിലായി അൽ ദാഖിലിയ, വടക്കൻ അൽ ബാത്തിന, അൽ വുസ്ത, ദോഫാർ, അൽ ദാഹിറ എന്നീ ഗവർണറേറ്റുകളിൽ വ്യാപിച്ചുകിടക്കുന്ന ഈ പദ്ധതികൾ വരും ദിവസങ്ങളിൽ ഔദ്യോഗികമായി ഉദ്ഘാടനം ചെയ്യും.

To advertise here,

 

സാമ്പത്തിക വളർച്ച വേഗത്തിലാക്കുന്നതിനും വ്യവസായങ്ങളെ പ്രാദേശികവൽക്കരിക്കുന്നതിനും വിദേശ-ആഭ്യന്തര നിക്ഷേപങ്ങൾ ആകർഷിക്കുന്നതിനും പുതിയ തൊഴിലവസരങ്ങൾ സൃഷ്ടിക്കുന്നതിനും ഈ പദ്ധതികൾ വലിയ പങ്കുവഹിക്കും. വർഷങ്ങളായുള്ള തന്ത്രപരമായ ആസൂത്രണത്തിന്റെ ഫലമായി നിർമ്മാണ ഘട്ടം പൂർത്തിയാക്കി വാണിജ്യ പ്രവർത്തനത്തിലേക്ക് കടക്കുന്ന ഈ പദ്ധതികൾ ഭാവി വികസനങ്ങളുടെ കേന്ദ്രബിന്ദുവായി മാറുമെന്ന് ഒമാൻ ഇൻവെസ്റ്റ്മെന്റ് അതോറിറ്റി ഡെപ്യൂട്ടി പ്രസിഡന്റ് മുൽഹം ബഷീർ അൽ ജർഫ് പറഞ്ഞു.

 

പൂർത്തിയായ പ്രധാന പദ്ധതികൾ:

 

യുണൈറ്റഡ് സോളാർ പോളിസിലിക്കൺ പ്ലാന്റ് (സൊഹാർ ഫ്രീസോൺ): ഫ്യൂച്ചർ ഫണ്ട് ഒമാനുമായി സഹകരിച്ച് 66.8 കോടി റിയാൽ ചെലവിൽ നിർമ്മിച്ച ഈ പ്ലാന്റ് 1,500 തൊഴിലവസരങ്ങൾ സൃഷ്ടിക്കും. സോളാർ സെൽ നിർമ്മാണത്തിന് ആവശ്യമായ ഉയർന്ന നിലവാരമുള്ള പോളിസിലിക്കൺ ഉൽപ്പാദിപ്പിക്കുന്ന ഇവിടെ ഇതുവരെ 20.5 കോടി റിയാലിന്റെ പ്രാദേശിക സംഭരണം നടന്നിട്ടുണ്ട്.

 

ഓറിയോൺ സോളാർ പദ്ധതി (സൊഹാർ ഫ്രീസോൺ): 17.75 കോടി റിയാൽ ചെലവിൽ പൂർത്തിയാക്കിയ ഈ സോളാർ സെൽ നിർമ്മാണ പദ്ധതിയിലൂടെ 1,526 തൊഴിലവസരങ്ങൾ ലഭ്യമാകും. ഇറക്കുമതി കുറയ്ക്കാനും ശുദ്ധമായ ഊർജ സമ്പദ്വ്യവസ്ഥയിലേക്കുള്ള മാറ്റം വേഗത്തിലാക്കാനും ഇത് സഹായിക്കും.

 

ലദൈൻ പോളിമർ പാർക്ക് പദ്ധതികൾ: ഒക്യു ഗ്രൂപ്പിന് കീഴിൽ ഏകദേശം 57.65 കോടി റിയാൽ മൂല്യമുള്ള അനുബന്ധ വ്യവസായ പദ്ധതികളാണ് ഇവിടെ പൂർത്തിയായത്. യൂറോപ്പ്, ഏഷ്യ, ആഫ്രിക്ക എന്നിവിടങ്ങളിൽ നിന്നുള്ള നിക്ഷേപ പങ്കാളിത്തം ആകർഷിച്ച ഈ പദ്ധതി 627 നേരിട്ടുള്ളതും അല്ലാതെയുമുള്ള തൊഴിലവസരങ്ങൾ നൽകുന്നു.

 

റവാഫിദ് പുനരുപയോഗ ഊർജ പദ്ധതികൾ: ഒക്യു ആൾട്ടർനേറ്റീവ് എനർജിയും ടോട്ടൽ എനർജീസും ചേർന്ന് 10.9 കോടി റിയാൽ ചെലവിൽ വികസിപ്പിച്ച ഈ പദ്ധതിക്ക് ആകെ 327 മെഗാവാട്ട് ശേഷിയുണ്ട്. 222 മെഗാവാട്ട് ശേഷിയുള്ള റിയാഹ്-1, റിയാഹ്-2 കാറ്റാടി വൈദ്യുത പദ്ധതികളും, 105 മെഗാവാട്ട് ശേഷിയുള്ള നോർത്ത് ഒമാൻ സോളാർ പ്രോജക്റ്റും ഇതിൽ ഉൾപ്പെടുന്നു.

 

ജലവിതരണ ശൃംഖലകൾ:നമ വാട്ടർ സർവീസസ് നടപ്പിലാക്കിയ മൂന്ന് പ്രധാന ജലവിതരണ പദ്ധതികളും ഇക്കൂട്ടത്തിലുണ്ട്. മനാ വിലായത്ത് (2.6 കോടി റിയാൽ), അൽ ഹംറ വിലായത്ത് - ബഹ്ലയിലെ ബിലാദ് സെയ്ത് (3.7 കോടി റിയാൽ), ഇബ്രിയിലെ വാദി അൽ ഐൻ (2.6 കോടി റിയാൽ) എന്നിവിടങ്ങളിലായി പൂർത്തിയായ ഈ പദ്ധതികൾ 189 തൊഴിലവസരങ്ങൾ സൃഷ്ടിക്കുന്നതിനൊപ്പം പ്രാദേശിക ജനവിഭാഗങ്ങൾക്ക് ആധുനിക കുടിവെള്ള സൗകര്യവും ഉറപ്പാക്കുന്നു.