ഡാലസ്: വേൾഡ് മലയാളി കൗൺസിലിൽ (WMC) നടത്തുന്ന പതിനഞ്ചാമത് ബൈനിയൽ ഗ്ലോബൽ കോൺഫറൻസ് 2026 ഓഗസ്റ്റ് 21 മുതൽ 24 വരെ തീയതികളിൽ ഡാലസിൽ നടക്കും. ഇതിന്റെ കിക്കോഫ് ഡാലസിൽ ജനുവരി മൂന്നിന് നടന്നു. ഇതോടൊപ്പം നോർത്ത് ടെക്സാസ് പ്രൊവിൻസിന്റെ നേതൃത്വത്തിൽ ക്രിസ്മസ് - പുതുവത്സര ആഘോഷങ്ങളും നടന്നു.

To advertise here,

പ്രൊവിൻസ് പ്രസിഡന്റ് ആൻസി തലച്ചെല്ലൂരിന്റെ അധ്യക്ഷതയിൽ നടന്ന ചടങ്ങിൽ വിവിധ മേഖലകളിലെ പ്രമുഖരും കൗൺസിൽ ഭാരവാഹികളും ചടങ്ങിൽ പങ്കെടുത്തു.

എമ്മാ റോബിന്റെ പ്രാർത്ഥനാ ഗാനത്തോടെ ആരംഭിച്ച യോഗത്തിൽ ആൻസി തലച്ചെല്ലൂർ സ്വാഗതം ആശംസിച്ചു. പരമ്പരാഗതമായ നിലവിളക്ക് കൊളുത്തൽ ചടങ്ങോടെ ആഘോഷ പരിപാടികൾക്ക് ഔദ്യോഗിക തുടക്കമായി. ഫാ.ബേസിൽ എബ്രഹാം മുഖ്യപ്രഭാഷണം നടത്തി, ക്രിസ്മസ് - പുതുവത്സര സന്ദേശം കൈമാറി.

ചടങ്ങിൽ, ഡബ്ല്യു.എം.സി ഗ്ലോബൽ ചെയർമാൻ ഗോപാല പിള്ള ഡാലസിലെ മലയാളി സമൂഹത്തെ അഭിസംബോധന ചെയ്തു. ഗ്ലോബൽ അപ്ഡേറ്റുകൾ പങ്കുവച്ച ശേഷം അദ്ദേഹം നോർത്ത് ടെക്സാസ് പ്രൊവിൻസിന്റെ അടുത്ത രണ്ടുവർഷത്തേക്കുള്ള സംഘടനയുടെ പുതിയ ഭാരവാഹികൾക്ക് സത്യവാചകം ചൊല്ലിക്കൊടുത്ത് സദസിന് പരിചയപ്പെടുത്തി.

അമേരിക്ക റീജിയൻ പ്രസിഡന്റ് ജോൺസൺ തലച്ചെല്ലൂർ വരാനിരിക്കുന്ന കോൺഫറൻസിനെക്കുറിച്ചുള്ള വിവരങ്ങൾ നൽകുകയും രജിസ്ട്രേഷൻ ഉദ്ഘാടനം നിർവഹിക്കുകയും ചെയ്തു. ഗ്ലോബൽ ഇലക്ഷൻ കമ്മീഷണർ ഫിലിപ്പ് തോമസ്, അമേരിക്ക റീജിയൻ ഇലക്ഷൻ കമ്മീഷണർ ചെറിയാൻ അലക്‌സാണ്ടർ തുടങ്ങിയവർ ആശംസകൾ നേർന്നു. പ്രൊവിൻസിലെ പത്തോളം കുടുംബങ്ങൾ തദവസരത്തിൽ കോൺഫറൻസിനു രജിസ്റ്റർ ചെയ്ത് രജിസ്ട്രേഷൻ കിക്കോഫ് വിജയകരമാക്കി.

ക്രിസ്മസ് - പുതുവത്സര ആഘോഷങ്ങൾക്ക് മാറ്റുകൂട്ടാൻ പ്രൊവിൻസ് അംഗങ്ങളുടെയും കുട്ടികളുടെയും വിവിധ കലാപരിപാടികളാണ് ആഘോഷങ്ങളിൽ അരങ്ങേറിയത്. സ്മിതാ ഷാൻ മാത്യു, റ്റിയാന, എവിന എന്നിവരുടെ മദർ-ഡോട്ടർ മെഡ്ലി ഗാനം ശ്രദ്ധേയമായി.

അദ്വിക സെബിന്റെ സെമി ക്ലാസിക്കൽ സോളോ ഡാൻസും, ജോസിലിൻ സെബാസ്റ്റ്യൻ, ജോവാൻ തെരേസ മാത്യു എന്നിവരുടെ ഡാൻസും കാണികളുടെ പ്രശംസ പിടിച്ചുപറ്റി. സജേഷ് അഗസ്റ്റിനും അന്ന മരിയും ചേർന്നവതരിപ്പിച്ച ഫാദർ-ഡോട്ടർ ഡ്യുയറ്റ് ഗാനം ഹൃദ്യമായിരുന്നു.

കവിതാ രാജപ്പനും സംഘവും അവതരിപ്പിച്ച 'കിളിയെ കിളിയെ.. ' എന്ന ഗാനത്തോടെ തുടങ്ങിയ മോഡേൺ മോളിവുഡ് ഫ്യൂഷൻ ഡാൻസും അരങ്ങേറി.

ശീതൾ സെബിൻ കൊറിയോഗ്രഫി നിർവ്വഹിച്ച മനോഹരമായ സെമിക്ലാസിക്കൽ നൃത്തം ആഘോഷങ്ങൾക്ക് മാറ്റുകൂട്ടി. വിദ്യാർത്ഥിനികളായ ആഞ്ജലീന സഖറിയാസ്, ജെസ്സിക്ക ജോം, എല്ല ജോസഫ്, ജൂലിയ മുണ്ടക്കൽ, എമ്മാ റോബിൻ, ജോവാന ജോൺ, അനന്യ സെബിൻ എന്നിവർ ചേർന്ന് നൃത്തവിരുന്ന് അവതരിപ്പിച്ചു.

സെന്റ്. അൽഫോൻസാ കാത്തലിക് ചർച്ച് ടീം അവതരിപ്പിച്ച ക്രിസ്മസ് കരോൾ, വിവിധ ഗ്രൂപ്പുകൾ അവതരിപ്പിച്ച സെമി ക്ലാസിക്കൽ, വെസ്റ്റേൺ ഡാൻസുകൾ പരിപാടിക്ക് വർണ്ണാഭമായ സമാപ്തി കുറിച്ചു. ന്യൂ ഇയർ ഡിന്നറും ഒരുക്കിയിരുന്നു.

പ്രോഗ്രാം കോർഡിനേറ്റർ ആൻസി തലച്ചെല്ലൂർ പരിപാടികൾ ഏകോപിപ്പിച്ചു. സ്മിതാ ജോസഫ്, അമ്പിളി ലിസ ടോം എന്നിവർ പരിപാടിയുടെ അവതാരകരായിരുന്നു. വൈസ് ചെയർപേഴ്സൺ അമ്പിളി ലിസ ടോം നന്ദി രേഖപ്പെടുത്തി.

വാർത്തയും ഫോട്ടോയും : മാർട്ടിൻ വിലങ്ങോലിൽ