ദിമിറ്റ് (ടെക്സാസ്): ഈ ആഴ്ച ആദ്യം ടെക്‌സാസിലെ ഒരു ഡയറി ഫാമിലുണ്ടായ സ്‌ഫോടനത്തിൽ ഏകദേശം 18,000 പശുക്കൾക്കാണ് ജീവ നാശം സംഭവിച്ചത്. ദിമിറ്റ് പട്ടണത്തിനടുത്തുള്ള സൗത്ത് ഫോർക്ക് ഡയറിയിൽ ഉണ്ടായ സ്‌ഫോടനത്തിൽ ഒരാളുടെ നില ഗുരുതരമാണ്. മീഥെയ്ൻ വാതകത്തിന് തീപിടിച്ചതാകാമെന്നാണ് അധികൃതർ കരുതുന്നത്. ഏപ്രിൽ 10 ന് വൈകുന്നേരം 7:21 ന് ഫാമിൽ തീപിടുത്തമുണ്ടായതായി തങ്ങൾക്ക് റിപ്പോർട്ട് ലഭിച്ചതായി കാസ്ട്രോ കൗണ്ടി ഷെരീഫ് ഓഫീസ് പ്രസ്താവനയിൽ പറഞ്ഞു. ഷെരീഫിന്റെ ഓഫീസ് പോസ്റ്റ് ചെയ്ത ഫോട്ടോയിൽ ഭൂമിയിൽ നിന്ന് കറുത്ത പുക ഉയരുന്നതായി കാണിക്കുന്നുണ്ട്‌. പോലീസും അത്യാഹിത വിഭാഗവും സംഭവസ്ഥലത്ത് എത്തിയപ്പോൾ, കുടുങ്ങിക്കിടക്കുന്ന ഗുരുതരാവസ്ഥയിലായ ഒരാളെ കണ്ടെത്തി രക്ഷപ്പെടുത്തി ആശുപത്രിയിലേക്ക് മാറ്റി.
തീയും പുകയും കൊണ്ട് ചത്ത പശുക്കളുടെ കൃത്യമായ കണക്ക് അജ്ഞാതമായി തുടരുമ്പോൾ, കാസ്‌ട്രോ കൗണ്ടി ഷെരീഫ് ഓഫീസിന്റെ വക്താവ് "ഏകദേശം 18,000 കന്നുകാലികൾ നഷ്ടപ്പെട്ടതായി കണക്കാക്കപ്പെടുന്നു" എന്ന്‌ അറിയിച്ചു. പശുക്കളെ കറന്ന സ്ഥലത്തേക്കും പിന്നീട് തൊഴുത്തിലേക്കും കൊണ്ടുപോകുന്ന സ്ഥലത്തേക്ക് തീ പടർന്നതിനെത്തുടർന്ന്‌ മിക്ക കന്നുകാലികളും നഷ്ടപ്പെട്ടതായി പ്രാദേശിക വാർത്താ ഏജൻസിയായ കെഎഫ്ഡിഎയോട് സംസാരിച്ച കാസ്ട്രോ കൗണ്ടി ഷെരീഫ് സാൽ റിവേര പറഞ്ഞു.
'ഹണി ബാഡ്ജർ' എന്ന് വിളിക്കപ്പെടുന്ന ഒരു യന്ത്രത്തിൽ നിന്നാണ് തീ പടർന്നതെന്ന് അന്വേഷണ ഉദ്യോഗസ്ഥർ വിശ്വസിക്കുന്നതായി റിവേര കെഎഫ്ഡിഎയോട് പറഞ്ഞു.
വാഷിംഗ്ടൺ ഡിസി ആസ്ഥാനമായുള്ള അനിമൽ വെൽഫെയർ ഇൻസ്റ്റിറ്റ്യൂട്ട് റിപ്പോർട്ടനുസരിച്ച്‌  18,000 പശുക്കളുടെ മരണസംഖ്യ 2013 ൽ സ്ഥിതിവിവരക്കണക്കുകൾ സൂക്ഷിക്കാൻ തുടങ്ങിയതിന് ശേഷമുള്ള ഏറ്റവും മാരകമായ ഒന്നായിരുന്നു.

To advertise here,

വാർത്തയും ചിത്രവും:  പി പി ചെറിയാൻ