മനാമ: പ്രവാസലോകത്തുനിന്ന് നാട്ടിലെ അർഹരായ കുടുംബങ്ങൾക്ക് കൈത്താങ്ങാകുക എന്ന ലക്ഷ്യത്തോടെ ഇന്ത്യൻ യൂത്ത് കൾച്ചറൽ കോൺഗ്രസ് ബഹ്റൈൻ ദേശീയ കമ്മിറ്റിയുടെ ചാരിറ്റി വിംഗിന്റെ നേതൃത്വത്തിൽ നടപ്പാക്കിവരുന്ന 'ചിറക്' പദ്ധതിയുടെ ഭാഗമായി അർഹരായ രണ്ട് ഗുണഭോക്താക്കൾക്ക് തയ്യൽ മെഷീനുകൾ വിതരണം ചെയ്തു. തിരുവല്ല എം.എൽ.എ അഡ്വ. വർഗീസ് മാമ്മൻ ഗുണഭോക്താക്കൾക്ക് തയ്യൽ മെഷീനുകൾ കൈമാറി. സമൂഹത്തിലെ സാമ്പത്തികമായി പിന്നോക്കം നിൽക്കുന്ന കുടുംബങ്ങൾക്ക് ഉപജീവനമാർഗം ഒരുക്കുന്നതിനുള്ള ഇത്തരം പ്രവർത്തനങ്ങൾ മാതൃകാപരമാണെന്ന് ചടങ്ങിൽ സംസാരിച്ചവർ അഭിപ്രായപ്പെട്ടു. ചടങ്ങിൽ പത്തനംതിട്ട ജില്ലാ പഞ്ചായത്ത് വികസനകാര്യ സ്റ്റാൻഡിങ് കമ്മിറ്റി ചെയർമാൻ സാം ഈപ്പൻ, ബ്ലോക്ക് പഞ്ചായത്ത് പ്രസിഡന്റ് ഈപ്പൻ കുര്യൻ, യൂത്ത് കോൺഗ്രസ് സംസ്ഥാന ജനറൽ സെക്രട്ടറി റോബിൻ പരുമല, നിരണം പഞ്ചായത്ത് പ്രസിഡന്റ് ജോളി ഈപ്പൻ, പഞ്ചായത്ത് വൈസ് പ്രസിഡന്റ് റെന്നി തോമസ്, വാർഡ് മെമ്പർ തോമസ് മത്തായി, റവ. ജോൺസൺ ഫിലിപ്പ് എന്നിവർ പങ്കെടുത്തു.

To advertise here,

ഐ. വൈ. സി. സി ബഹ്റൈൻ മുൻ പ്രസിഡന്റ് ബ്ലസ്സൻ മാത്യുവിന്റെ നേതൃത്വത്തിലാണ് നാട്ടിൽ വിതരണ ചടങ്ങും അനുബന്ധ പ്രവർത്തനങ്ങളും സംഘടിപ്പിച്ചത്. പ്രാദേശിക തലത്തിൽ അർഹരായ ഗുണഭോക്താക്കളെ കണ്ടെത്തുന്നതിനും പദ്ധതിയുടെ പ്രയോജനം യഥാർത്ഥത്തിൽ ആവശ്യക്കാരിലേക്ക് എത്തിക്കുന്നതിനും അദ്ദേഹം നേതൃത്വം നൽകി.

പ്രവാസി മലയാളികളുടെ കൂട്ടായ്മയും സാമൂഹിക പ്രതിബദ്ധതയും നാട്ടിലെ അർഹരായ കുടുംബങ്ങളുടെ ജീവിതത്തിൽ പ്രതീക്ഷയുടെ 'ചിറക്' നൽകുന്നതിന്റെ തുടർച്ചയായാണ് പദ്ധതി മുന്നോട്ടുകൊണ്ടുപോകുന്നതെന്ന് ഐ. വൈ. സി. സി ബഹ്റൈൻ ചാരിറ്റി വിംഗ് കൺവീനർ രഞ്ജിത്ത് പേരാമ്പ്ര അറിയിച്ചു. വരും ദിവസങ്ങളിലും അർഹരായ കുടുംബങ്ങളെ കണ്ടെത്തി അവരുടെ ആവശ്യങ്ങൾക്കനുസരിച്ചുള്ള വിവിധ സഹായ പദ്ധതികൾ നടപ്പാക്കുന്നതിനാണ് ഐ. വൈ. സി. സി ബഹ്റൈൻ ചാരിറ്റി വിംഗ് ലക്ഷ്യമിടുന്നത്.