മനാമ: ബഹ്റൈൻ രാജ്യത്തിന്റെ ദേശീയ വിമാനക്കമ്പനിയും, ഫോർമുല 1 ബഹ്റൈൻ ഗ്രാൻഡ് പ്രി ദീർഘകാല ടൈറ്റിൽ സ്‌പോൺസറുമായ ഗൾഫ് എയർ, 2027-ലെ മത്സരത്തോടനുബന്ധിച്ച് ബഹ്റൈനും ലണ്ടനും ഇടയിൽ ആറ് അധിക വിമാന സർവീസുകൾ കൂടി ഏർപ്പെടുത്തി. മാർച്ച് 12 മുതൽ 14 വരെ ബഹ്റൈൻ ഇന്റർനാഷണൽ സർക്യൂട്ടിൽ നടക്കുന്ന ഈ മത്സരത്തോടെയാണ് ഫോർമുല 1 സീസണിന് തുടക്കമാകുന്നത്. 2027 മാർച്ച് 11, 15 തീയതികളിൽ ഷെഡ്യൂൾ ചെയ്തിരിക്കുന്ന ഈ അധിക സർവീസുകൾ, ബഹ്റൈനെ ലണ്ടൻ ഹീത്രൂ, ലണ്ടൻ ഗാറ്റ്വിക്ക് എന്നീ വിമാനത്താവളങ്ങളുമായി ബന്ധിപ്പിക്കുന്നു. ഗൾഫ് എയറിന്റെ ബോയിംഗ് 787-9 ഡ്രീംലൈനർ വിമാനങ്ങളാണ് ഇതിനായി ഉപയോഗിക്കുന്നത്. ഓരോ ദിശയിലും ഏകദേശം 1,700 സീറ്റുകൾ കൂടി ലഭ്യമാകുന്നതോടെ, മത്സര വാരാന്ത്യത്തിൽ പങ്കെടുക്കാനെത്തുന്ന ആരാധകർക്കും ടീമുകൾക്കും സന്ദർശകർക്കും യാത്രയ്ക്കായി കൂടുതൽ അവസരങ്ങൾ ലഭിക്കും.

To advertise here,

 

ഈ അധിക സർവീസുകൾ കൂടി ഉൾപ്പെടുന്നതോടെ, ബഹ്റൈനും ലണ്ടനും ഇടയിൽ ഗൾഫ് എയർ ആകെ 18 വിമാന സർവീസുകൾ നടത്തും. തിരക്കേറിയ ദിവസങ്ങളിൽ പ്രതിദിനം അഞ്ച് വിമാനങ്ങൾ വരെ സർവീസ് നടത്തും.

ഈ അധിക വിമാന സർവീസുകൾക്കായി, ഗൾഫ് എയർ ആപ്പ് വഴിയോ, അല്ലെങ്കിൽ അംഗീകൃത ട്രാവൽ ഏജന്റുമാർ വഴിയോ ഇപ്പോൾ തന്നെ ടിക്കറ്റുകൾ ബുക്ക് ചെയ്യാവുന്നതാണ്.