ലക്ഷ്യം 1000 നായ്ക്കൾ

To advertise here,

തിരുവല്ല : നഗരസഭാ പ്രദേശത്ത് 750 തെരുവുനായ്ക്കളെ പിടികൂടി പ്രതിരോധ കുത്തിവെപ്പ്‌ നൽകി. ആയിരം തെരുവുനായ്ക്കൾക്ക് വാക്‌സിനേഷൻ നൽകുകയാണ് ലക്ഷ്യം. ഒക്ടോബർ 14-ന് ആരംഭിച്ച പദ്ധതി അവധിദിവസങ്ങളൊഴികെ എല്ലാദിവസവും തുടരുകയാണ്.

തെരുവുനായ്ക്കളെ പിടികൂടി വാക്‌സിനേഷൻ നൽകുന്നതിനായി പ്രത്യേക പരിശീലനം ലഭിച്ച സർക്കാർ അംഗീകൃത ഡോഗ് ക്യാച്ചർമാരുടെ സേവനവും പ്രയോജനപ്പെടുത്തുന്നുണ്ട്. ഒരാഴ്ചയ്ക്കുള്ളിൽ ശേഷിക്കുന്ന നായ്ക്കൾക്കും കുത്തിവെപ്പ്‌ നൽകാനാകുമെന്നാണ് പ്രതീക്ഷിക്കുന്നതെന്ന് സീനിയർ വെറ്ററിനറി സർജൻ ഡോ. രതീഷ് ബാബു പറഞ്ഞു.

എല്ലാവർഷവും പ്രതിരോധ കുത്തിവെപ്പ്‌ പദ്ധതി നടപ്പാക്കുന്നതിലൂടെ പേവിഷബാധ ഭീഷണി കുറച്ച് പേവിഷമുക്ത തിരുവല്ല എന്ന ലക്ഷ്യത്തിലെത്തുകയാണ് നഗരസഭയുടെ ഉദ്ദേശ്യം. പുളിക്കീഴിൽ എ.ബി.സി. (അനിമൽ ബർത്ത് കൺട്രോൾ) കേന്ദ്രവും മറ്റ് അനുബന്ധ പദ്ധതികളും പൂർത്തിയായിവരുന്നുണ്ട്. ഇവകൂടി പ്രാവർത്തികമാകുന്നതോടെ തെരുവുനായ നിയന്ത്രണ പ്രവർത്തനങ്ങൾ കൂടുതൽ കാര്യക്ഷമമാക്കാൻ കഴിയുമെന്നാണ് പ്രതീക്ഷ. തിരുവല്ല മുനിസിപ്പാലിറ്റി വെറ്ററിനറി പോളിക്ലിനിക്കിന്റെ നേതൃത്വത്തിലാണ് പദ്ധതി നടപ്പാക്കുന്നത്.