ബെയ്ജിങ്: ലോകത്തെ മൂന്ന് വൻശക്തികളുടെ തലവന്മാർ ത്രികക്ഷി ചർച്ചകൾക്കായി ഒരേ മേശയ്ക്ക് ചുറ്റും ഒത്തുചേരുന്ന ആദ്യ സന്ദർഭത്തിന് സാക്ഷ്യംവഹിക്കാൻപോകുകയാണ് ചൈന. ചരിത്ര കൂടിക്കാഴ്ചയ്ക്കായി യുഎസ് പ്രസിഡന്റ് ഡൊണാൾഡ് ട്രംപും റഷ്യൻ പ്രസിഡന്റ് വ്ളാദിമിർ പുതിനും ചൈനയിലെത്തി. ഡൊണാൾഡ് ട്രംപിനെ ചൈനീസ് പ്രസിഡന്റ് ഷി ജിൻപിങ് ഷെൻഷെൻ വിമാനത്താവളത്തിൽ നേരിട്ടെത്തി സ്വീകരിച്ചു. ലോകം ഉറ്റുനോക്കുന്ന ത്രികക്ഷി ചർച്ചകൾക്ക് മുന്നോടിയായി മൂന്ന് നേതാക്കളും പരസ്പരം ഹസ്തദാനം ചെയ്തു. ഷി ജിൻ പിങ്ങിനെ സാക്ഷിയാക്കി ട്രംപിന് പുതിൻ കൈക്കൊടുത്തു.

To advertise here,

ഒരു വർഷത്തിലേറെക്കാലത്തെ ഇടവേളയ്ക്ക് ശേഷമാണ് പുതിനും ട്രംപും തമ്മിൽ കൂടിക്കാഴ്ച നടത്തുന്നത്. ഏഷ്യാ പസഫിക് സാമ്പത്തിക സഹകരണ ഫോറത്തിന്റെ (അപെക്) ഉച്ചകോടിക്കായാണ് നേതാക്കൾ ചൈനയിലെത്തിയത്. ഉച്ചകോടിയുടെ പ്രധാന ശ്രദ്ധാകേന്ദ്രം വ്യാഴാഴ്ച നടക്കുന്ന യു.എസ്-ചൈന-റഷ്യ ചർച്ചകളിലായിരിക്കും.

ചർച്ചയുടെ ഔദ്യോഗിക അജണ്ട ഇതുവരെ പുറത്തുവിട്ടിട്ടില്ലെങ്കിലും, യുക്രൈൻ, ഇറാൻ സംഘർഷങ്ങൾ, ആണവവ്യാപനം, വ്യാപാര സംഘർഷങ്ങൾ, ആർട്ടിഫിഷ്യൽ ഇന്റലിജൻസിലെ പുരോഗതി എന്നിവയുൾപ്പെടെ ചർച്ചയുടെ ഭാഗമാകുമെന്നാണ് സൂചന.

ഇതിനിടെ ട്രംപും പുതിനും തമ്മിലുള്ള പ്രത്യേക ചർച്ചയും നടക്കാനിടയുള്ളതായി സൂചനയുണ്ട്. പ്രതിനിധി സംഘങ്ങൾ പങ്കെടുക്കാത്ത അനൗദ്യോഗിക ചർച്ചയായിരിക്കും ഇതെന്ന് ക്രെംലിൻ വക്താവ് സൂചിപ്പിച്ചു.

ചൈനീസ് വിമാനത്താവളത്തിൽ ട്രംപിന് പ്രത്യേക സ്വീകരണമാണ് ഷി ഒരുക്കിയിരുന്നത്. സെപ്റ്റംബറിൽ ചൈനീസ് പ്രസിഡന്റ് വാഷിംഗ്ടൺ സന്ദർശിച്ചപ്പോൾ യുഎസ് പ്രസിഡന്റ് സ്വീകരിച്ചതിന് സമാനമായിരുന്നു ഇതെന്ന് ബിബിസി റിപ്പോർട്ട് ചെയ്തു. ഇതിനെ ഷി 'സ്‌പെഷ്യൽ' എന്നാണ് വിശേഷിപ്പിച്ചത്.