വാഷിങ്ടൺ: അമേരിക്കയും ഇറാനും തമ്മിലുള്ള യുദ്ധം അവസാനിപ്പിക്കുന്നതിനുള്ള സമാധാന കരാറിൽ പ്രസിഡന്റ് ഡൊണാൾഡ് ട്രംപ് ഒപ്പുവെച്ചതിന് പിന്നാലെ നിർണായക വിവരങ്ങൾ പുറത്ത്. ഫെബ്രുവരി 28-ന് ഇറാനെതിരെ അമേരിക്കയും ഇസ്രയേലും ആരംഭിച്ച യുദ്ധം അവസാനിപ്പിക്കുന്നതിനായുള്ള സമാധാന കരാറിന്റെ ചട്ടക്കൂടിൽ ബുധനാഴ്ചയാണ് ട്രംപ് ഒപ്പുവച്ചത്.

To advertise here,

ഇതിന് ഒരാഴ്ച മുമ്പ്, കൂടുതൽ മിസൈലുകളും ബോംബുകളും നിർമ്മിക്കാൻ പ്രതിരോധ കമ്പനികളെ 'നിർബന്ധിക്കുന്ന' ഉത്തരവിൽ പ്രസിഡന്റ് ഒപ്പുവെച്ചിരുന്നു എന്ന വിവരമാണ് ഇപ്പോൾ പുറത്തുവരുന്നത്. പെന്റഗണിന്റെ കണക്കനുസരിച്ച്, ഇറാനുമായി മാസങ്ങൾ നീണ്ടുനിന്ന യുദ്ധത്തിൽ അമേരിക്കയ്ക്ക് 111 ബില്യൺ ഡോളർ ചിലവായിട്ടുണ്ട്, ഇതിൽ ഭൂരിഭാഗവും മിസൈലുകൾക്കായാണ് ചെലവഴിച്ചത്.

മാത്രമല്ല, യുദ്ധം അമേരിക്കയുടെ ആയുധശേഖരത്തിൽ വലിയ കുറവുണ്ടാക്കിയതായും റിപ്പോർട്ടുകൾ ചൂണ്ടിക്കാട്ടുന്നു. ഈ സാഹചര്യത്തിൽ, മിസൈലുകളുടെയും ബോംബുകളുടെയും ഉത്പാദനം അടിയന്തരമായി വർധിപ്പിക്കുന്നതിനായാണ് ട്രംപ് ഡിഫൻസ് പ്രൊഡക്ഷൻ ആക്ട് നടപ്പിലാക്കിയത് എന്നാണ് വിവരം. അതേസമയം, അമേരിക്കയുടെ ആയുധശേഖരത്തിൽ ഇടിവ് സംഭവിച്ചതായി പെന്റഗൺ സമ്മതിച്ചിട്ടില്ല.

'ദേശീയ പ്രതിരോധത്തിനോ അതിന്റെ സജ്ജീകരണ പരിപാടികൾക്കോ നേരിട്ടുള്ള ഭീഷണി ഉയർത്തുന്ന സാഹചര്യങ്ങൾ നിലവിലുണ്ടെന്നാണ് പ്രസിഡന്റിന്റെ വിലയിരുത്തൽ' എന്ന് ട്രംപിന്റെ ഉത്തരവിൽ പ്രസ്താവിച്ചതായി സിഎൻഎൻ റിപ്പോർട്ട് ചെയ്തു. ആയുധ നിർമാണ മേഖലയിലെ 'വ്യവസ്ഥാപരമായ പരിമിതികളെ' കുറിച്ചും അദ്ദേഹം ഉത്തരവിൽ പരാമർശിച്ചിട്ടുണ്ട്.

അമേരിക്കയുടെ മിസൈൽ ശേഖരം- പ്രത്യേകിച്ച് പാട്രിയറ്റ് (Patriot), താഡ് (THAAD) ഇന്റർസെപ്റ്ററുകൾ- അതിവേഗം തീർന്നുപോയതായി യുദ്ധവുമായി ബന്ധപ്പെട്ട് പുറത്തുവന്ന റിപ്പോർട്ടുകളിൽ പരാമർശിച്ചിരുന്നു. അത്തരം വാർത്തകൾ റഷ്യയെയും ചൈനയെയും അകറ്റി നിർത്താൻ, അമേരിക്കൻ വ്യോമ പ്രതിരോധത്തെ ആശ്രയിക്കുന്ന യൂറോപ്പിലെയും ഏഷ്യയിലെയും സഖ്യകക്ഷികളെയും ആശങ്കയിലാക്കിയിരുന്നു.

യുദ്ധത്തിന്റെ ആദ്യ നാളുകളിൽതന്നെ, കുറഞ്ഞ ചെലവിൽ വൻതോതിൽ നിർമിച്ച ഷഹീദ് (Shahed) ഡ്രോണുകൾ കൂട്ടമായി അയക്കുന്ന ഇറാന്റെ തന്ത്രം അമേരിക്കൻ വ്യോമ പ്രതിരോധത്തെ പ്രതിസന്ധിയിലാക്കിയിരുന്നു. 20,000 ഡോളർ വിലയുള്ള ഒരു ഡ്രോണിനെ വെടിവെച്ചിടാൻ 40 ലക്ഷം ഡോളർ വിലയുള്ള പാട്രിയറ്റ് മിസൈലുകൾ പ്രയോഗിക്കേണ്ടി വന്നതാണ് അമേരിക്കയെ വലിയ സാമ്പത്തിക ബാധ്യതയിലേക്ക് തള്ളിവിട്ടത്.

ഏതെങ്കിലും ഒരു ഡ്രോണിനെയെങ്കിലും നശിപ്പിക്കാതെ വിടുന്നത് സുപ്രധാന ലക്ഷ്യസ്ഥാനങ്ങൾക്ക് ഭീഷണിയാകും എന്നതിനാലാണ് ഇത്രയും വലിയ ചെലവ് അമേരിക്കയ്ക്ക് വഹിക്കേണ്ടി വന്നത്. ആയുധ നിർമാണ ചെലവിലെ ഈ വ്യത്യാസം അമേരിക്ക ഇതുവരെ പരിഹരിച്ചിട്ടില്ലാത്ത ഒരു പ്രശ്‌നമാണ്. മേഖലയിലെ താഡ് (THAAD) ബാറ്ററികൾ തകർത്ത ഇറാന്റെ ആക്രമണങ്ങൾ പാട്രിയറ്റ് ലോഞ്ചറുകൾക്ക് മേൽ കൂടുതൽ സമ്മർദ്ദം ചെലുത്തിയിരുന്നു.

ആവശ്യമായ തോതിൽ ആയുധങ്ങൾ നിർമിക്കാനുള്ള പ്രതിരോധ വ്യവസായത്തിന്റെ ശേഷിയെ ഈ യുദ്ധം തുറന്നുകാട്ടിയതായി പെന്റഗൺ ദീർഘകാലമായി പുലർത്തുന്ന ആശങ്കയെക്കുറിച്ച് സിഎൻഎൻ റിപ്പോർട്ട് ചെയ്തു. ബില്യൺ കണക്കിന് ഡോളർ വിലമതിക്കുന്ന മിസൈലുകളും റോക്കറ്റുകളും ഇന്ധനവും അമേരിക്ക ഉപയോഗിച്ചതായാണ് കണക്കുകൾ സൂചിപ്പിക്കുന്നത്.

അവസാനത്തെ രണ്ടുദിവസത്തെ ബോംബാക്രമണത്തിന് മാത്രം 200 മില്യൺ ഡോളറിലധികം ചെലവായെന്ന് ട്രംപ് ഈ ആഴ്ച വെളിപ്പെടുത്തിയിരുന്നു. '...ആ അവസാന രണ്ട് ദിവസങ്ങൾ അതിക്രൂരമായിരുന്നു. 200 മില്യൺ ഡോളർ മൂല്യമുള്ള ബോംബുകൾ. മറ്റ് കാര്യങ്ങൾക്ക് പുറമെ ഇത് വളരെ ചെലവേറിയതുമാണ്.' സ്വിറ്റ്സർലൻഡിൽ നടന്ന ജി7 ഉച്ചകോടിക്കിടെ മാധ്യമപ്രവർത്തകരോട് അദ്ദേഹം പറഞ്ഞു.