വാഷിങ്ടൺ: 2026-ലെ യു.എസ്. ഇടക്കാല തിരഞ്ഞെടുപ്പിന്റെ ഫലം അംഗീകരിക്കുമെന്നും കോൺഗ്രസിന്റെ ഭരണം നിർണയിക്കുന്ന ജനവിധിയെ മാനിക്കുമെന്നും യു.എസ്. പ്രസിഡന്റ് ഡൊണാൾഡ് ട്രംപ്. ദ ന്യൂയോർക്ക് ടൈംസിന് നൽകിയ അഭിമുഖത്തിലാണ് ട്രംപ് ഇക്കാര്യം വെളിപ്പെടുത്തിയത്.

To advertise here,

തിരഞ്ഞെടുപ്പിന് ശേഷം ഡെമോക്രാറ്റിക് പാർട്ടിയുമായി ചേർന്ന് പ്രവർത്തിക്കാൻ താൻ കാത്തിരിക്കുകയാണെന്നും അവരുമായി സഹകരിച്ച് കാര്യങ്ങൾ മുന്നോട്ട് കൊണ്ടുപോകാൻ സാധിക്കുമെന്ന് കരുതുന്നതായും അദ്ദേഹം കൂട്ടിച്ചേർത്തു. കൂടാതെ, തിരഞ്ഞെടുപ്പിൽ സ്ഥാനാർഥികൾ ജയിക്കാനും തോൽക്കാനും ഉള്ള കാരണങ്ങളെക്കുറിച്ച് വിശകലനം ചെയ്യുന്ന ഒരു ‘പൊളിറ്റിക്കൽ പണ്ഡിറ്റാ’യി താൻ മാറുമെന്നും ട്രംപ് ട്രൂത്ത് സോഷ്യലിലൂടെ അറിയിച്ചു.

അതേസമയം, ട്രംപിന്റെ രാഷ്ട്രീയ നിലനിൽപ്പിനും റിപ്പബ്ലിക്കൻ പാർട്ടിക്ക് കോൺഗ്രസിലെ ഭൂരിപക്ഷം നിലനിർത്താനുള്ള അവസരത്തിനും വെല്ലുവിളി ഉയർത്തിക്കൊണ്ടാണ് തിരഞ്ഞെടുപ്പ് ഫലങ്ങൾ പുറത്തുവരുന്നത്. പ്രാഥമിക വിവരങ്ങൾ അനുസരിച്ച് ഡെമോക്രാറ്റുകൾ ജനപ്രതിനിധി സഭയിലും സെനറ്റിലും മികച്ച മുന്നേറ്റമാണ് നടത്തുന്നത്. ടെക്സസിൽ ജെയിംസ് തലാരിക്കോ, നോർത്ത് കരോളിനയിൽ റോയ് കൂപ്പർ, ജോർജിയയിൽ ജോൺ ഓസോഫ്, ഒഹായോയിൽ ഷെറോഡ് ബ്രൗൺ എന്നിവരുടെ വിജയങ്ങൾ ഡെമോക്രാറ്റുകൾക്ക് നിർണായകമായി. കൂടാതെ സൗത്ത് കരോളിന, ന്യൂ ഹാംഷെയർ എന്നിവിടങ്ങളിലും ഡെമോക്രാറ്റിക് പാർട്ടി നേട്ടമുണ്ടാക്കിയിട്ടുണ്ട്.