ന്യൂഡൽഹി: ഇന്ത്യ സന്ദർശനത്തോടനുബന്ധിച്ച് റഷ്യൻ പ്രസിഡന്റ് വ്‌ളാഡിമിർ പുതിന് ശക്തമായ സുരക്ഷയൊരുക്കി റഷ്യൻ പ്രസിഡൻഷ്യൽ സെക്യൂരിറ്റി സർവീസ്. കമാൻഡോകൾ, സ്‌നൈപ്പർമാർ, ഡ്രോണുകൾ, എഐ സംവിധാനങ്ങൾ തുടങ്ങി ഫൈവ്-ലെയർ സുരക്ഷയാണ് പുതിനായി ഒരുക്കിയിരിക്കുന്നത്. സുരക്ഷ ഉറപ്പാക്കാൻ റഷ്യയിൽ നിന്നുള്ള അമ്പതോളം ഉന്നത സുരക്ഷാ ഉദ്യോഗസ്ഥർ ഡൽഹിയിൽ എത്തിയതായി മാധ്യമങ്ങൾ റിപ്പോർട്ട് ചെയ്തു.

To advertise here,

പ്രധാനമന്ത്രി നരേന്ദ്ര മോദിയുടെ ക്ഷണപ്രകാരം ഇന്ത്യ-റഷ്യ വാർഷിക ഉച്ചകോടിയിൽ പങ്കെടുക്കാൻ ഇന്ത്യ സന്ദർശിക്കുന്ന പുതിൻ വെള്ളിയാഴ്ച വൈകുന്നേരം ഡൽഹിയിൽ എത്തും. രാഷ്ട്രപതി ഭവനിൽ പുതിന് സ്വീകരണം നൽകും. തുടർന്ന് രാജ്ഘട്ടിലെ മഹാത്മാഗാന്ധിയുടെ സ്മാരകം സന്ദർശിക്കും. വെള്ളിയാഴ്ച ഹൈദരാബാദ് ഹൗസിലെ ഉച്ചകോടിയിലും ഭാരത് മണ്ഡപത്തിലെ പരിപാടിയിലും അദ്ദേഹം പങ്കെടുക്കും. രാഷ്ട്രപതി ഭവനിൽ പ്രസിഡന്റ് ദ്രൗപതി മുർമു ഒരുക്കുന്ന വിരുന്നിലും അദ്ദേഹം പങ്കെടുക്കും.

പുതിന്റെ സുരക്ഷയ്ക്കായി സജ്ജീകരിച്ചിരിക്കുന്ന കൺട്രോൾ റൂം എല്ലായ്‌പ്പോഴും നിരീക്ഷണത്തിലുണ്ടെന്ന് പ്രത്യേക ഡ്രോണുകൾ വഴി ഉറപ്പാക്കും. സ്‌നൈപ്പർമാർ പ്രസിഡന്റിന്റെ കൂടെ എപ്പോഴും ഉണ്ടാകും . ജാമറുകൾ, എഐ മോണിറ്ററിങ്, ഫേഷ്യൽ റെക്കഗ്നിഷൻ ക്യാമറകൾ എന്നിവയും സുരക്ഷയ്ക്കായി ഒരുക്കിയിട്ടുണ്ട്.

എൻഎസ്ജി കമാൻഡോകളും ഡൽഹി പോലീസ് ഉദ്യോഗസ്ഥരും സുരക്ഷാ സംവിധാനത്തിൻ്റെ ഭാഗമായിരിക്കും. റഷ്യൻ പ്രസിഡന്റ് പ്രധാനമന്ത്രി മോദിയോടൊപ്പം ചെലവഴിക്കുന്ന സമയങ്ങളിൽ, പ്രധാനമന്ത്രിയെ സംരക്ഷിക്കുന്ന ഇന്ത്യയുടെ സ്പെഷ്യൽ പ്രൊട്ടക്ഷൻ ഗ്രൂപ്പിലെ കമാൻഡോകൾ സുരക്ഷാ വലയത്തിൽ ചേരും. സുരക്ഷാ വിഭാഗത്തിലുള്ള എല്ലാവരും കൺട്രോൾ റൂമുമായി നിരന്തരം ബന്ധപ്പെട്ടുകൊണ്ടിരിക്കും.

പുടിന്റെ സുരക്ഷാ വിശദാംശങ്ങളുടെ വലിയ ആകർഷണം കനത്ത കവചിത ആഡംബര കാറായ ഓറസ് സെനറ്റ് ആണ്. പുടിന്റെ സുഗമമായ യാത്രയ്ക്കായി മോസ്കോയിൽ നിന്ന് സെനറ്റ് വിമാനത്തിൽ കൊണ്ടുവരുന്നുണ്ടെന്നാണ് വിവരം. ഈ വർഷം ആദ്യം ചൈനയിൽ നടന്ന ഷാങ്ഹായ് സഹകരണ സംഘടനാ ഉച്ചകോടിയിൽ പ്രധാനമന്ത്രി മോദിയോടൊപ്പം സെനറ്റിൽ പുതിൻ യാത്രചെയ്തിരുന്നു.