വത്തിക്കാന്‍: ഭാരത കത്തോലിക്ക സഭയ്ക്ക് ഒരു കര്‍ദിനാളിനെക്കൂടി ലഭിക്കുന്നു. മാര്‍.ജോര്‍ജ് കൂവക്കാടിനെ കര്‍ദിനാള്‍ പദവിയിലേക്ക് ഉയര്‍ത്തുന്ന അഭിമാനമുഹൂര്‍ത്തത്തിനാണ് സഭാ മക്കള്‍ ഇന്ന് സാക്ഷ്യം വഹിക്കുക. വത്തിക്കാനിലെ സെന്റ് പീറ്റേഴ്‌സ് ബസിലിക്കയില്‍ ഇന്ത്യന്‍ സമയം രാത്രി എട്ടരയ്ക്ക് സ്ഥാനാരോഹണ ചടങ്ങുകള്‍ ആരംഭിക്കും. മാര്‍ ജോര്‍ജ് കൂവക്കാട് അടക്കം 21 പേരെയാണ് കര്‍ദിനാള്‍ പദവിയിലേക്ക് ഉയര്‍ത്തുന്നത്. ഫ്രാന്‍സിസ് മാര്‍പാപ്പയുടെ കാര്‍മികത്വത്തില്‍ എല്ലാ കര്‍ദിനാള്‍മാരുടെയും സാന്നിധ്യത്തിലാണ് തിരുക്കര്‍മ്മങ്ങള്‍. സീറോ മലബാര്‍ സഭാ മേജര്‍ ആര്‍ച്ച് ബിഷപ്പ് മാര്‍ റാഫേല്‍ തട്ടില്‍, കര്‍ദിനാള്‍ മാര്‍ ജോര്‍ജ് ആലഞ്ചേരി, ആര്‍ച്ച് ബിഷപ്പ് മാര്‍ തോമസ് തറയില്‍, ആർച്ച് ബിഷപ്പ് മാര്‍ ജോസഫ് പെരുന്തോട്ടം, മാര്‍ തോമസ് പാടിയത്ത്, മാര്‍ സ്റ്റീഫന്‍ ചിറപ്പണത്ത് ഉള്‍പ്പടെ കേരളത്തില്‍ നിന്നുള്ള സഭാ പിതാക്കന്മാരും ചടങ്ങില്‍ പങ്കെടുക്കും. രാജ്യത്തെ പ്രതിനിധീകരിച്ച്‌ സ്ഥാനാരോഹണ ചടങ്ങിന് സാക്ഷ്യം വഹിക്കാന്‍ കേന്ദ്രമന്ത്രി ജോര്‍ജ് കുര്യന്റെ നേതൃത്വത്തില്‍ ഏഴംഗ സംഘവും വത്തിക്കാനിലെ ചടങ്ങുകളില്‍ പങ്കെടുക്കാനെത്തിയിട്ടുണ്ട്‌..
കത്തോലിക്കാ സഭയിലെ രാജകുമാരന്‍മാരെന്നാണ് കര്‍ദ്ദിനാള്‍മാര്‍ അറിയപ്പെടുന്നത്. കത്തോലിക്കാസഭയിലെ പൗരോഹിത്യ ശ്രേണിയില്‍ മാര്‍പാപ്പ കഴിഞ്ഞാല്‍ ഒരു പുരോഹിതന് എത്താന്‍ കഴിയാവുന്ന ഏറ്റവും ഉയര്‍ന്ന സ്ഥാനമാണിത്. കര്‍ദ്ദിനാള്‍ തിരുസംഘത്തില്‍ അംഗമാകുന്നതോടെ മാര്‍പാപ്പയുടെ ഔദ്യോഗികമായ ഉപദേശക സംഘത്തിലാണ് മാര്‍.കൂവക്കാട് ഉള്‍പ്പെടുന്നത്.
സാധാരണഗതിയിൽ മെത്രാന്മാരാണ് കത്തോലിക്കാ സഭയില്‍ കര്‍ദിനാള്‍മാരായി ഉയര്‍ത്തപ്പെടുക. മോണ്‍. ജോര്‍ജ് കൂവക്കാടിനെ വൈദിക പദവിയില്‍ നിന്ന് നേരിട്ട് കര്‍ദിനാളായി ഉയര്‍ത്തുകയായിരുന്നു. ഇന്ത്യയില്‍ നിന്നും നേരിട്ട് കര്‍ദിനാള്‍ പദവിയിലെത്തുന്ന ആദ്യ വൈദികനാണ് മാര്‍.ജോര്‍ജ് കൂവക്കാട്. കത്തോലിക്കാ സഭയുടെ നിയമമനുസരിച്ച് സാധാരണ ഒരു വിശ്വാസിക്ക് (അല്‍മായന്‍) മാര്‍പ്പാപ്പയോ കര്‍ദിനാളോ ആകുന്നതിന് തടസമൊന്നുമില്ല.
മാര്‍പ്പാപ്പമാരെ തിരഞ്ഞെടുക്കാന്‍ വോട്ടവകാശമുള്ളത് 80 വയസില്‍ താഴെ പ്രായമുള്ള കര്‍ദിനാള്‍മാര്‍ക്കാണ്. കാത്തലിക് എന്ന വാക്കിന്റെ അര്‍ത്ഥം യൂണിവേഴ്‌സല്‍ (എല്ലാവരെയും ഉള്‍ക്കൊള്ളുന്നത്). റോമന്‍ കത്തോലിക്കാ സഭയും വ്യക്തിഗത സ്വഭാവ വിശേഷമുള്ള 23 പൗരസ്ത്യ കത്തോലിക്കാ സഭകളും ചേരുന്നതാണ് ആഗോള കത്തോലിക്കാ സഭ.
നിര്‍ണായക കാര്യങ്ങളില്‍ തീരുമാനമെടുക്കാന്‍ പോപ്പിന് കര്‍ദ്ദിനാള്‍ തിരുസംഘത്തെ കൂട്ടായോ, കര്‍ദ്ദിനാള്‍മാരെ ഒറ്റയ്ക്കോ വിളിക്കാം. കൂടാതെ കര്‍ദ്ദിനാള്‍മാര്‍ക്ക് രൂപതയുടേയോ അതിരൂപതയുടേയോ ചുമതലയുണ്ടാകും. അല്ലെങ്കില്‍ റോമില്‍ പോപ്പിന്റെ ഓഫീസായ കൂരിയയില്‍ ഏതെങ്കിലും വിഭാഗത്തിന്റെ ചുമതലക്കാരനായിരിക്കും. പോപ്പ് കാലം ചെയ്യുകയോ, സ്ഥാനത്യാഗം ചെയ്യുകയോ ചെയ്ത് ആ സ്ഥാനത്തേക്ക് തിരഞ്ഞെടുപ്പ് വരുമ്പോള്‍ കര്‍ദ്ദിനാള്‍മാരാണ് പുതിയ പോപ്പിനെ തിരഞ്ഞെടുക്കുന്നത്. പോപ്പിന്റെ സ്ഥാനം ഒഴിയുന്ന ദിവസം 80 വയസ്സ് തികയാത്ത കര്‍ദ്ദിനാള്‍മാര്‍ക്കാണ് വോട്ടവകാശമുള്ളത്. ബിഷപ്പിന്റെ വേഷവിധാനങ്ങളില്‍ നിന്ന് കര്‍ദ്ദിനാളിന്റെ വേഷത്തിന് വ്യത്യാസമുണ്ട്. കുപ്പായത്തിന് ചുവപ്പ് നിറമാണ്. കൂടാതെ പ്രത്യേക തരത്തിലുള്ള ചുവപ്പ് ആലങ്കാരിക തൊപ്പിയും ഉണ്ടാകും. 90 രാജ്യങ്ങളില്‍ നിന്നുള്ള 253 പേരടങ്ങുന്നതാണ് ഇപ്പോഴത്തെ കര്‍ദിനാള്‍ തിരുസംഘം. ഇതില്‍ മാര്‍പാപ്പയെ തിരഞ്ഞെടുക്കാന്‍ യോഗ്യരായ 80 വയസ്സിനു താഴെയുള്ളവര്‍ 140 ആണ്.
ഇറ്റലിക്കാരനായ 99 വയസ്സുള്ള ആഞ്ചലോ അച്ചേര്‍ബിയാണ് കര്‍ദ്ദിനാള്‍ സംഘത്തിലെ ഏറ്റവും പ്രായമുള്ളയാള്‍. 44 വയസ്സുമാത്രമുള്ള യുക്രേനിയക്കാരന്‍ മൈക്കോല ബെചോക്ക് ആണ് ഏറ്റവും പ്രായം കുറഞ്ഞ കര്‍ദ്ദിനാള്‍.
വിജാഗിരി എന്നര്‍ഥമുളള കാര്‍ദോ എന്ന ഗ്രീക്ക് പദത്തില്‍ നിന്നാണ് കര്‍ദ്ദിനാള്‍ എന്ന വാക്കുണ്ടായത്. യേശുവിലേക്കുളള സഭയുടെ കവാടമായ മാര്‍പാപ്പയുടെ ശുശ്രൂഷയിലുള്ള കര്‍ദ്ദിനാള്‍മാരുടെ പ്രാധാന്യമാണ് ഇത് സൂചിപ്പിക്കുന്നത്.
ചങ്ങനാശ്ശേരിക്കടുത്ത് മാമ്മൂട്ടില്‍ കൂവക്കാട് ജേക്കബ് വര്‍ഗീസ്, ത്രേസ്യാമ്മ ദമ്പതിമാരുടെ മകനാണ് മാര്‍ ജോര്‍ജ് കൂവക്കാട്. ചെത്തിപ്പുഴ ക്രിസ്തുജ്യോതി സ്‌കൂളിലായിരുന്നു പ്രാഥമിക വിദ്യാഭ്യാസം. ചങ്ങനാശ്ശേരി സെയ്ന്റ് ബര്‍ക്കുമാന്‍സ് കോളേജില്‍നിന്ന് പ്രീഡിഗ്രിയും രസതന്ത്രത്തില്‍ ബിരുദവും നേടി.
കുറിച്ചി മൈനര്‍ സെമിനാരിയിലെ പരിശീലനത്തിനുശേഷം ആലുവ സെയ്ന്റ് ജോസഫ് പൊന്തിഫിക്കല്‍ സെമിനാരിയില്‍ തത്വശാസ്ത്രപഠനം, റോമിലെ ദേ സാപിയന്‍സേ യൂണിവേഴ്സിറ്റിയില്‍ ദൈവശാസ്ത്രപഠനം പൂര്‍ത്തിയാക്കി. 2004 ജൂലായ് 24-ന് മാര്‍ ജോസഫ് പൗവ്വത്തിലില്‍നിന്നും പൗരോഹിത്യം സ്വീകരിച്ചു. അതിരൂപതയുടെ തീര്‍ത്ഥാടനകേന്ദ്രമായ പാറേല്‍ സെയ്ന്റ് മേരീസ് പള്ളിയിലെ പൗരോഹിത്യശുശ്രൂഷയ്ക്കുശേഷം റോമില്‍ ഉപരിപഠനം.
പൗരോഹിത്യത്തിന്റെ 20-ാം വര്‍ഷമാണ് കര്‍ദ്ദിനാള്‍ പദവിയിലേക്ക് എത്തുന്നത്. മലയാളത്തിന് പുറമെ സ്പാനിഷ്, ഇറ്റാലിയന്‍, ഫ്രഞ്ച്, ഇംഗ്ലീഷ് ഭാഷകളിലും പ്രാവീണ്യം നേടിയിട്ടുണ്ട്.
2006-ല്‍ വത്തിക്കാനിലെ സെക്രട്ടറിയേറ്റ് ഓഫ് സ്റ്റേറ്റിന്റെ ഡിപ്ലോമാറ്റിക് സര്‍വീസില്‍ ചേര്‍ന്നു. അള്‍ജീറിയ, സൗത്ത് കൊറിയ, ഇറാന്, കോസ്റ്റാറിക്ക, വെനസ്വേല തുടങ്ങിയ നൂണ്‍ഷ്യേച്ചറുകളിലെ സേവനത്തിനുശേഷം 2020-ല്‍ വത്തിക്കാനില്‍ തിരിച്ചെത്തി. സെക്രട്ടേറിയറ്റ് ഓഫ് സ്റ്റേറ്റില്‍ ജോലി ആരംഭിച്ചു. 2021-മുതല്‍ ഫ്രാന്‍സിസ് മാര്‍പാപ്പയുടെ അന്താരാഷ്ട്രയാത്രകളുടെ ചുമതല നിര്‍വഹിക്കുന്നു.
ഒക്ടോബര്‍ ആറിന് മധ്യാഹ്നപ്രാര്‍ഥനയ്ക്കിടെയാണ് ഫ്രാന്‍സിസ് മാര്‍പാപ്പ, ജോര്‍ജ് കൂവക്കാടിനെ കര്‍ദ്ദിനാളായി പ്രഖ്യാപിച്ചത്.
നേരിട്ട് കര്‍ദ്ദിനാളായി ഉയര്‍ത്തപ്പെട്ട ജോര്‍ജ് ജേക്കബ്ബ് കൂവക്കാടിനെ, ഔദ്യോഗിക സ്ഥാനാരോഹണത്തിന് മുന്നോടിയായി നവംബര്‍ 25 ന് ആര്‍ച്ച് ബിഷപ്പായി പ്രഖ്യാപിച്ചു. പുരാതന പൗരസ്ത്യ സുറിയാനി സഭാ കേന്ദ്രമായിരുന്ന നിസിബിസിലുണ്ടായിരുന്ന കല്‍ദായ കത്തോലിക്കാ രൂപതയുടെ സ്ഥാനിക ആര്‍ച്ച് ബിഷപ്പ് സ്ഥാനമാണ് അദ്ദേഹത്തിന് നല്‍കിയിരിക്കുന്നത്.
റോമന്‍ കത്തോലിക്കാ സഭ (ലത്തീന്‍)യും വ്യക്തിഗത സ്വഭാവ വിശേഷമുള്ള 23 പൗരസ്ത്യ കത്തോലിക്കാ സഭകളും ചേരുന്നതാണ് ആഗോള കത്തോലിക്കാ സഭ. ഇതിലെ രണ്ടു പൗരസ്ത്യ സഭകളാണ് കേരളത്തില്‍ നിന്നുള്ള സിറോ മലബാര്‍ സഭയും സിറോ മലങ്കര സഭയും. സിറോ മലബാര്‍ സഭയുടെ മുന്‍ അധ്യക്ഷന്‍ മാര്‍ ജോര്‍ജ് ആലഞ്ചേരിയും സിറോ മലങ്കര സഭയുടെ പരമാധ്യക്ഷന്‍ ബസേലിയോസ് മാര്‍ ക്ലീമീസുമാണ് കേരളത്തില്‍ നിന്നുള്ള ഇപ്പോഴത്തെ കര്‍ദിനാള്‍മാര്‍. അവരുടെ നിരയിലേക്കാണ് ഇപ്പോള്‍ മാര്‍.ജോര്‍ജ് കൂവക്കാട്ടും ഉയരുന്നത്.
Content Highlights: kerala born monsignor george jacob koovakads elevation to cardinal today
Published: 07 Dec 2024, 06:14 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented