ന്യൂഡൽഹി: ചില യാദൃച്ഛികതകൾക്ക് വിശദീകരണം നൽകുക എളുപ്പമായിരിക്കില്ല. നേപ്പാളിലെ ഭൂകമ്പത്തിന് പിന്നാലെ 26 എന്ന തീയതിയിൽ സംഭവിച്ച ദുരന്തങ്ങളുടെ യാദൃച്ഛികതകളേപ്പറ്റിയാണ് സോഷ്യൽ മീഡിയയിൽ വലിയ ചർച്ച നടക്കുന്നത്. ലോകത്തിലെയും പ്രത്യേകിച്ച് ഇന്ത്യയിലെയും ചില ദുരന്ത സംഭവങ്ങളുടെ ചരിത്രം പരിശോധിച്ചാൽ പലതും 26 എന്ന തീയതിയിലാണ് സംഭവിച്ചിരിക്കുന്നത് എന്നതാണ് ഈ ചർച്ചകൾക്ക് അടിസ്ഥാനം.

To advertise here,

പ്രകൃതിദുരന്തങ്ങളുടെയും വൻ അപകടങ്ങളുടെയും ചരിത്രം പരിശോധിക്കുമ്പോഴാണ് ഇത്തരത്തിൽ 26-ാം തീയതികളിലുണ്ടായ ദുരന്തങ്ങളുടെ വലിയ പട്ടികയിൽ കണ്ണുടക്കുന്നത്. നേപ്പാളിലെ പ്രളയം 2024 ഓഗസ്റ്റ് 26-ന് സംഭവിച്ചതോടെയാണ് 26 എന്ന സംഖ്യ വീണ്ടും ആഗോളതലത്തിൽ ചർച്ചയായത്. മുൻപും സംഭവിച്ചിട്ടുള്ള പല ദുരന്തങ്ങളും 26 എന്ന ദിനത്തിലായിരുന്നു എന്നാണ് പലരും ചൂണ്ടിക്കാട്ടുന്നത്. എന്നാൽ, കേവലം യാദച്ഛികത എന്നതിലപ്പുറം മറ്റ് അത്ഭുതങ്ങളൊന്നും ഇതിൽ ഇല്ലെന്ന് വിലയിരുത്തുന്നവരും കുറവല്ല.

2001 ജനുവരി 26-ന് ഗുജറാത്തിനെ വിറപ്പിച്ച ഭൂചലനം, 2004 ഡിസംബർ 26-ലെ സുനാമി, 2005 ജൂലൈ 26-ലെ മുംബൈ പ്രളയം, 2008 നവംബർ 26-ലെ മുംബൈ ഭീകരാക്രമണം എന്നിങ്ങനെ മനുഷ്യരാശിയെ നടുക്കിയ പല സംഭവങ്ങളും നടന്നിരിക്കുന്നത് 26-ാം തീയതികളിലാണ്. 26 എന്ന തീയതിയിൽ ചരിത്രത്തിന്റെ താളുകളിൽ രേഖപ്പെടുത്തപ്പെട്ട ചില വലിയ ദുരന്തങ്ങൾ ഇവയാണ്:

ഗുജറാത്ത് ഭൂകമ്പം (2001 ജനുവരി 26): ഗുജറാത്തിലെ ഭുജ് മേഖലയെ പിടിച്ചുകുലുക്കിയ ഭീകരമായ ഭൂകമ്പമുണ്ടായത് ഒരു 26-ാം തീയതിയാണ്. റിക്ടർ സ്കെയിലിൽ 7.7 തീവ്രത രേഖപ്പെടുത്തിയ ഈ ഭൂകമ്പത്തിൽ 20,000-ലധികം ആളുകൾക്ക് ജീവൻ നഷ്ടപ്പെടുകയും ലക്ഷക്കണക്കിന് ആളുകൾ ഭവനരഹിതരാവുകയും ചെയ്തു.

സുനാമി (2004 ഡിസംബർ 26): ഇന്തോനേഷ്യയിലെ സുമാത്ര തീരത്തുണ്ടായ 9.1 തീവ്രത രേഖപ്പെടുത്തിയ വൻ ഭൂകമ്പത്തെ തുടർന്ന് രൂപപ്പെട്ട സുനാമി ഇന്ത്യക്കാരുടെ മനസ്സിൽ ഇന്നും മായാത്ത മുറിവാണ്. ഇന്ത്യ, ശ്രീലങ്ക, ഇന്തോനേഷ്യ തുടങ്ങിയ രാജ്യങ്ങളിലായി രണ്ടര ലക്ഷത്തോളം മനുഷ്യരുടെ ജീവനാണ് അന്ന് സുനാമി കവർന്നെടുത്തത്.

മുംബൈ മഹാപ്രളയം (2005 ജൂലൈ 26): മഹാരാഷ്ട്രയെയും ഇന്ത്യയുടെ വാണിജ്യ തലസ്ഥാനമായ മുംബൈയെയും സ്തംഭിപ്പിച്ച പ്രളയം ഉണ്ടായത് 2005 ജൂലൈ 26-നായിരുന്നു. പെട്ടെന്നുണ്ടായ അതിതീവ്ര മഴയിൽ ആയിരത്തോളം പേർക്ക് ജീവൻ നഷ്ടപ്പെടുകയും കോടിക്കണക്കിന് രൂപയുടെ നാശനഷ്ടങ്ങൾ സംഭവിക്കുകയും ചെയ്തു.

അഹമ്മദാബാദ് ബോംബ് സ്ഫോടന പരമ്പര (2008 ജൂലൈ 26): ഗുജറാത്തിലെ അഹമ്മദാബാദ് നഗരത്തിൽ 70 മിനിറ്റിനുള്ളിൽ 21 സ്ഥലങ്ങളിലായി നടന്ന ബോംബ് സ്ഫോടന പരമ്പര രാജ്യത്തെ നടുക്കിയ ഒന്നാണ്. 56 പേർ കൊല്ലപ്പെടുകയും 200-ലേറെ പേർക്ക് പരിക്കേൽക്കുകയും ചെയ്ത ഈ ആക്രമണം നടന്നതും ഒരു ജൂലൈ 26-നായിരുന്നു.

മുംബൈ ഭീകരാക്രമണം (2008 നവംബർ 26): ഇന്ത്യൻ ചരിത്രത്തിലെ ഏറ്റവും ക്രൂരവും ദാരുണവുമായ ഭീകരാക്രമണങ്ങളിലൊന്നായ '26/11' മുംബൈ ആക്രമണം ലോകത്തെയാകെ ഞെട്ടിച്ച ഒന്നായിരുന്നു. കടൽമാർഗ്ഗം എത്തിയ ഭീകരർ ഛത്രപതി ശിവജി മഹാരാജ് ടെർമിനസ്, താജ് ഹോട്ടൽ തുടങ്ങി മുംബൈയിലെ പ്രമുഖ കേന്ദ്രങ്ങളിൽ നടത്തിയ ആക്രമണത്തിൽ 166-ലേറെ പേരാണ് കൊല്ലപ്പെട്ടത്.

മറ്റ് ആഗോള ദുരന്തങ്ങൾ:

ഇന്ത്യയിൽ മാത്രമല്ല, ലോകത്തിന്റെ പല ഭാഗങ്ങളിലും 26 എന്ന തീയതിയുമായി ബന്ധപ്പെട്ട് ദാരുണമായ നിരവധി സംഭവങ്ങൾ നടന്നിട്ടുണ്ട്:

  • ജപ്പാനിലെ വടക്കൻ ഇസുവിൽ 1930 നവംബർ 26-നുണ്ടായ ഭൂകമ്പത്തിൽ 272-ഓളം പേർ കൊല്ലപ്പെട്ടു.
  • 1932 സെപ്റ്റംബർ 26-നായിരുന്നു ഗ്രീസിലെ ലെറിസോസിലുണ്ടായ ഭൂകമ്പം. 272 ഓളം പേരായിരുന്നു അന്ന് മരിച്ചത്.
  • 1939 ഡിസംബർ 26-ന് തുർക്കിയിലെ എർസിങ്കയിലുണ്ടായ ഭൂകമ്പത്തിൽ 32,700 പേരാണ് കൊല്ലപ്പെട്ടത്.
  • 1942 ഏപ്രിൽ 26-നാണ് ചൈനയിലെ ബെൻസിബു കോളിയറി ദുരന്തം ഉണ്ടായത്.
  • 1943 നവംബർ 26-നാണ് തുർക്കിയിലെ ലാഡിക്കിൽ ഭൂകമ്പമുണ്ടായത്. 4,020 പേർ മരിച്ചു.
  • 1963 ജൂലൈ 26-ന് യൂഗോസ്ലോവാക്യയിലെ സ്കോപ്ജെ ഭൂകമ്പത്തിൽ 1,070 പേർ കൊല്ലപ്പെടുകയും രണ്ടു ലക്ഷത്തിലേറെ പേർക്ക് വീടുകൾ നഷ്ടപ്പെടുകയും ചെയ്തു.
  • 1986 ഏപ്രിൽ 26-നായിരുന്നു ലോകത്തെ നടുക്കിയ ചെർണോബിൽ ആണവ ദുരന്തം.
  • 1987 നവംബർ 26-നായിരുന്നു ഇന്തോനേഷ്യയിലെ പന്തറിലുണ്ടായ ഭൂകമ്പവും സുനാമിയും.
  • 1990 ഏപ്രിൽ 26-നാണ് ചൈനയിലെ ഗോങ്ഹെ ഭൂകമ്പം ഉണ്ടായത്.
  • 1991 മേയ് 26-നായിരുന്നു 223 പേരുടെ ജീവനെടുത്ത ലൗഡ എയർ ഫ്ലൈറ്റ് 004 അപകടം.
  • 2002 മാർച്ച് 25-26 തീയതികളിലാണ് അഫ്ഗാനിസ്താനിൽ 1,800-ഓളം പേരുടെ മരണത്തിനിടയാക്കിയ ഭൂകമ്പം ഉണ്ടായത്.
  • 2003 സെപ്റ്റംബർ 26-നായിരുന്നു ജപ്പാനിലെ തൊകാച്ചിയിലുണ്ടായ ഭൂകമ്പം.
  • 2003 ഡിസംബർ 26-ന് ഇറാനിലെ ബാമിലുണ്ടായ ഭൂകമ്പത്തിൽ 31,000-ത്തിലേറെ പേർ മരിച്ചു.
  • 2006 മേയ് 26-നായിരുന്നു ഇന്തോനേഷ്യയിലെ യോഗ്യകാർത്താ ഭൂകമ്പം. 5,700-ലേറെ പേർ മരിച്ചു.
  • 2015 ഒക്ടോബർ 26-നാണ് 400-ലേറെ പേരുടെ ജീവനെടുത്ത ഹിന്ദുക്കുഷ് ഭൂകമ്പം ഉണ്ടായത്.
  • 2021 ഓഗസ്റ്റ് 26-നായിരുന്നു കാബൂൾ വിമാനത്താവളത്തിൽ ബോംബാക്രമണം നടന്നത്. 13 യു.എസ്. സൈനികർ ഉൾപ്പെടെ 183 മരണം.
  • 2023 സെപ്റ്റംബർ 26-ന് ഇറാഖിലെ ഖാരാകോഷിൽ വിവാഹ ഹാളിലുണ്ടായ തീപ്പിടിത്തത്തിൽ നൂറോളം പേർ മരിച്ചു.