പബ്ലിക് അക്കൗണ്ട്സ് കമ്മിറ്റി; കണക്കിലെ കളികളും കാത്തിരിക്കുന്ന വെല്ലുവിളികളും

പബ്ലിക്  അക്കൗണ്ട്സ് കമ്മിറ്റിക്ക് വീണ്ടും പ്രാധാന്യം കൈവരുമ്പോൾ

2014, 2019 ൽ നിന്നും വ്യത്യസ്തമായി പ്രതിപക്ഷത്തിനു കൃത്യമായ സ്വാധീനമുള്ള ഒരു ലോക്സഭയാണ് 2024 ൽ തിരെഞ്ഞെടുക്കപ്പെട്ടിട്ടുള്ളത്. കോൺഗ്രസ് മുഖ്യ പ്രതിപക്ഷ പാർട്ടിയിൽ നിന്നും പ്രതിപക്ഷ പാർട്ടിയായി മാറി. രാഹുൽ ഗാന്ധി പ്രതിപക്ഷത്തെ പ്രധാന നേതാവിൽ നിന്നും അംഗീകൃത പ്രതിപക്ഷ നേതാവായി മാറി. വ്യക്തി കേന്ദ്രീകൃതമായ നരേന്ദ്ര മോദി ഭരണം എൻഡിഎ എന്ന മുന്നണി ഭരണത്തിലേക്കു ചുരുക്കപ്പെട്ടു. പ്രതിപക്ഷം ഒരു ശക്തമായ ഒരു ഇന്ത്യ മുന്നണി എന്ന നിലയിൽ സഭയിൽ സജീവമായി മാറി. ഈയൊരു സാഹചര്യത്തിൽ കേന്ദ്രസർക്കാരിൻ്റെ സാമ്പത്തിക ക്രയവിക്രിയങ്ങളും അവയുമായി ബന്ധപ്പെട്ട റിപ്പോർട്ടുകളും എല്ലാം സൂഷ്മമായി വിലയിരുത്താനുള്ള ഒരു ആത്മവിശ്വാസം പബ്ലിക് അക്കൗണ്ട്സ് കമ്മിറ്റിക്കു കൈവരും. പ്രതിപക്ഷത്ത് നരേന്ദ്ര മോദിക്കെതിരേ മുൻകാലങ്ങളിൽ സഭയ്ക്കകത്തും പുറത്തും രാഹുൽ ഗാന്ധിയോടൊപ്പം നിലകൊണ്ട ഒരു വ്യക്തി കൂടിയായ കെ.സി വേണുഗോപാൽ തന്നെ പബ്ലിക് അക്കൗണ്ട്സ് കമ്മറ്റിയുടെ ചെയർമാൻ ആയി വരുമ്പോൾ രാജ്യത്തെ ഭരണം സുതാര്യം ആവണം എന്നാഗ്രഹിക്കുന്ന പൊതു സമൂഹത്തിന് പ്രതീക്ഷകൾ ഏറെയാണ്. 

കമ്മിറ്റിക്കു മുന്നിലുള്ള പ്രധാന വെല്ലുവിളി

പാർലമെൻ്റിൽ സമർപ്പിക്കുന്ന കൺട്രോളർ ആൻഡ് ഓഡിറ്റർ ജനറലിൻ്റെ (സിഎജി) ഓഡിറ്റ് റിപ്പോർട്ട് പരിശോധിക്കലാണ് പബ്ലിക് അക്കൗണ്ട്സ് കമ്മിറ്റിയുടെ പ്രധാന ഉത്തരവാദിത്വങ്ങളിൽ ഒന്ന്. പക്ഷേ,  എത്രത്തോളം ഓഡിറ്റ് റിപ്പോർട്ടുകൾ പാര്‍ലമെൻ്റിൽ സമർപ്പിക്കപ്പെടുന്നുണ്ട് എന്ന് പരിശോധിക്കപ്പെടേണ്ടതുണ്ട്. 2019- 23 കാലഘട്ടത്തിൽ ശരാശരി 22 റിപ്പോർട്ടുകൾ മാത്രമാണ് പാര്‍ലമെൻ്റിന് മുമ്പാകെ സമർപ്പിക്കപ്പെട്ടത് എന്ന് ദി ഹിന്ദു മുൻപ് റിപ്പോർട്ട് ചെയ്തിരുന്നു. കേന്ദ്ര സർക്കാരുമായി ബന്ധപ്പെട്ട് 2015ൽ 55 റിപ്പോർട്ടുകൾ പാര്‍ലമെൻ്റിൽ സമർപ്പിക്കപ്പെട്ടുവെങ്കിൽ 2020ൽ അത് കേവലം 14 ആയി ചുരുങ്ങി എന്നും 75% കുറവ് സിഎജി റിപ്പോർട്ട് സമർപ്പണത്തിൻ്റെ കാര്യത്തിൽ ഉണ്ടായി എന്നും പ്രമുഖ മാധ്യമ പ്രവർത്തകനായ ആകാർ പട്ടേൽ ചൂണ്ടിക്കാട്ടിയിരുന്നു. കേന്ദ്രസർക്കാരിൻ്റെ പ്രവർത്തനങ്ങളെ വിമർശനാത്മകമായി നിരീക്ഷിക്കുന്ന സിഎജി റിപ്പോർട്ടുകൾ പാര്‍ലമെൻ്റിൽ സമർപ്പിക്കുന്നതിൽ വീഴ്ചവരുത്തുന്ന കേന്ദ്ര സർക്കാർ സമീപനത്തിനെതിരെ 2023 നവംബറിൽ 80 ലധികം വരുന്ന റിട്ടയർഡ് ബ്യൂറോക്രാറ്റ്സ്, രാഷ്ട്രപതി ദ്രൗപദി മുർമുവിന് കത്ത് നൽകിയിരുന്നു. സാമ്പത്തിക ക്രയവിക്രിയങ്ങൾ വസ്തുനിഷ്ഠമായി ഓഡിറ്റ് ചെയ്യേണ്ട സിഎജിയിലും ഉദ്യോഗസ്ഥ ഒഴിവുകൾ നികത്തുന്നതിൽ ഈ കാലയളവിൽ ഗണ്യമായി കുറവുണ്ടായി എന്നതും ഒരു വസ്തുതയാണ്. 2013- 14 കാലഘട്ടത്തിൽ സിഎജിയിൽ 48253 ഉദ്യോഗസ്ഥരുണ്ടായിരുന്നുവെങ്കിൽ 2021-22 കാലത്തെ കണക്കുകൾ പ്രകാരം 41675 ഉദ്യോഗസ്ഥരായി ചുരുങ്ങി. 2015-16 ൽ 789 IA & AS ഓഫീസർമാർ ഉണ്ടായിരുന്നുവെങ്കിൽ 2021 -22 ൽ അത് 533 ആയി കുറഞ്ഞു.

അതു കൊണ്ട് തന്നെ സിഎജി യിൽ ഉണ്ടാകുന്ന ഒഴിവുകളിൽ എത്രയും പെട്ടെന്ന് നിയമനം നടത്താൻ കേന്ദ്ര സർക്കാരിനെ പ്രേരിപ്പിക്കുക എന്നതു പ്രതിപക്ഷത്തിൻ്റെ പ്രധാന ആവശ്യമായി വരേണ്ടതുണ്ട്. ഓഡിറ്റ് ചെയ്യപ്പെട്ട സിഎജി റിപ്പോർട്ടുകൾ പാര്‍ലമെൻ്റിനു മുമ്പാകെ സമർപ്പിക്കപ്പെടുന്നു എന്നു ഉറപ്പുവരുത്തേണ്ടതുമുണ്ട്. അതിൽ വസ്തുനിഷ്ഠമായ വിമർശനാത്മകമായ വിശകലനം നടത്തുവാൻ പബ്ലിക് അക്കൗണ്ട്സ് കമ്മിറ്റിക്കു കഴിയേണ്ടതുണ്ട്. 

'പബ്ലിക് അക്കൗണ്ട്സ് കമ്മറ്റിയിലൂടെയാണ് ജനങ്ങൾ സർക്കാരിൻ്റെ  ധനകാര്യ ഇടപെടലുകളെ നിരീക്ഷിക്കുന്നതെന്നും കമ്മറ്റിയുടെ  സർക്കാരിൻ്റെ ഫണ്ട് ദുരപയോഗം, അഴിമതി, പണം പാഴാക്കൽ  തുടങ്ങിയവ ൾപ്പെടെയുള്ള ശ്രദ്ധയിൽ കൊണ്ടുവരിക എന്നതാണ് പബ്ലിക് അക്കൗണ്ട്സ് കമ്മറ്റിയുടെ ഉത്തരവാദിത്വമെന്ന് ' കമ്മിറ്റിയുടെ നൂറാം വാർഷിക വേളയിൽ 2021 ഡിസംബറിൽ ഇന്ത്യൻ പ്രസിഡണ്ട് ശ്രീ രാംനാഥ് ഗോവിന്ദ് എടുത്തു പറയുകയുണ്ടായി. പതിനെട്ടാം ലോക്‌സഭ തികച്ചും ഏകപക്ഷീയമായി പോവരുത് എന്ന് തെരെഞ്ഞെടുപ്പിലൂടെ ജനം വിധി എഴുതി. അതിൻ്റെ പ്രതിഫലനം പാര്‍ലമെൻ്റിൻ്റെ പ്രവർത്തനത്തിൽ ചെറിയ തോതിലെങ്കിലും കണ്ടു തുടങ്ങിയ സാഹചര്യത്തിൽ കൂടുതൽ സി എ ജി റിപ്പോർട്ടുകൾ പാര്‍ലമെൻ്റിലും തുടർന്നു പബ്ലിക് അക്കൗണ്ട്സ് കമ്മിറ്റിക്കു മുമ്പാകെ പരിശോധനയ്ക്കു വിധേയമാകും എന്നും പ്രതീക്ഷിക്കാം. അതുവഴി സർക്കാർ പ്രവർത്തനങ്ങൾ സുതാര്യമാണെന്ന് ജനങ്ങൾക്ക് ഉറപ്പുവരുത്താം. ജനതയുടെ കണ്ണും ശബ്ദമാകുവാൻ കെ.സി. വേണുഗോപാലിൻ്റെ നേതൃത്വത്തിലുള്ള പബ്ലിക് അക്കൗണ്ട്സ് കമ്മിറ്റിക്കു കഴിയട്ടെ.