സിഖ്സ് ഫോർ ജസ്റ്റിസിനെ എങ്ങനെ പൂട്ടും ഇന്ത്യ? വഴങ്ങുമോ യു.എസും കാനഡയും

ഇപ്പോഴും തുടർന്നുകൊണ്ടിരിക്കുന്ന ഈ ഹിതപരിശോധനകളാണ് ഇക്കാലമത്രയും എസ്എഫ്ജെ ഏറ്റെടുത്തിട്ടുള്ളതിൽ വെച്ച് ഏറ്റവും പ്രധാനപ്പെട്ട പ്രഖ്യാപനം. ഇന്ത്യയിൽ നിന്ന് പഞ്ചാബിനെ വേർപെടുത്തുമെന്നും അതിനായി ജനഹിതപരിശോധന നടത്തുമെന്നും ഇവർ ആവർത്തിച്ചുകൊണ്ടേയിരിക്കുന്നു. ഇതിന്റെ ഫലം ഐക്യരാഷ്ട്രസഭയ്ക്ക് മുന്നിൽ അവതരിപ്പിക്കുമെന്നും ഇവർ വ്യക്തമാക്കുന്നു. ഈ പ്രക്രിയ വലിയ വിജയമാണെന്നും ജനങ്ങളിൽ നിന്ന് മികച്ച പ്രതികരണമാണ് ലഭിക്കുന്നതെന്നും പന്നൂനും സംഘവും പറയുമ്പോൾ വോട്ടെടുപ്പിനെ ശുദ്ധ അസംബന്ധമായാണ് മേഖലയിലെ വിദ​ഗ്ധർ നോക്കിക്കാണുന്നത്. 

ആദ്യമായി ലണ്ടൻ കേന്ദ്രീകരിച്ച് നടത്തിയ വോട്ടെടുപ്പ് വലിയ പരാജയമായതായാണ് പുറത്തുവന്ന റിപ്പോർട്ടുകൾ. 2000-ത്തിൽ താഴെ ആളുകൾ മാത്രമാണ് തങ്ങളുടെ വോട്ട് രേഖപ്പെടുത്തിയത്. അതും കൃത്യമായ തിരിച്ചറിയൽ രേഖകളോ ഒരു വോട്ടിങ് പ്രക്രിയയ്ക്ക് പാലിക്കേണ്ട മര്യാദകളോ കാറ്റിൽപ്പറത്തിക്കൊണ്ടായിരുന്നു എസ്എഫ്ജെ വോട്ടെടുപ്പ് നടത്തിയത്. ഈ രീതിയിൽ ഊരോ പേരോ വ്യക്തമാക്കാതെ ആർക്കും വന്ന് വോട്ട് ചെയ്ത് പോകാനാകുന്ന ഒരു സംവിധാനമാണ് സംഘം ഒരുക്കിയത്. 

സിഖ് വിഘടനവാദത്തിന്റെ തുടക്കക്കാലത്തും പിന്നീടിങ്ങോട്ടും  ഇന്ത്യയിലേയും പാകിസ്താനിലേയും പഞ്ചാബുകൾ ഉൾപ്പെടുന്നതായിരുന്നു ഈ പറയുന്ന 'സിഖ് രാഷ്ട്രം'. ഹരിയാണയും ഹിമാചലും മുതൽ ലാഹോർ വരെ തങ്ങളുടെ ഭാ​ഗമാക്കണമെന്നായിരുന്നു ഇവരുടെ ആ​ഗ്രഹവും. എന്നാൽ, ഇപ്പോൾ കാര്യങ്ങൾ ഈ രീതിയിലല്ല മുന്നോട്ട് പോകുന്നത്. ഇന്ത്യൻ പഞ്ചാബിന്റെ കാര്യത്തിൽ മാത്രമാണ് എസ്എഫ്ജെയ്ക്ക് ഈ അങ്കലാപ്പുള്ളത്. ഇന്ത്യയിലെ പഞ്ചാബിനേക്കാൾ നാലിരട്ടി വലിപ്പമുള്ളതും സിഖ് ജനതയുടെ ചരിത്രരപമായ മാതൃരാജ്യവുമായ പാകിസ്താനിലെ പഞ്ചാബിനെക്കുറിച്ചുള്ള നയം ഇവർ സൗകര്യപൂർവം മറന്നമട്ടാണ്. സിഖ് വിശ്വാസവുമായി ഏറെ ബന്ധപ്പെട്ട് നിൽക്കുന്ന ​ഗുരു നാനാക്കിന്റെ ജന്മസ്ഥലവും പാകിസ്താനിലെ പഞ്ചാബിലാണ്. ഈ അവസരവാദമാണ് രാഷ്ട്രീയമായി രൂപകൽപന ചെയ്ത ഒന്നാണോ ഇപ്പോഴത്തെ ഖലിസ്താൻ വാദം എന്ന ചോദ്യത്തെ പ്രസക്തമാക്കുന്നത്. 

സംഘടനയ്ക്കും ഈ പദ്ധതിക്കും പാകിസ്താൻ പിന്തുണയേകുന്നുണ്ടെന്ന വാദം പഞ്ചാബ് പോലീസ് നേരത്തെ ഉന്നയിച്ചിരുന്നു. കറാച്ചി ആസ്ഥാനമായുള്ള ഒരു വെബ്സൈറ്റുമായി എസ്എഫ്ജെ വെബ്സൈറ്റ് അവരുടെ ഡൊമൈൻ പങ്കിടുന്നുവെന്നും റിപ്പോർട്ടുകളുണ്ടായിരുന്നു. റഫറണ്ടം 2020-ന് പിന്തുണയേകണമെന്ന് ആവശ്യപ്പെട്ടുകൊണ്ട് പാക് പ്രധാനമന്ത്രി ഇമ്രാൻ ഖാന് പന്നൂൻ നേരിട്ടയച്ച കത്തും പഞ്ചാബ് പോലീസിന്റെ രേഖകളിലുണ്ട്.

വീണവരിൽ സാക്ഷാൽ ഇന്ദിരയും

സ്വതന്ത്ര ഇന്ത്യയോളം തന്നെ പഴക്കമുള്ളതാണ് ഇപ്പോൾ നമ്മൾ കാണുന്ന ഈ ഖലിസ്താൻ വാദം. അന്ന് പക്ഷേ അതിന് പ്രത്യേക സംഘടനയോ പേരോ ഒന്നും ഇല്ലായിരുന്നു എന്ന് മാത്രം. സിഖുകൾക്ക് പരമാധികാരമുള്ള ഒരു രാഷ്ട്രം. ഇത്രമാത്രമായിരുന്നു അന്നത്തെ വാദം. ഏറിയും കുറഞ്ഞും ഇന്നും ഖലിസ്താൻവാദികളുടെ പരമമായ ലക്ഷ്യം ഈ രാഷ്ട്രം തന്നെയാണ്. പിന്നീടാണ് ഭിന്ദ്രൻവാലയും മതപ്രാസം​ഗികന്മാരുമെല്ലാം ചിത്രത്തിലേക്ക് കടന്നുവരുന്നത്. പതുക്കെ പതുക്കെ ആവശ്യമെന്നതിലുപരി അവകാശമാണെന്ന തരത്തിലേക്ക് കാര്യങ്ങൾ മാറിമറഞ്ഞു. 1980-കളിൽ പ്രതിഷേധങ്ങൾ തീ പിടിച്ച നിലയിലേക്കെത്തിയതോടെയാണ് അന്നത്തെ പ്രധാനമന്ത്രി ഇന്ദിര ഗാന്ധി ബ്ലൂസ്റ്റാർ ഓപ്പറേഷന് ഉത്തരവിടുന്നതും സായുധപോരാട്ടത്തിന് അറുതിവരുത്തണമെന്ന് തീരുമാനിക്കുന്നതും. 

എന്നാൽ, പ്രതീക്ഷിച്ച പര്യവസാനമല്ല ഈ സൈനിക നടപടികൾക്കുണ്ടായത് എന്നത് മറ്റൊരു കഥ.  ഇന്ദിരയ്ക്കെതിരേ കടുത്ത പ്രതിഷേധത്തിലേക്ക് സിഖ് വിഭാ​ഗങ്ങൾ നീങ്ങി. സ്വന്തം സുരക്ഷാ ഉദ്യോ​ഗസ്ഥരാൽ ഇന്ദിര കൊല്ലപ്പെടുന്നതിന് കാരണമായും ഇതേ ശത്രുതയാണ്. ഇന്ദിരയുടെ മരണംകൊണ്ടും കാര്യങ്ങൾ അവസാനിച്ചില്ല. കാനഡയിലെ ഖലിസ്താനികളും രാജ്യത്തിനെതിരേ പ്രതികാരത്തിനൊരുങ്ങി. 1985 ജൂൺ 23-ന് കാനഡയിലെ മൊൺട്രിയലിൽനിന്ന് മുംബൈയിലേക്ക് പറന്ന എയർ ഇന്ത്യയുടെ കനിഷ്‌ക വിമാനം സ്ഫോടനത്തിൽപ്പെട്ട അറ്റ്ലാന്റിക്കിലേക്ക് തകർന്നുവീണു. 351 പേർക്കാണ് അന്ന് ജീവൻ നഷ്ടമായത്. 

ഹിന്ദു ക്ഷേത്രങ്ങളും ലക്ഷ്യം

പന്നൂന്റെ നേതൃത്വത്തിൽ എസ്എഫ്ജെ ഹിന്ദു ആരാധനാലയങ്ങളെ ലക്ഷ്യമിടുന്നത് ഏറെ ആശങ്കയോടെയാണ് രാജ്യം നോക്കിക്കാണുന്നത്. കേന്ദ്രമന്ത്രിമാരുൾപ്പെടെ നിരവധി പേർ ഇക്കാര്യത്തിൽ തങ്ങളുടെ ആശങ്ക അറിയിച്ചിട്ടുമുണ്ട്. ദിവസങ്ങൾക്ക് മുമ്പാണ് യു.എസിലെ കാലിഫോർണിയയിലുള്ള ബാപ്‌സ് ഹിന്ദുക്ഷേത്രത്തിനുനേരെ ആക്രമണമുണ്ടായത്. ക്ഷേത്രച്ചുവരുകളിൽ ഇന്ത്യാവിരുദ്ധ മുദ്രാവാക്യങ്ങളും അക്രമികൾ എഴുതിവെച്ചു. ലോസ് ആഞ്ജലീസിൽ ഖലിസ്താൻ ഹിതപരിശോധന നടക്കാനിരിക്കേയായിരുന്നു ക്ഷേത്രത്തിനെതിരായ ആക്രമണം. ഇന്ത്യയ്ക്കെതിരേ മാത്രമല്ല, പ്രധാനമന്ത്രി മോദിയേയും ഇവർ അധിക്ഷേപിച്ചു. 

ഇത് ആദ്യമായിട്ടല്ലായിരുന്നു യു.എസ്സിൽ ക്ഷേത്രങ്ങൾ ആക്രമിക്കപ്പെടുന്നതും രാജ്യത്തിനെതിരേ മുദ്രാവാക്യങ്ങൾ എഴുതിവയ്ക്കുന്നതും. ഖലിസ്താൻ വിഘടനവാദികൾ തന്നെയാണ് ഈ ആക്രമണങ്ങളുടെയെല്ലാം പിന്നിൽ എന്നാണ് രാജ്യം ഉറച്ചുവിശ്വസിക്കുന്നത്. പല ആക്രമണങ്ങളിലും ഇത് തെളിയിക്കപ്പെട്ടിട്ടുമുണ്ട്. മാസങ്ങൾ മുമ്പ് കാലിഫോർണിയയിലെ സാക്രമെന്റോയിലെ ബാപ്‌സ് ക്ഷേത്രം ആക്രമിച്ചതിന് പിന്നാലെയാണ് ആരാധനാലയത്തിന് നേരെ വീണ്ടും ആക്രമണമുണ്ടാകുന്നത്. ഇതോടെ, ക്ഷേത്രത്തിൽ നാശനഷ്ടമുണ്ടാക്കിയതിനെ അപലപിച്ചുകൊണ്ട് രാജ്യം രം​ഗത്തെത്തി. മറ്റ് ആരാധനാലയങ്ങൾക്ക് ആവശ്യമായ സുരക്ഷ നൽകണമെന്നും വിദേശകാര്യ മന്ത്രാലയം ആവശ്യപ്പെട്ടു. യു.എസ്സിൽ മാത്രമല്ല, കാനഡയിലും ഹിന്ദുക്ഷേത്രങ്ങൾക്കുനേരെ ഖലിസ്താനികൾ അതിക്രമം നടത്തിയിട്ടുണ്ട്.

ഇരുപതാം നൂറ്റാണ്ടിന്റെ അവസാനത്തിൽ അടിച്ചമർത്തിയ വിഘടനവാദം വീണ്ടും ശക്തിയാർജിക്കുന്നത് 2020-കളിലാണ്. പഞ്ചാബിന്റെ അവകാശങ്ങൾക്ക് വേണ്ടി പോരാടാനുറച്ച് ദീപ് സിദ്ധുവിന്റെ നേതൃത്വത്തിൽ വാരിസ് പഞ്ചാബ് ദേ എന്ന സംഘടന രൂപംകൊള്ളുന്നതും ഇതേ കാലഘട്ടത്തിലാണ്. അധികം വൈകാതെ അമൃത്പാലിനെ പോലെയുള്ള നേതാക്കളും മുന്നിലേക്കെത്തി. ഒന്നയഞ്ഞ അക്രമസംഭവങ്ങളുടെ രണ്ടാം എപ്പിസോഡ് എന്ന് പറയാനാകുന്ന തിരിച്ചുവരവായിരുന്ന ഖലിസ്താനികളുടേത്. ഇന്ത്യയ്ക്ക് അകത്തും പുറത്തുമായി ഖലിസ്താൻ നേതാക്കൾ സ്വതന്ത്രമായി വിഹരിക്കുന്നത് ഇന്ത്യയെ സംബന്ധിച്ച് ആശങ്കയുളവാക്കുന്നതാണ്. രാജ്യസുരക്ഷയ്ക്ക് വിലങ്ങുതടിയായി ഈ വിഘടനവാദികൾ നിൽക്കുന്നത് ഇനിയും സർക്കാർ കയ്യുംകെട്ടി നോക്കിനിൽക്കുമെന്നും കരുതാനാവില്ല. ഖലിസ്താൻ എന്ന ഭീഷണി ഇനി എത്രനാൾ ഇന്ത്യയ്ക്കു മുന്നിലുണ്ടാകും എന്നതാണ് ഇനി നാം കണ്ടറിയേണ്ടത്.