തിരുവനന്തപുരത്ത് തട്ടുകടകൾക്ക് പിന്നിൽ വൻ റാക്കറ്റ്; പണമെത്തുന്നത് വൻകിട ഹോട്ടലുകളുടെ അക്കൗണ്ടിൽ

തിരുവനന്തപുരം: നഗരത്തിൽ അനധികൃതമായി പ്രവർത്തിക്കുന്ന തട്ടുകടകൾക്ക് പിന്നിൽ വൻ റാക്കറ്റെന്ന് കണ്ടെത്തൽ. സാധാരണക്കാരെ മറയാക്കി വൻകിട ഹോട്ടലുകളാണ് പലയിടങ്ങളിലായി ചെയിൻ മാതൃകയിൽ തട്ടുകടകൾ നടത്തുന്നതെന്ന് പോലീസ് പരിശോധനയിൽ കണ്ടെത്തി. കഴിഞ്ഞ ദിവസം കുറവൻകോണം ഭാഗത്തുൾപ്പെടെ അനധികൃത കടകൾ പോലീസ് ഒഴിപ്പിച്ചിരുന്നു. അതേസമയം, ചിലയിടങ്ങളിൽ ഇത്തരം കടകൾ തിരികെവരുന്നുണ്ട്. നടപടികൾ ശക്തമായി തുടരാനാണ് അധികൃതരുടെ തീരുമാനം.

പണമെത്തുന്നത് ഹോട്ടലുകളുടെ അക്കൗണ്ടിൽ

കുറവൻകോണം മേഖലയിൽ നടത്തിയ പരിശോധനയിൽ കേവലം ഒരാൾക്ക് മാത്രമാണ് കച്ചവടം നടത്താനുള്ള ലൈസൻസ് ഉള്ളതെന്ന് കണ്ടെത്തി. ഇവിടെ വാഹനങ്ങളിലും മറ്റും കാലങ്ങളായി കച്ചവടം നടത്തിയിരുന്നവർ അനധികൃതമായാണ് പ്രവർത്തിച്ചിരുന്നത്. ഇതിൽ പലരുടെയും യു.പി.ഐ. അക്കൗണ്ടുകൾ പരിശോധിച്ചപ്പോൾ ലക്ഷങ്ങളുടെയും കോടികളുടെയും ഇടപാടുകളുടെ കണക്കുകളാണ് കണ്ടത്. ഇതെല്ലാം നഗരത്തിലും സമീപപ്രദേശങ്ങളിലുമുള്ള വൻകിട ഹോട്ടലുകളുടെ അക്കൗണ്ടുമായിരുന്നു.

വൻകിടക്കാരുടെ വൻ കൈയേറ്റം

നേരത്തേ റോഡുകളിൽ വീതിയുണ്ടായിരുന്ന സ്ഥലത്ത് നിയമപ്രകാരം തട്ടുകടകൾ നടത്തിയിരുന്നവരുണ്ടായിരുന്നു. വിവിധ സർക്കാർ പദ്ധതികൾപ്രകാരം ധനസഹായം ലഭിച്ചും അല്ലാതെയും മാനദണ്ഡങ്ങൾ പാലിച്ചായിരുന്നു ഉപജീവനമാർഗമെന്ന നിലയിലുള്ള ഇത്തരം സംരംഭങ്ങൾ. എന്നാൽ, അടുത്തകാലത്ത് ഇത്തരം സാധാരണക്കാരുടെ മറവിൽ പലയിടത്തും വൻകിട ഹോട്ടലുടമകൾ കൈയേറ്റം നടത്തുകയായിരുന്നു. ഭക്ഷണത്തിനും വൻതോതിൽ വിലയുയർന്നു. പലപ്പോഴുമിവയുടെ ഗുണനിലവാര പരിശോധനയോ വിലനിർണയമോ നടക്കുന്നുമില്ല. ഹോട്ടലിൽ നേരിട്ട് വിൽക്കുന്നതിനേക്കാൾ ഉയർന്ന വിലയാണ് പലയിടത്തും ഈടാക്കുന്നത്. പല തട്ടുകടകളിലും ഭക്ഷണമെത്തിക്കുന്നത് വൻ ഹോട്ടലുകളിൽനിന്നാണ്. ഒരേ ഗ്രൂപ്പുകൾക്കുതന്നെ പലയിടത്തായി തട്ടുകടകളുണ്ട്. ഒരേ സ്ഥലത്ത് പാചകം ചെയ്ത് വാഹനങ്ങളിൽ എത്തിച്ചാണ് വിൽപ്പന.

വഴുതക്കാട്, പാളയം യൂണിവേഴ്സിറ്റി കോളേജിന് മുൻവശം, മെഡിക്കൽ കോളേജ് ഹോസ്റ്റലിന് മുൻവശം, പരുത്തിപ്പാറ, കാര്യവട്ടം കാമ്പസിന് സമീപം തുടങ്ങിയ സ്ഥലങ്ങളിൽ വ്യാപകമായി അനധികൃത തട്ടുകടകൾ പ്രവർത്തിച്ചിരുന്നു. ഒരു വർഷം മുൻപ് പോലീസ് തട്ടുകടകൾ ഒഴിപ്പിച്ചിരുന്നു. എന്നാൽ, ചില രാഷ്ട്രീയക്കാരുടെയും മറ്റും പിന്തുണയോടെ പലരും വീണ്ടും പ്രവർത്തനം തുടങ്ങി. ഇതോടെയാണ് വീണ്ടും നടപടികൾ ശക്തമാക്കിയത്.

റോഡ് കൈയേറി കച്ചവടം

റോഡ് പൂർണമായും കൈയേറിയാണ് പലരുടെയും പ്രവർത്തനം. മാത്രമല്ല പ്രവർത്തനസമയം കഴിഞ്ഞും ഷാമിയാന ഉൾപ്പെടെയുള്ളവ റോഡുവക്കിൽ കൂട്ടിവെച്ചിട്ടാണ് പല കച്ചവടക്കാരും പോകുന്നത്. ഇത് യാത്രികർക്ക് തടസ്സമുണ്ടാക്കുന്നു. നടപ്പാതകളിൽക്കൂടി തടസ്സമില്ലാതെ യാത്ര ചെയ്യുകയെന്നത് മൗലികാവശമാണെന്ന് സുപ്രീംകോടതി അടുത്തിടെ വിധിച്ചിരുന്നു. അതിനാൽ ഇത്തരം കൈയേറ്റങ്ങൾ ഒഴിപ്പിക്കാൻ പോലീസിന് പൂർണാധികാരമുണ്ട്. തട്ടുകടകൾ പ്രവർത്തിപ്പിക്കാൻ ഫുഡ് സ്ട്രീറ്റ് നിർണയിക്കാനുള്ള അധികാരം കോർപ്പറേഷനാണ്.

പോലീസ് അനുമതിയും തേടണം

ഇനിമുതൽ റോഡരികിൽ തട്ടുകടകൾ ആരംഭിക്കുന്നതിന് പോലീസ് അനുമതി നിർബന്ധമാക്കും. ബന്ധപ്പെട്ട ട്രാഫിക് അസി. കമ്മിഷണർക്കാണ് അപേക്ഷ നൽകേണ്ടത്. പ്രദേശത്ത് പോലീസ് പരിശോധന നടത്തും. കട പ്രവർത്തിക്കുന്നതുകൊണ്ട് ഗതാഗതക്കുരുക്കോ മറ്റോ ഉണ്ടാകുമോയെന്നതടക്കം പരിശോധിക്കും.

സ്ഥലം നിശ്ചയിക്കുംവി.വി. രാജേഷ് (മേയർ)

പല തട്ടുകടകളും വൻകിടക്കാരാണ് നടത്തുന്നതെന്ന് ബോധ്യമായിട്ടുണ്ട്. നിയമപരമായി കച്ചവടം നടത്താൻ കഴിയുന്ന സ്ഥലങ്ങൾ ഉടൻ തന്നെ നിശ്ചയിക്കും. അനധികൃത തട്ടുകടകൾ പോലീസിന്റെ സഹായത്തോടെ നീക്കുന്നത് തുടരും

നടപടി തുടരും-ഡോ. അരുൾ ആർ.ബി. കൃഷ്ണ (സിറ്റി പോലീസ് കമ്മിഷണർ)

സഞ്ചാരസ്വാതന്ത്ര്യം തടസ്സപ്പെടുത്തി അനധികൃതമായി തട്ടുകടകൾ പ്രവർത്തിക്കുന്നത് ഒരു കാരണവശാലും അംഗീകരിക്കാനാകില്ല. ഇത് സംബന്ധിച്ച സുപ്രീംകോടതി വിധി നടപ്പാക്കേണ്ടത് പോലീസിന്റെ ഉത്തരവാദിത്തമാണ്.

ഭക്ഷ്യസുരക്ഷാപരിശോധന കർശനമാക്കി

തിരുവനന്തപുരം: ഓണക്കാലത്ത് ഭക്ഷ്യസുരക്ഷാപരിശോധന കർശനമാക്കി കോർപ്പറേഷൻ. ഭക്ഷ്യവസ്തുക്കളുടെ ഗുണനിലവാരവും സുരക്ഷയും ഉറപ്പുവരുത്തുന്നതിനായാണിത്. ഓണം സ്‌ക്വാഡ് ഭക്ഷ്യസുരക്ഷ പദ്ധതിയുടെ ഭാഗമായാണിത്. പപ്പടം, ശർക്കര, നെയ്യ്, വെളിച്ചെണ്ണ എന്നിവയുടെ ലേബൽ ലൈസൻസ് വിവരങ്ങൾ, നിർമ്മാണകാലാവധി തീയതി, ബാച്ച് നമ്പർ തുടങ്ങിയവയിൽ പരിശോധനയുണ്ടാകും. ഓൺലൈൻ പ്ലാറ്റ്ഫോമുകൾ വഴി ഓണസദ്യ വിതരണം ചെയ്യുന്ന സ്ഥാപനങ്ങൾക്കും നിയന്ത്രണം ഏർപ്പെടുത്തുമെന്ന് കോർപ്പറേഷൻ അധികൃതർ അറിയിച്ചു. ഹോട്ടലുകൾ, റസ്റ്ററന്റുകൾ, കാറ്ററിങ് സ്ഥാപനങ്ങൾ, ക്ലൗഡ് കിച്ചൺ എന്നിവിടങ്ങൾ കേന്ദ്രീകരിച്ച് പരിശോധന കർശനമാക്കും. ആഘോഷവേളകളിലെ നിയമവിരുദ്ധമായ പ്രവർത്തനങ്ങൾക്കെതിരേ കർശന നടപടി സ്വീകരിക്കുമെന്ന് കോർപ്പറേഷൻ ആരോഗ്യ സ്ഥിരംസമിതി അധ്യക്ഷൻ എം.ആർ. ഗോപൻ പറഞ്ഞു.