ചാലക്കുടി: മണ്ണുത്തി-ഇടപ്പള്ളി ദേശീയ പാതയിലെ പണി നടക്കുന്ന സ്ഥലങ്ങളിലെ ​ഗതാ​ഗത കുരിക്കിന് നേരിയ ആശ്വാസം. വാഹനങ്ങൾ വഴി തിരിച്ച് വിട്ടാണ് ​ഗതാ​ഗത നിയന്ത്രണം നടത്തുന്നത്. വെള്ളിയാഴ്ച രാത്രി 11 മണിയോടുകൂടി കുഴിയിൽപെട്ട് തടിലോറി മറിഞ്ഞതാണ് 16 മണിക്കൂറിലധികമായി നീളുന്ന വലിയ ​ഗതാ​ഗതക്കുരുക്കിന് കാരണമായത്. അതേസമയം ഗതാഗത കുരുക്ക് പരിഹരിക്കാൻ വേണ്ട ബദൽ മാർഗങ്ങൾ സ്വീകരിച്ചിട്ടുണ്ടെന്ന് ചാലക്കുടി ഡിവൈഎസ്പി പിസി ബിജുകുമാർ പറഞ്ഞു. 

To advertise here,

അപ്രതീക്ഷിതമായി തടി ലോറി അപകടത്തിൽപ്പെട്ടതാണ് ​ഗതാഗതകുരുക്ക് ഇത്രയും രൂക്ഷമാകാൻ കാരണം. കൂടാതെ പ്രതീക്ഷിച്ചതിലും കൂടുതൽ വലിയ ചരക്ക് വാഹനങ്ങളും വന്നു. മുരിങ്ങൂർ, പോട്ട, കൊടകര ഭാഗങ്ങളിൽ നിന്നുള്ള വാ​ഹനങ്ങൾ വഴി തിരിച്ച് മാള, അത്താണിയിൽ എന്നീ സ്ഥലങ്ങളിൽ  എത്തുന്ന രീതിയിലാണ് പുതിയ ​ഗതാ​ഗത ക്രമീകരണം.

കൂടാതെ കൊടകരയിലും പോട്ടയിലും വാഹനങ്ങൾക്ക് പോകാൻ വേണ്ട ക്രമീകരണങ്ങളും ഒരുക്കിയിട്ടുണ്ട്. ഇവിടെയുള്ള വാഹനങ്ങൾ വഴി തിരിച്ച് ആളൂർ വഴി അത്താണിയിൽ എത്താമെന്നുള്ള രീതിയിലാണ് ക്രമീകരിച്ചിട്ടുള്ളത്. വിമാനത്താവളത്തിലേക്കുള്ള യാത്രക്കാർ നിർബന്ധമായും ഈ വഴി പോകണമെന്നതാണ് നിർദ്ദേശം. മുരിങ്ങൂരും വാഹനങ്ങൾ വഴി തിരിച്ചു വിടുകയാണ്. എറണാകുളം ഭാഗത്തേക്കുള്ള ചെറു വാഹനങ്ങൾ വഴി തിരിച്ചു വിടുന്നുണ്ട്. 

അതേസമയം സ്വാതന്ത്ര്യദിനാഘോഷത്തിന്റെ ഭാ​ഗമായി 20-ാം തീയതിവരെ നെടുമ്പാശ്ശേരി വിമാനത്താവളത്തിലെ സുരക്ഷ വർധിപ്പിച്ചിട്ടുണ്ട്. ഈ സാഹ‍ചര്യത്തിൽ യാത്രക്കാർ മൂന്ന് മണിക്കൂറിന് മുമ്പ് തന്നെ എത്തണമെന്നാണ് സിയാൽ നിർദ്ദേശിച്ചിട്ടുണ്ട്.