കണ്ണൂർ: കൈയിൽ കുമിഞ്ഞുകൂടിയ സമ്പത്തും അധികാരവും കാരണം നാടിനെ മറന്നതുകൊണ്ടാണ് നിയമസഭാ തിരഞ്ഞെടുപ്പിൽ സി.പി.എം. ദയനീയമായി തോറ്റതെന്ന് എഴുത്തുകാരൻ എം. മുകുന്ദൻ. കോൺഗ്രസ് മുഖപത്രം വീക്ഷണത്തിന്റെ ഓണപ്പതിപ്പ് ലേഖനത്തിലാണ് ഇടതുപക്ഷ സഹയാത്രികനായ എം. മുകുന്ദന്റെ വിമർശനം. പ്രതിപക്ഷനേതാവ് പിണറായി വിജയനുനേരേയും ലേഖനത്തിൽ കടുത്തവിമർശനമുണ്ട്. സി.പി.എമ്മിൽ വിഭാഗീയത രൂക്ഷമായ കാലത്തുപോലും പിണറായി വിജയനെ പിന്തുണച്ചാണ് മുകുന്ദൻ സംസാരിച്ചിരുന്നത്.

To advertise here,

ലോകകപ്പ് ഫുട്‌ബോളിൽ ബ്രസീൽ തോറ്റതുമായാണ് ‘ഫുട്‌ബോൾ മൈതാനത്ത് വീണ കണ്ണീർ’ എന്ന ലേഖനത്തിൽ മുകുന്ദൻ സി.പി.എമ്മിന്റെ തോൽവിയെ തുലനം ചെയ്യുന്നത്. ബ്രസീൽ കളിക്കാർ കളിച്ചത് കാണികൾക്കു വേണ്ടിയോ രാജ്യത്തിനുവേണ്ടിയോ അല്ലെന്ന് മുകുന്ദൻ പറയുന്നു. ബ്രസീലിലെയും അർജന്റീനയിലെയും കളിക്കാർ അതിസമ്പന്നരാണ്. ആയിരംകോടിക്ക് മുകളിലാണ് ഓരോരുത്തരുടെയും സമ്പത്ത്. ഇതുപോലുള്ളൊരാൾ എന്തിന് കളിക്കളത്തിലിറങ്ങി വിയർത്ത് കളിക്കണം.

മത്സരം ജയിക്കണമെങ്കിൽ ഉള്ളിൽ തീയുണ്ടാവണം. ബ്രസീലിലെയും അർജന്റീനയിലെയും താരങ്ങളുടെ ഉള്ളിൽനിന്നത് കെട്ടുപോയിരിക്കുന്നു. അവർക്കിനി ഒന്നും നേടാനില്ല. സി.പി.എം. ദയനീയമായി തോറ്റതിന്റെ പിന്നിലെ രസതന്ത്രവും ഇതുതന്നെയാവാം. അവരുടെ തിരഞ്ഞെടുപ്പുറാലികളിൽ ജനങ്ങൾ സ്വയം ഒഴുകിവന്നതായിരുന്നില്ല, കൊണ്ടുവന്നതായിരുന്നു. അതുകൊണ്ടാണ് അവർ എൽ.ഡി.എഫിന് വോട്ടുചെയ്യാതിരുന്നത്. ബ്രസീൽ താരങ്ങൾ കാണികളെ മറന്നതുപോലെ സി.പി.എം. ജനത്തെ മറന്നു. ‘‘ഇടതുപക്ഷം ഇല്ലാതാവരുത്, അത് സംഭവിച്ചാൽ ആ സ്ഥാനത്ത് ബി.ജെ.പി. വരു’’മെന്ന് മുഖ്യമന്ത്രി വി.ഡി. സതീശൻ പറഞ്ഞതോർമ്മിപ്പിക്കുന്ന മുകുന്ദൻ, ‘‘കോൺഗ്രസ് ഇല്ലാതെയാവരുത്, അത് സംഭവിച്ചാൽ ആ സ്ഥാനത്ത് ബി.ജെ.പി. വരു’’മെന്ന് പിണറായി എന്നെങ്കിലും പറഞ്ഞിട്ടുണ്ടോ എന്നും ചോദിക്കുന്നു.