തിരുവനന്തപുരം: കൊച്ചിയിലെ കോറോ ഹെൽത്ത് കമ്പനിയിലെ കൂട്ടപ്പിരിച്ചുവിടലുമായി ബന്ധപ്പെട്ട് തൊഴിൽമന്ത്രിയുടെ നേതൃത്വത്തിൽ നടന്ന ചർച്ച വിജയകരം. ജീവനക്കാർക്ക് അഞ്ചുമാസത്തെ ശമ്പളം നൽകാൻ കമ്പനി അധികൃതരുമായി നടത്തിയ ചർച്ചയിൽ തീരുമാനമായി. നേരത്തെ നൽകിയ രണ്ടുമാസത്തെ ശമ്പളത്തിന് പുറമെയാണിത്. തുക ഈമാസം 26-ന് അകം ജീവനക്കാർക്ക് കൈമാറുമെന്ന് തൊഴിൽ വകുപ്പ് മന്ത്രി ബിന്ദു കൃഷ്ണ അറിയിച്ചു.

To advertise here,

പിരിച്ചുവിട്ട ജീവനക്കാരുടെ ആവശ്യങ്ങളും പരിഗണിച്ചാണ് തീരുമാനമെടുത്തിരിക്കുന്നതെന്ന് മന്ത്രി അറിയിച്ചു. ഇതുസംബന്ധിച്ച ഔദ്യോഗിക കരാർ കമ്പനിയുമായി ഒപ്പുവെച്ചിട്ടുണ്ട്. ഇവർക്ക് ഭാവിയിൽ തൊഴിൽ ലഭിക്കുന്നതിന് തടസമുണ്ടാകാതിരിക്കാൻ എക്സ്പീരിയൻസ് സർട്ടിഫിക്കറ്റും അനുബന്ധ രേഖകളും നൽകാൻ കമ്പനി സമ്മതിച്ചതായി മന്ത്രി അറിയിച്ചു.

ലേബർ കമ്മീഷണറും സ്പെഷ്യൽ സെക്രട്ടറിയും അടക്കമുള്ള തൊഴിൽ വകുപ്പ് ഉദ്യോഗസ്ഥർ ചർച്ചയിൽ പങ്കെടുത്തു. ജീവനക്കാർക്ക് ഐക്യദാർഢ്യം പ്രഖ്യാപിച്ചെത്തിയ എറണാകുളം എം.പി. ഹൈബി ഈഡൻ, എം.എൽ.എ. ഉമാ തോമസ്, വിവിധ ട്രേഡ് യൂണിയൻ നേതാക്കൾ, പൊതുസമൂഹം എന്നിവർക്ക് മന്ത്രി നന്ദി അറിയിച്ചു.