കിഴക്കമ്പലം: ശനിയാഴ്ച രാത്രിയിലെ ശക്തമായ ഇടിമിന്നലിൽ കിഴക്കമ്പലം പഞ്ചായത്തിലെ വിലങ്ങിൽ ലക്ഷങ്ങളുടെ നാശം സംഭവിച്ചു. മിന്നലേറ്റ് മറ്റക്കാട്ടിൽ അന്നക്കുഞ്ഞ് പൗലോസിന്റെ കൈയ്ക്ക് പൊള്ളലേറ്റതിനെ തുടർന്ന് പഴങ്ങനാട്ടെ ആശുപത്രിയിൽ പ്രവേശിപ്പിച്ചു. ഇവരുടെ വീട്ടിലെ കറവയുള്ള രണ്ടു പശുക്കൾ ചത്തു.

To advertise here,

പ്രദേശത്തെ ഒട്ടേറെ വീടുകളിലെ വീട്ടുപകരണങ്ങൾ കത്തിനശിച്ചു. ശനിയാഴ്ച രാത്രി ഒമ്പതേകാലോടെയാണ് ചാറ്റൽ മഴയ്ക്കൊപ്പം ശക്തമായ മിന്നൽ ഉണ്ടായത്. വിലങ്ങ് കനാലിനരികിലെ മറ്റക്കാട്ടിൽ ഷാജി പൗലോസിന്റെ വീടിനോട് ചേർന്നുള്ള തൊഴുത്തിൽ നിന്ന പശുക്കളാണ് ചത്തത്. തൊഴുത്തിലെ ഫാനുകൾ നശിക്കുകയും ഒരു ഭാഗത്തെ ഭിത്തി തകരുകയും ചെയ്തു.

placeholder
LIGHTNING
പരിക്കേറ്റ അന്നക്കുഞ്ഞ് പൗലോസ് | ഫോട്ടോ: മാതൃഭൂമി

വീടിന്റെ മുറ്റത്ത് കുഴി രൂപപ്പെടുകയും ഭിത്തി പൊട്ടുകയും ചെയ്തു. ലൈറ്റിന്റെ സ്വിച്ച് ഇടാൻ ശ്രമിക്കുമ്പോഴാണ് വീട്ടമ്മയുടെ കൈക്ക് പൊള്ളലേറ്റത്. മീറ്ററും മെയിൻ സ്വിച്ചും പൊട്ടിച്ചിതറി. വീട്ടിലേക്കുള്ള വൈദ്യുതി ലൈനും ആറ് ഫാനുകളും കത്തിനശിച്ചു. ഞാറ്റുംകാല പൗലോസിന്റെ പമ്പ് സെറ്റ്, ഫാൻ, കളപ്പുരയ്ക്കൽ കെ.പി. മത്തായിയുടെ ടി.വി., ഫാൻ, കറുകപ്പിള്ളി കുര്യാക്കോയുടെ ഫ്രിഡ്ജ്, ഫാൻ, മറ്റക്കാട്ടിൽ എം.വി. സാജുവിന്റെ ഫാൻ, പമ്പ് സെറ്റ് എന്നിവയെല്ലാം നശിച്ചിട്ടുണ്ട്.