തിരുവനന്തപുരം: 2026-27 സാമ്പത്തിക വർഷത്തിലെ 2026 സെപ്റ്റംബർ 30 വരെയുള്ള രണ്ടാംപാദത്തിൽ കിഫ്ബിയുടെ നഷ്ടം 483.82 കോടി രൂപ. ആദ്യപാദത്തിൽ രേഖപ്പെടുത്തിയ 513.36 കോടി രൂപയുടെ നഷ്ടത്തേക്കാൾ കുറവാണിത്. നടപ്പു സാമ്പത്തികവർഷത്തിന്റെ ആദ്യ ആറുമാസത്തെ ആകെ നഷ്ടം 997.19 കോടി രൂപയായി. ബോംബെ സ്റ്റോക്ക് എക്സ്ചേഞ്ച് ലിമിറ്റഡിന് സമർപ്പിച്ച സാമ്പത്തിക റിപ്പോർട്ടിലാണ് കിഫ്ബി ഇക്കാര്യം വ്യക്തമാക്കിയത്.

To advertise here,

പദ്ധതികളിൽനിന്നുള്ള വരുമാനക്കുറവിനു പുറമേ, ഫണ്ടിന്റെ വരവ് അക്കൗണ്ടുകളിൽ രേഖപ്പെടുത്തുന്ന രീതി, വിപണിയിൽനിന്നെടുത്ത വായ്പകളുടെ ഉയർന്ന പലിശ, അടിസ്ഥാന സൗകര്യ പദ്ധതികൾക്കുള്ള ചെലവ്, വായ്പാ ചട്ടങ്ങളനുസരിച്ച് നീക്കിവയ്‌ക്കേണ്ട തുക എന്നിവയെല്ലാം നഷ്ടത്തിന് കാരണമാവുന്നു. 

കേരള ഇൻഫ്രാസ്ട്രക്ചർ ഇൻവെസ്റ്റ്മെന്റ് ഫണ്ട് ആക്ട് പ്രകാരം സംസ്ഥാന സർക്കാരിൽനിന്ന് ലഭിക്കുന്ന തുക കോർപസ് ഫണ്ട് - റിവോൾവിങ് അക്കൗണ്ടിലേക്കാണ് മാറ്റുന്നത്. പ്രധാനമായും മോട്ടോർ വാഹന നികുതിയുടെ വിഹിതവും പെട്രോൾ, ഡീസൽ എന്നിവയുടെ വിൽപ്പനയിൽനിന്നുള്ള സെസുമാണ് ഇത്തരത്തിൽ ലഭിക്കുന്നത്. അടിസ്ഥാന സൗകര്യ വികസനത്തിനുള്ള മൂലധന സഹായമായാണ് ഈ തുക കണക്കാക്കുന്നത്. അതിനാൽ ലാഭനഷ്ടക്കണക്കിൽ വരുമാനമായി ഉൾപ്പെടുത്തുന്നില്ല.

സെപ്റ്റംബർ 30-ന് അവസാനിച്ച ആറുമാസത്തിനിടെ സംസ്ഥാന സർക്കാരിൽനിന്ന് മോട്ടോർ വാഹന നികുതിയും ഇന്ധന സെസും ഉൾപ്പെടെ 2,790.86 കോടി രൂപ കിഫ്ബിക്ക് ലഭിച്ചിട്ടുണ്ട്. എന്നാൽ, ഈ തുക വരുമാനമായി കണക്കാക്കാത്തതിനാൽ കണക്കുകളിൽ രേഖപ്പെടുത്തുന്ന പ്രവർത്തന വരുമാനം കുറവാണ്. അതേസമയം, പ്രവർത്തനച്ചെലവും സാമ്പത്തിക ബാധ്യതകളും ഉയർന്ന നിലയിലുമാണ്.

ഇത്തരത്തിൽ സംസ്ഥാന സർക്കാരിൽനിന്ന് വലിയ തോതിൽ ലഭിക്കുന്ന മൂലധന സഹായം വരുമാനമായി കണക്കാക്കാത്തതിനു പുറമേ, വിപണിയിൽനിന്നുള്ള വായ്പകളുടെ ഉയർന്ന പലിശയും വാണിജ്യലാഭം ലക്ഷ്യമിടാത്ത വികസന പദ്ധതികൾക്കുള്ള ചെലവും കിഫ്ബിയുടെ സാമ്പത്തിക കണക്കുകളിൽ സമ്മർദം സൃഷ്ടിക്കുന്നു. സർക്കാർ സഹായം ലഭിക്കുന്നതിനൊപ്പം കേരളത്തിലുടനീളം അടിസ്ഥാന സൗകര്യ വികസന പദ്ധതികൾക്ക് പണം ചെലവഴിക്കുന്നുണ്ടെങ്കിലും കണക്കുകളിൽ തുടർച്ചയായ നഷ്ടം രേഖപ്പെടുത്തേണ്ടിവരുന്നു. ഉയർന്ന വായ്പാ ചെലവും പദ്ധതികളുടെ സാമ്പത്തിക സ്വഭാവവും വായ്പാ വ്യവസ്ഥകൾ പ്രകാരമുള്ള നീക്കിയിരിപ്പുകളും കിഫ്ബിയുടെ സാമ്പത്തിക പ്രകടനത്തെ എങ്ങനെ ബാധിക്കുന്നുവെന്ന് വ്യക്തമാക്കുന്നതാണ് പുതിയ റിപ്പോർട്ട്.

റോഡുകൾ, പൊതുകെട്ടിടങ്ങൾ, സാമൂഹിക അടിസ്ഥാന സൗകര്യങ്ങൾ തുടങ്ങി കേരളത്തിലെ വിവിധ വികസന പദ്ധതികൾക്കാണ് കിഫ്ബി പണം ചെലവഴിക്കുന്നത്. ഇതിൽ പല പദ്ധതികളും നേരിട്ട് വരുമാനം ഉണ്ടാക്കുന്നവയല്ല. വാണിജ്യാടിസ്ഥാനത്തിൽ ചെലവിനൊത്ത വരുമാനം ലഭിക്കാത്ത പദ്ധതികൾക്കായി ഭൂമി ഏറ്റെടുക്കൽ, എൻജിനീയറിങ്, നിർമാണം, പദ്ധതി നടത്തിപ്പ് തുടങ്ങിയ ചെലവുകൾ കിഫ്ബി വഹിക്കേണ്ടിവരുന്നു. പൊതുജനങ്ങൾക്ക് പ്രയോജനകരമായ ഇത്തരം പദ്ധതികൾ സാമ്പത്തികമായി കിഫ്ബിക്ക് നേരിട്ട് ലാഭം നൽകുന്നില്ല.