കൊച്ചി: വെള്ളാപ്പള്ളി നടേശന് പ്രതിയായ മൈക്രോഫിനാന്സ് അഴിമതി കേസില് അന്വേഷണ ഉദ്യോഗസ്ഥനെ മാറ്റാന് സര്ക്കാര് നീക്കം. കേസന്വേഷിക്കുന്ന എസ്പി എസ്. ശശിധരനെ അന്വേഷണ ഉദ്യോഗസ്ഥനായി നിലനിര്ത്താമെന്ന് ഹൈക്കോടതിക്ക് നല്കിയ ഉറപ്പില്നിന്നാണ് സര്ക്കാര് പിന്നോട്ട് പോകുന്നത്.
വിജിലന്സില് നിന്ന് സ്ഥലംമാറി പോകുന്നുണ്ടെങ്കിലും ശശിധരന് തന്നെ മൈക്രോഫിനാന്സ് കേസ് അന്വേഷിക്കുമെന്നാണ് സര്ക്കാര് ഹൈക്കോടതിയില് ഉറപ്പ് നല്കിയിരുന്നത്. അങ്ങനെയൊരു ഉത്തരവിറക്കാന് സര്ക്കാരിനോട് ഹൈക്കോടതി നിര്ദ്ദേശം നല്കിയിരുന്നു. എന്നാല് ആഭ്യന്തര സെക്രട്ടറി തന്നെ നേരിട്ട് ഹൈക്കോടതിയിലെത്തി കേസിലെ അന്വേഷണ ഉദ്യോഗസ്ഥനെ മാറ്റാന് അനുവദിക്കണമെന്നാവശ്യപ്പെട്ടിരിക്കുകയാണ്.
നേരത്തെ എസ്പി അന്വേഷിച്ചിരുന്ന കേസ് ഡിഐജി തലത്തിലുള്ള ഉദ്യോഗസ്ഥനെ ഏല്പ്പിക്കാമെന്നാണ് ആഭ്യന്തര സെക്രട്ടറി നല്കിയിരിക്കുന്ന വിശദീകരണം.
മൈക്രോ ഫിനാന്സ് കേസില് സര്ക്കാര് ഫണ്ടിന്റെ ദുരുപയോഗമാണ് വിജിലന്സ് അന്വേഷിക്കുന്നത്. ഓക്ടോബറില് കേസിന്റെ കുറ്റപത്രം സമര്പ്പിക്കണമെന്ന് ഹൈക്കോടതി സമയപരിധി നിശ്ചയിച്ച് നല്കുകയും ചെയ്തിരുന്നു. ഇതിനിടെയാണ് പുതിയ അന്വേഷണ ഉദ്യോഗസ്ഥനെ നിയമിക്കാമെന്ന് സര്ക്കാര് കോടതിയെ അറിയിച്ചിരിക്കുന്നത്.
ഡിഐജി ആയ കെ. കാര്ത്തിക്കിന് അന്വേഷണ ചുമതല നല്കാമെന്നും സംസ്ഥാനതലത്തില് വിശദമായി അന്വേഷണം നടത്താന് ഇത് സഹായിക്കുമെന്നും സര്ക്കാര് വിശദീകരിക്കുന്നു. എന്നാല് പുതിയ അന്വേഷണ ഉദ്യോഗസ്ഥനെ കേസ് ഏല്പ്പിക്കുമ്പോള് സ്വാഭാവികമായും അന്വേഷണം കൂടുതല് നീണ്ടുപോകാനും സാധ്യതയുണ്ട്.
Content Highlights: Kerala Govt. to Change Microfinance Case Investigator
Published: 04 Sept 2025, 12:32 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented