കൊച്ചി: സാങ്കേതിക സര്‍വകലാശാല താത്കാലിക വൈസ് ചാന്‍സലര്‍ നിയമനത്തില്‍ സര്‍ക്കാര്‍-ചാന്‍സലര്‍ തര്‍ക്കത്തില്‍ വിമര്‍ശനവുമായി ഹൈക്കോടതി. വൈസ് ചാന്‍സലറായി ഡോ. സിസ തോമസിനെ കണ്ടെത്തിയത് എങ്ങനെയാണെന്ന് കോടതി ചോദിച്ചു. സിസ തോമസിന്റെ പേര് ആരാണ് നിര്‍ദേശിച്ചതെന്നും എന്തുകൊണ്ട് മറ്റു വിസിമാര്‍ക്കോ പ്രോ വിസിമാര്‍ക്കോ താത്ക്കാലിക വി.സിയുടെ ചുമതല നല്‍കിയില്ലെന്നും ചാന്‍സലറായ ആരിഫ് മുഹമ്മദ് ഖാനോട് കോടതി ചോദിച്ചു.
അതേസമയം, സിസയുടെ പേര് എവിടെനിന്ന് ലഭിച്ചെന്ന കോടതിയുടെ ആവര്‍ത്തിച്ചുള്ള ചോദ്യത്തിന് വ്യക്തമായ മറുപടി നല്‍കാന്‍ ചാന്‍സലറുടെ അഭിഭാഷകന് സാധിച്ചില്ല. സാങ്കേതിക വിദ്യാഭ്യാസ ഡയറക്ടറേറ്റിലെ സീനിയര്‍ ജോയിന്റ് ഡയറക്ടറായിരുന്ന സിസ തോമസിനെ താല്‍ക്കാലിക വിസിയായി നിയമിച്ചതിനെതിരേ സര്‍ക്കാര്‍ സമര്‍പ്പിച്ച ഹര്‍ജി പരിഗണിക്കുകയായിരുന്നു കോടതി.
വൈസ് ചാന്‍സലറുടെ നിയമനവുമായി ബന്ധപ്പെട്ട് സര്‍ക്കാരുമായി ആശയവിനിമയം നടത്തിയിരുന്നുവെന്നും ചാന്‍സലറുടെ അഭിഷാകന്‍ കോടതിയെ അറിയിച്ചു. സര്‍ക്കാര്‍ ആദ്യം നല്‍കിയത് ഡിജിറ്റല്‍ സര്‍വകലാശാല വിസി സജി ഗോപിനാഥിന്റെ പേരാണ്. എന്നാല്‍ സുപ്രീംകോടതിയുടെ ഉത്തരവ് സജി ഗോപിനാഥിനും ബാധകമാണെന്ന നിയമോപദേശം മുന്നിലുള്ളതിനാല്‍ അദ്ദേഹത്തെ ഒഴിവാക്കി. ഇതിനുപകരം സര്‍ക്കാര്‍ ആവശ്യപ്പെട്ടത് ഉന്നത വിദ്യാഭ്യാസ പ്രിന്‍സിപ്പല്‍ സെക്രട്ടറിയുടെ പേരാണ്. അവര്‍ക്ക് യുജിസി നിഷ്‌കര്‍ഷിക്കുന്ന മാര്‍ഗരേഖ പ്രകാരമുള്ള യോഗ്യത ഇല്ലാത്തതിനാല്‍ ഒഴിവാക്കുകയായിരുന്നുവെന്നും അഭിഭാഷകന് കോടതിയില്‍ പറഞ്ഞു.
വിസി എന്ന നിലയില്‍ തന്നെ പ്രവര്‍ത്തിക്കാന്‍ അനുവദിക്കുന്നില്ലെന്നും 4000-ഓളം വിദ്യാര്‍ഥികള്‍ക്കുള്ള സര്‍ട്ടിഫിക്കറ്റുകള്‍ ഡിജിറ്റല്‍ സിഗ്നേച്ചര്‍ ഇല്ലാത്തതിനാല്‍ നല്‍കാന്‍ കഴിയുന്നില്ലെന്നുമുള്ള വാദം വിസിയുടെ അഭിഭാഷകനും കോടതിയില്‍ ഉന്നയിച്ചു. എന്നാല്‍ സര്‍വകലാശാല ഈ വാദത്തെ പൂര്‍ണമായും തള്ളി. ഒരു സര്‍ട്ടിഫിക്കറ്റും നല്‍കാന്‍ ബാക്കിയില്ലെന്നും എല്ലാം സമയബന്ധിതമായ വിതരണം ചെയ്തിട്ടുണ്ടെന്നും സര്‍വകലാശാലയുടെ സ്റ്റാന്‍ഡിങ് കോണ്‍സല്‍ കോടതിയില്‍ പറഞ്ഞു. കേസില്‍ തിങ്കളാഴ്ച കോടതി വിധിപറയും.
Content Highlights: high court questions to chancellor on sisa thomas appointment
Published: 25 Nov 2022, 05:25 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented