ആലപ്പുഴ: പുന്നമട സി.പി.എം. ലോക്കൽ കമ്മിറ്റി സെക്രട്ടറി എസ്.എം ഇക്ബാലിന് നിർബന്ധിത അവധി. ലോക്കൽ കമ്മിറ്റി ഓഫീസിൽ വെച്ച് വനിതാ നേതാവിനുനേരേ പീഡനശ്രമമെന്ന കേസിനെത്തുടർന്നാണ് നടപടി. എം.വി. ​ഗോവിന്ദന്റെ സാന്നിധ്യത്തിൽ ചേർന്ന ജില്ലാ സെക്രട്ടറിയേറ്റ് യോ​ഗത്തിലാണ് തീരുമാനം. സി. സലിംകുമാറിനാണ് പകരം ചുമതല. 

To advertise here,

കഴിഞ്ഞ ദിവസമാണ് ലോക്കൽ കമ്മിറ്റി സെക്രട്ടറിയായി ഇക്ബാലിനെ വീണ്ടും തിരഞ്ഞെടുത്തത്. വനിതാ നേതാവിന്റെ പരാതിയിൽ അന്വേഷണം നടത്തിയ പാർട്ടി കമ്മിഷൻ ഇക്ബാൽ കുറ്റക്കാരനല്ലെന്ന് കണ്ടെത്തിയിരുന്നു. തുടർന്ന്, യുവതി പോലീസിൽ പരാതി നൽകുകയായിരുന്നു. ഇതേത്തുടർന്ന്, എസ്.എം ഇക്ബാലിനെതിരേ ആലപ്പുഴ നോർത്ത് പോലീസ് കേസെടുക്കുകയും ചെയ്തു.  

2023 ഓഗസ്റ്റിലാണു സംഭവം. വ്യാഴാഴ്ച പരാതിക്കാരിയുടെ മൊഴി രേഖപ്പെടുത്തിയതിനു ശേഷമാണ് കേസ് രജിസ്റ്റർ ചെയ്തത്. ഓഫീസിൽ ചെന്നപ്പോൾ അതിക്രമം നടത്തിയെന്നാണു പരാതി. ആദ്യം സി.പി.എം. ഏരിയാ നേതാക്കളോടാണ് പരാതിപ്പെട്ടത്. നടപടിയുണ്ടാകാത്തതിനാൽ സംസ്ഥാന സെക്രട്ടറിക്കും പരാതി നൽകിയിരുന്നു.